Read Hrangkhol JEREMIA 21 Bible Online

JEREMIA 21 - Hrangkhol bible

JEREMIA 21

¹Reng Zedekia’n Malkia nâipa Pasura le Maaseia nâipa ochai Zefania hai chu, hi ngênna leh hin ki kuang a hong tîrhaia:

²“RENGPA chu ngaihoi takin ni chongpui pe ro, Babulon rêng Nebukadnezara le a sipai pâlhaiin khopui an irhual khap tâk sikin, RENGPA’N a sinirkhêl senkhathai tho’n Nebukadnezara chu an hnotsuak khom a ni thei,” tiin.

³Khanchu RENGPA’N a ni chongpuia; khanchu ki kuang hong tîra om mihai kha Zedekia kuanga hril hrangin ki tia,

⁴RENGPA Israelhai Pathianin a iti a ni, “Zedekia, ni sipai pâl Babulon rêng le a sipai pâl doituhai kha, ki indoktirhai hrang a ni. Khopui inlaina taka ni sipaihai râltukfamhai chu ki ibuk hrang a ni.

⁵Keima ngeiin ki bân hrât tak pharin ki ningmurna insua’n nang doi ki ti.

⁶Hi khopuia om mihriam le thilhring le sahai khom thathai ki ta, hripui irkhêl takin thi an ti.

⁷Khan nang chu ni mi lianhai le ni mipui irdoina hmun ata, châm le hripui ata dam suaka la omhai, nin rênga nangni that nuam rêng Nebukadnezara’n nangni that a ti. Mi tukhom khonzâna mo, lungkhamna mo, nin chunga inlangtirin nangni hôi viat no ni. Keima RENGPA hin ki iti a ni,” a tia.

⁸RENGPA’N mipuihai ti pehai hrangin a ni hrila, “Irngai roi, keima RENGPA hin lampui thina intungtir thei le lampui hringna intungtir thei inthang hrang, nangni ki ipêk a ni.

⁹Mi tukhom khopuia om mai chu irdoina mo, châmna’n mo, hri le hrâiin thi an ti. Khan tukhom fe suaka atûna khopui doi maia om Babulon mihai kuanga irpêkhai chu that ni no nihaia, hringna chu inzôk ni a ti.

¹⁰Hi khopui hi hôi loi hrangin lungrîla ki lei iti sai a ni, insiat chit ki lei itum a ni. Babulon rêng kuanga pêk nih a ta, ama’n mei leh a ihâlpai hrang a ni, keima RENGPA hin ki iti tâk a ni,” tiin.

¹¹Juda rêng in sûngkua, Davida irchihai kuang RENGPA’N hi chongbe hi pe hrangin a ni tia, “Keima RENGPA’N ki iti hi irngai roi. A sûn tin diktakin roirêl unglân, mi huanga omtu kha soisak unglân, khano’nchu nin thil tho’nsual kha ki ningmur chu mei that thei loi angin kâng hrang a ni.

¹³Nangma Jerusalem chu phâi laia lungpui irsâng ang hin, phâi irhôr laia irsâng taka om a ni. Nang irdoipui ki ta, tûte’n nang doi thei no nia, nir hrungna hmunhai khêl thei ni no ni, ni tia.

¹⁴Khan ni thil thohai sika khan dûk nang ki itho hrang a ni. Nin rêng in chu mei leh hâl ki ta, a kôla om murdihai khom mei khan kânghai a ti,” ti hi keima RENGPA’N kin iti tâk a ni.