Read Hrangkhol JEREMIA 2 Bible Online

JEREMIA 2 - Hrangkhol bible

JEREMIA 2

¹RENGPA chong chu hiang hin ki kuang a zuang tunga,

²“Fe’n lân, Jerusalem mihai inhriat hrangin thu insîr roh. Dôngmate ni chang laia ni iamomzia, ei irnei zoia lung ni ni thungzia, chîmu ite song loina hmun ramchâra ni ni izui dânhai kha ki inhriat mai a ni.

³Israel keima ta vai ni nia; ki thil nei irthiang ni lei hong nia, nang innatirtu, tu chunga khom tuangna le siat irkipna kin tungtir ngai. Keima RENGPA’N ki iti a ni,” tiin.

⁴O Jakoba in sûng mihai le Israel nam tinhaio, RENGPA thu hi irngai roi.

⁵RENGPA’N a ti, “Nin irchibulhaiin keimaa hin imo thil dikloi an ihmua an ni irhlapuiin, an irot? Chanlamboi millimhai chubai mûkin hmanghmunboi an ichang tâk a ni.

⁶Aigupta ram ata ni hruai suaktu, ramchâr khur inthûkhai, tûte om zoi loina ramsêt, Tûte fe ngai loina, om ngai loi hruai inkhêltirtu, RENGPA chu kho tiang mo a iom?” tiin ni ngaitua mo.

⁷Ram sataka a ra fâka, a satnahai hmanginhoi hrangin, ki ihruai intunghai a ni. Khan ki ram kha chanlamboiin an siama, anni ki ipêkhai ram kha an iporinchetir a ni.

⁸Ochaihaiin RENGPA kha kho tiang mo a iom? Chong irdon siam loiin, ki ochaihaiin an ni inhriat loi a ni. Roirêltuhai ki chunga tehel an zonga; deipuhaiin Baal irhmingin thu an inpuanga, Hlutna nei loi millim chubai an imûk a ni.

⁹Khaangin, keima RENGPA’N ki mihai ki irdoipuina thu inlang nôk ki ta, an irchi suanpârhai thiam no inchang ki ti.

¹⁰Nitâk tiang Kupra tuipanga fe unglân, sak tiang panin Kidron rama mi tîr unglân, sak tianga Kedar rama mi tîr unglân, hianga thil rêng rêng lei tung ngai mah ti hmu nin ti.

¹¹Ama chu a tak lei ni khomsian, nam dangin chu an pathianhai thûl ngai mahai, ki mihaiin chu anni roiinpuia inomtirtu Pathian chu, anni ta hrang ite tho theiloi pathianhai khan an ithûl ngai a ni.

¹²Khasikin irngai irkhêl le lungzînga an omna hrangin, irvân ichiom taka inthing hrangin thu ki ipêk a ni.

¹³Ki mihaiin sual inhni an sin tâka; keima hringna tuihnâr hi an ni mâk raka, tuikuang an choia, tuikuang tui reng irting thei ngai loi chu.

¹⁴Israel chu suak ni maka; suala irzir khom ni mah. Anino’nte itho mo râlhai kuttum a ituang tâk?

¹⁵Kâmkeibaknei angin an inhrâm khuma; A ram chu ramchârin an siama, a khopui khom a lua hrang boiin a ram zoi tâk.

¹⁶A ni Nof mihai le Tahfanes mihai khan, a lu an vîk khoi pea;

¹⁷Israel, RENGPA ni Pathianin lampuia nang ki hruai lai khan, ni ni mâksan sika khan, hi thil hi ni bingin ni lu chunga ni intungtir tâk a ni.

¹⁸Aigupta rama fein imo ni isapuina hrang ni ihmua, ni isabei tui in hrangin ma ni? Assuria fe’n imo ni isapui ual hranga ni irtûng, Eufrates-a irthoka tui in hrangin mo?

¹⁹Ni sualna khan dûk nang tho a ta, hnung ni ni isongna khan thiam no changin om ni ta, RENGPA ni Pathian ni mâk raka, ki ta hranga iamom ni ini loi hrang hi, sual a ini lam le a satloina lan hre suak ni ti. Keima, RENGPA Pathian Itinrêng thothei hin ki iti tâk a ni.

