Read Hrangkhol JEREMIA 20 Bible Online

JEREMIA 20 - Hrangkhol bible

JEREMIA 20

¹Ochai Pasura, Imera nâipa tempil hruaitutak khan ki thu inpuanghai hi an hriatin chu,

²khanchu, Pasura khan dêipu Jeremia kha a vîka, thîrhrui an buntira, RENGPA in, Benjamina inkhâr sakinta ual kôla khan an tângtira.

³Pasura khan zînga chu, thîrhrui ata a nin sua’n chu a kuang, “RENGPA nir hming chu Pasura ti ta no nihai, ‘Hmun tina ichiom’ nang a iti tâk a ni.

⁴RENGPA ngêtin a iti a ni, ‘Nangma le ni rual danghai hrangin ichiomin nang siam ki ta, an râlhai khandai leh an rêngin thata an iom kha hmu ni ti. Juda mi murdi chu Babulon rêng thuhnuaia ki isia hrang a nia, senkhat chu intângna ina om hrangin a rama hruaipaihai a ta, senkhat chu thathai a ti.

⁵Hi khopui irchongnahai hi, a isua irchon hluhai hi Juda rênghai sum le pâihai khom an râlhai kuta pehai ki ti. Anni’n inmok an ta, la pehai an ta, Babulon tiang tinrêng chôi ving an ti.

⁶Nangma khom Pasur, ni ina om murdi leh suak hrangin nangni hruai an ta, Babulon tiang nangni hruai an ti. Kha khan thi nin ta, phûm ni nin ti,’ nin rualhai minlak thu ni lei ihrilpuihai leh khan,” a tia.

⁷RENGPA, nangin ni ni huanga, ihuang ki ini tâk a ni. Nang chu keima nêkin ni hrâta, ni ni inhnê a ni tâk. Mi tinin an ni phengsana, sûn sôtin an ni inuiso a ni.

⁸Thu ki hril richamin nakhrât thôna le irsiatna irkhêl tak ki khêkpui a nang ngai. RENGPA ni chongbe kin puang sikin zoro tina nuiso le hmûsit ki ni.

⁹RENGPA chu irnghil ki ta, ar hmingin thu hril ta no ning, ki ti lakin ni chongbe chu mei ang rengin ki sûngrîl ata a kâng ngaia, ki sûnga om chian hrangin ki tuma, khannisian ki idan thei loi a ni.

¹⁰Mihai chong set sat kin hriata, “Hmun tina ichi zât irkhêla om ngai! Tho thuneituhai kuang la va hnôl ta rei,” tiin ki rual sahai lua’n kin rîl zoro an inghâk chian a ni; “huang thei duai an ni itinin, khanchu chel ei ta, phuba la ei ta,” an tia.

¹¹Khannisian RENGPA, nangma hrâtna le sinthotheina chu keima tiang ni kopa, deng nin theitirtuhai chu inrîl an ti. Hlo an chuk thei no sikin mualinphoiin om thal an ti. An mualinphoina chu irnghil ni ta no ni.

¹²A ni, itinrêng sinthei RENGPA nangin dik takin nin hriat ngaia, an lungrîl le ngaituanahai om chu nin hriat hleta. Khaangin ki râlhai chunga phuba ni ilâk chu nir hmutir ro, ki chungthu ni kuta om hlet a ni tâk sikin.

¹³RENGPA hrangin hla sak unglân, RENGPA chu inpâk roi! Mi sualhai kuta irthokin sirphûma omhai chu sansuak an ni tâka.

¹⁴Ki suak ni sûn chu khomâksâmin om ri se, ka nu’n a ni nei nî kha satvur ni no ri se!

¹⁵Ka pa kuang, “Nâipasal ni nei tâk,” ti thu khom kha khosâlin om ri se.

¹⁶RENGPA’N khonzâna nei viat loia khopui a insiat ang khan anni chu om ri sehai. Zînga in sûnga chapa khêk inhre sianlân, sûn laitaka irdoina khêk irhâi inhre ri se.

¹⁷Ki’rzir mân a ni lei that no sikin, ni lei that sian chu, ka nu sul kha ki thân lei ni a ta.

¹⁸Itho sika ki irzir ma ni o? Buaina le beidongna le hmâimôkna tuanga hringnun hmang hrang hin ma ni?