Read Hrangkhol JEREMIA 19 Bible Online

JEREMIA 19 - Hrangkhol bible

JEREMIA 19

¹RENGPA khan hiang hin a ti: “Fe’n lân, bêl suktu pil bêl va’rchôkin lân, mipui laia hruaituhai, ochai laia hruaituhai hruai roh.

²Harsit mikota suakin Ben-Hinom irhôra khan fe’n lân; kha khan, thu nang ki ihril hrang kha inpuang roh.

³Hiang hin insîr ro: ‘Juda rama rênghai le Jerusalem mipuihai, keima itinrêng thotheitu RENGPA Israelhai Pathianin hril hrang ki inei hi irngai roi. Hi hmuna hin vânduaina irkhêl tak ki hong intungtir hrang a ni, a thurchi len hriathaiin chu inlâi rak an ti.

⁴Mihaiin an mâksana, hi hmuna ram dang pathian chongpuina’n an hmang tâka, anni le an irchibulhai Judai rama rênghai khomin, an inhriat ngai loi pathianhai kuang mirimhoi an hâla, mi siat sin loihai thisenin ki hmun hi an insip zoi ta.

⁵An nâihai mei leh irbôlna hranga an inhlan theina hrangin, Baal ta hrangin maichâmhai an isiam a ni. Khahai tho hrangin thu ite pehai ma unga; ki lungrîla lua ki insâp phâk loi a ni.

⁶Khasikin hi hmun hi Tofet a ni no le Hinom phâi tia koi loina zoro a la hong itung hrang a ni. Kha nêkin chu irthatna phâi tia inhriat ni a ti.

⁷Hi hmuna hin Judai ram le Jerusalema mihai thiltum chu chanlamboi inchang pehai ki ta, an râlhai chu zoina pêkin irdoina hmuna ithat ni an ti.

⁸Hi khopui chunga hin siatna irkhêl tak intungtir ki ta, a theng irlôihaiin ar khêl ti an ti.

⁹Râlhaiin khopui chu irhual khap an ta, a sûnga mihai that tum an ti. Hi irhual khapna irkhêl hrang dân chu khopui sûnga mihai kha irfâk irhlôm an ta, an nâihai ten lua fapai pehai an ti,” tiin.

¹⁰Khanchu RENGPA’N ki ifepuihai mithmua bêl kha inkhoi hrangin a ni hrila,

¹¹khante, an kuang, “RENGPA itinrêng thotheiin mipuihai le khopui hi insiat ki ta, hi bêl koi irbun thei ta loi ang hin ni a ti. Mihai khan, an mithihai phûmna hrang ram dang a om ta no sikin Tofet-a an iphûm hrang a ni.

¹²Hi khopui sûnga mi omhai hi Tofet ang taka om hrangin chong ki inkung a ni.

¹³Jerusalema inhai, Judai rama rêng inhai le irvâna ârsihai kuang mirimhoi hâla pathian danghai kuang uain an bun thuanna ngaihai kha Tofet hmun ang taka porinchetir ni a ti,” tia anni chu hril hrangin.

¹⁴RENGPA’N a chongbe inpuang hranga a ni itîrna hmun Tofet chu ki mâk tâka. Biak in kholaia fea ngîrin mipuihai ki hrilhaia.

¹⁵Itinrêng thothei RENGPA Israelhai Pathianin a iti a ni, “Hi khopui le a kôlvêla khuahai chunga dûk tuangna insum ki ta, ki ti kha a itung hrang a ni ta, nin tukul nin inliantira, ki itihai nin irngai no sikin,” tiin.