Read Hrangkhol JEREMIA 13 Bible Online

JEREMIA 13 - Hrangkhol bible

JEREMIA 13

¹RENGPA khan a va fea, ki ta hrangin diar irphân irchôka kai hrangin tuia khom phûm loi hrangin a ni hrila.

²Khaang khan puan chu ki’rchôka, ki kai tâka.

³Khan, RENGPA’N a ni chongpuia hiang hin a tia,

⁴“Eufrates vadunga fe’n lân, lung ir-ônga ni diar kha thup ro,” a tia.

⁵Khanchu ki fea, ki thup tâka.

⁶Zoro sôtzan hnunga chu, RENGPA’N Eufrates-a fea diar kha la nôk hrangin a nin hrila.

⁷Ki fe nôkin chu ki thupna kha ki hmu nôk tena chu a lei hmon vinga, a hmangna zel om ta maka.

⁸RENGPA’N a ni chongpui nôkin chu, hiang hin a tia,

⁹“Hiang tak hin Judahai irpâkna hi Jerusalem irsongna chu ki inboitir hrang a ni.

¹⁰Hi mi pualoihai ki thu irngai nuam loia, tukulliana om ngai pathian dang sinthoa chubai mûk ngaihai hi diar hmanghmunboi ang hin ni an ti.

¹¹Mi’n diar an ikai mai ngai ang khan, Israel in sûngkua le Juda in sûngkua murdi ki kuanga om mai hrangin le, nin pâka ni chôiirsâng hrangin ki’rfûktira, khan ki thu zôm nuam mahai,” a tia.

¹²RENGPA Pathianin a nin hrila, “Jeremia, Israel mi tinin uain bêla uain sung insip hrangin inhrilhai roh. Anni’n ni kuang, bêl murdi uain thun insip hrang ti ki inhriat loi ma ni? an tia ni’n chu,

¹³hiang hin hrilhai ro, hi hi RENGPA iti chu a ni. Hi rama rêng Davida rêngtoihmun luatu rênghai, ochaihai, deipuhai le Jerusalema om murdihai an inrui mâka uain ki in intirhai hrang a ni.

¹⁴A tar le a vângin bêl a binga irtoka koi ngai ang hin an michal indang pehai ki ta, lungkhamna, kanna le khonzâna boi vingin ki irhmangtirhai hrang a ni,” a tia.

¹⁵Israel mihaio, RENGPA’N a itong tâk kêng! Irngaiintôm takin irngai pe roi.

¹⁶RENGPA nin Pathian chôiirsâng roi, inthim a zuan tunga, tâng tiang nin irthon mân hin; nin itûng ngai vâr kha inthim le a vârro lai takin a hong ni mân hin.

¹⁷Nin mikuar nin sung nuam noa ni’n chu, nin irsongna sikin dâihrekin chap ki ti: chap ngûi ngûi ki ta, ki mitrithi luang zun zun a ti. RENGPA mihai chu intângna ina intâng hranga hruai an ni tâk sikin.

¹⁸RENGPA’N a ni tia, “Rêng le a nu chu an rêngtoihmun ata zuang chum hrangin hrilhai ro, an rênglukhum enhoi takhai an lua irthokin a tâk pehai ta sikin.

¹⁹Sim tianga Judai ram khopuihai chu irhual zoiin an om tâka, tûte a fe suak thei zât ni ta mah. Juda mi murdi sala hruai an ni zoi ta,” a tia.

²⁰Jerusalem en ro, ni râlhai chu hmâr tiang ata an zuang chuma, Ni ienkol hranga ni kuta om ni irsongpui ngai ni mihai chu, khôn mo an om zoi ta?

²¹Rual sa ni inei ngaihai khan nang an rûna ni chunga roirêl sianlân, imo ni iti ta hrang? Nupang nâi nei ang takin a nâ ni ituang hrang a ni.

²²I lo hranga hihai hi ki ituang mo a ini, ni lungrîlin ni ti’n chu, ni sual hrai sika a ni. Ni puanvêl nang an lîm pea, nuamningin nang an iloh a ni tâk.

²³Ethiopia mi dukin a vun rông indanglamtirin, keiârsi’n a zia a ithûl thei ma ni? An theiin chu, nangni sualna ti loiin thil dang tho ngai loihaiin thil dik sin irchu thei nin ti.

²⁴Ramchâra phâivua’n bu’rsi a isêm invuang ngai angin, RENGPA’N nangni inthekdartir a ti.

²⁵Hi hi ni dongtum ni hrangin a lei iti ving a ni ta. Ama nin irnghila, pathian dolhai nin irnghat tâk sikin, nin chunga intungtir hranga rêlinfel a ni ta.

²⁶Ama ngêtin RENGPA’N ni puanhai hlîk ving a ta, inzak nang irhmutir a ti.

²⁷Thil a inuam loi ni tho ngaihai kha nang a hmu ving, mi’n a tualbôm dôngma a irzuk ngai le sakorchalin a pui a izui ngai angin, sonong pathianhai tânga le phâia ni izui ngai nang a ihmu a ni. Jerusalem mihaio, nin chungthu an tak a ni ta! Itik tena irthiang ngai zât mo nin ini tâk?