Read Hrangkhol JEREMIA 12 Bible Online

JEREMIA 12 - Hrangkhol bible

JEREMIA 12

¹RENGPA ni chunga hin chiar mai khom inlân, nang chu ni dik mai ngai a ni. Khan ni roirêlna dân hi nang ki irdon a ni. I lo hrangin mo, mi pualoihai chung an tuar bâka; mi dik loihai hlo an ichuk ngai.

²Anni chu ni phuna, irzung an thâka; an hor sôna, ra an hong neia. An chongbâiin nang an inpâka, an lungrîl rêkin chu nang an ihla vit a ni.

³RENGPA nangma’n kei chu ni nin hriata, ki sin ni hmua, lung nang ki thungzia ngei khom hi mi pualoihai hi belra that hrang angin hruaipaiin lân. A that hrang zoro a phâk mân ama chu hrungin lân.

⁴Idôra sôt mo kin ram hi a ichâr hrang, hmun tina hloisûlhai hi an ichâr hrang? Kin mihai sualna sikin ramsahai le vâhai chu an thi tâk sikin, mipuihaiin, “Pathianin ei omdân hi hmu viat maka,” an ti ngai.

⁵RENGPA’N a ni tia, “Jeremia, mihriamhai lua’n nang an irzûl insôltir theiin te, sakor vângin teh idôr mo ni irsiatpui thei ta hrang? Hmun kolnahaia lua ni ngîr indet thei no’n te, Jordan kôla rampuia len vâng teh itin mo ni itho ta hrang?

⁶Ni irzirpui ni in mihaiin nang an phiara, nang doi hrangin an irrual a ni. Satakin nang an chongpui khomin, anni chu iamhai no ro,” a tia.

⁷RENGPA’N a ti, “Israel ki mâksan rak tâka, ki nam inthang ki imâk tâk a ni. Lung ki ithunghai chu an râlhai kuta ki ipêk tâk a ni.

⁸Ki mi inthanghaiin an ni doia; rama kâmkeibaknei ang takin an ni khêkkhuma, khasikin anni chu ki ihnôlhai an ni.

⁹Ivadung inthim laia muhâite an ichi ngai angin, ki mi inthanghai chu an ni. Hong saa hruaithênaa om sa hrangin, ramsahai chu koibûmhai roi.

¹⁰Ram dang roirêltu tamtakin ki grep irhuan an insiata, Ki loihai chu an chîlpol neng tâka. Ki ram enhoi tak chu ramchârin an siam zoi ta.

¹¹Ramchârin an siam tâka, ki makunga rong luaiin a om ta. Ram pumpui chu ramchâr a chang zoi ta sikin tûte’n donsui ta mahai.

¹²Ramchâr tâng rama irthokin longhai hrangin mi an ihong a ni ta. Ram pumpui insiatchit hrangin irdoina ki itîr a ni ta; mi tukhom irtharngamin om ta mahai.

¹³Ki mihai chu bu an inrîtin, hloisûl an irtika; an sinsôl bâk ngaia, khannisian ite an ra om ngai mah. Ki ningmur irkhêl tak sika khan, an chîmuhaiin ra an insua thei loi a ni,” a tia.

¹⁴RENGPA’N a ti, “Israel kôlvêla om, ki mi Israelhai ram ki ipêk insiattuhai chungchânga hin ti nuam ki inei a ni. Kha mi sualhai kha thing ar zunga phâipai angin, an rama irthokin thonpaihai ki ta, an kuta irthokin Juda in sûngkuahai chu saninsuahai ki ti.

¹⁵Khan, ki thonpai hrangin, an chunga khonzâna nei nôk ki ta; nam tin mâni hmun le mâni ram chita hruai kîr nôkhai ki ti.

¹⁶Ki mihai chu Baal irhming songin chonginkung an lei irchutir ngaia, khaang takin, ‘RENGPA mihring’ irhming songin chonginkung an irchu tika ki mihai omdân lan lang a ta, an laia kop sa an ti.

¹⁷Nikhomsianlân, a zôm nuam loi nuam kai chu pai ving ki ta, inboihai ki ti,” ti hi keima RENGPA hin ki iti tâk a ni.