²⁰RENGPA Pathianin a ti, “Tiana khan Israel, ki thuneina ni hnôla, ki thu zôma chubai ni mûk hrang khom nuam mak chea; Tâng irsâng chunga hai, thingkung dâihlîm hnuaia chîmu insatir ngai pathian ni chongpuia.

²¹A chi diktak, grep ra sa zât angin nang ki phuna, khan en ro, imo ni hong ichang tâk? A thua hmanghmunboi grep hrui angin kêng ni om ta.

²²Chang-al le sabonin irsu khomin lân, ni sualna hnung chu la hmu thei mai ki ti.

²³Porinchein om ma unga, Baal khom chubai mûk viat ma ung, itin mo ni la iti mai hi? Irhôra ni sual dânhai kha enin lân, ni thil thohai kha hmu roh. Rama saringseipui ihura om hrang dân inhre loia an tâna.

²⁴Ramchâra intân lût ang kha ni ni. A’rzukna chu tu mo a dan zoi thei hrang? A chal zongtuhaiin ama zonga sôl ual nang ma, irzui zoro a phâkin chu hmu theiin a om ngai.

²⁵Israel Pathian danghai irzûlin, ni ke insôltir no’n lân, Ni dang khom châr no ri se. Khanchu nangma’n, ‘O ho, kîr thei ta no ning.’ Ram dang pathianhai ki’rngaiinhluhai tâka. Anni ki izuihai hrang a ni,” ni tia.

²⁶RENGPA’N a ti, “Inru khan chel a fâka, hmâimôk a irlâk ngai angin nin rênghai le nin mi lianhai, nin ochaihai le nin deipuhai, Israel mipui nin rêngin nin hmâimôk a ti.

²⁷Thing chu nin pa a nia, lung chu nin nu a ni, nangni a tituhai nin rêngin nin hmâimôk a ti.

²⁸Nin isiam pathianhai kha khôn mo an om? Intakna nin phâk zoroa, an thei ngânin teh nangni san ri sehai. O Juda, ni khopui nei dôr chu pathianhai khom ni inei a ni ta hi te.

²⁹Nin milung chuk loina imo a ini? I lo hranga tehel nin ni izong pe mo?

³⁰Nangni ki sepa, ar fêna reng om maka, nangni siam insa khom phal mak chêia. Kâmkeibaknei ningmur angin nin deipuhai khandai leh nin thathaia.

³¹Israel mihai, ki thu’nsîr nin mikuar lei sung sabak roi. Nangni hrangin ramchâr angin, ramzîng ichiom tak ki lei ini ma ni? Khaang khan a ni’n te, itho mo nin inuamtak nin thoa keima kuang hong kîr tum ta loia nin iom?

³²Dôngmate’n a’rvônahai irnghilin, moiin mo, a’rneina tukrivo a irnghil thei hrang ma ni? Ki mihai rêkin chu tep zoi thei nêka sûn, a tam ual an irnghila.

³³Irdithai irzui dân hi chu ni inhriat infel chu a ni hi. Nupang sual takhai khomin irchûna chu hmu an ti.

³⁴Ni puanhai chu mi inmokhai thisen ni loiin, mi’nriang le sual sin loihai thisen a kop uala. Khannisian hi thilhai tho pumin,

³⁵ite tho’nchâi ma unga; ‘RENGPA chu ki chunga a ning a inmur pe ta loi a ni,’ ni tia. Aniachu, keima RENGPA’N sual sin loi anga nir huang sikin, dûk nang tho ki ti.

³⁶Nam dang pathianhai tiang ni’rnghat tâk sikin, ni hlutna ni inboitir ok a ni ta. Assuria ni’rhnêla nin imualinphoi ang khan. Aigupta chunga ni’rnghat khomin mualinphoi nôk ni ti.

³⁷Inzaka kûnin, Aigupta-a irthokin kîr nôk ni ti. Keima RENGPA’N ni’rnghatnahai ki lei hnôl tâka, annihai ata irthokin ite ar fêpuina hmu no chi ni,” tiin.