Read Hrangkhol JEREMIA 25 Bible Online

JEREMIA 25 - Hrangkhol bible

JEREMIA 25

¹Josia nâipa Jehoiakima kum minli an lal kuma khan, Juda mi murdihai chungthua chongbe RENGPA kuanga irthokin ki donga. (Kha kha Babulon rêng Nebukadnezara kum khat inlal kum khatna a ni.)

²Juda mi murdi le Jerusalema omhai kuang khan ki ti pehaia,

³“Kum sômhni inthum sûng, Amona nâipa Josia, Judai rama an lal kum sômhleithumna irthokin a vuan sûn ten hin, RENGPA’N ki kuang thu an sîra, kha a iti kha nangni hril loiin om ngai ma ung. Kha kha nin iuksak loi ngai a ni.

⁴RENGPA’N a deipuhai a zuituhai a zuang tîrhai mai ngai khoma chu, irngaiin mo, nin iuksak nuam loi a ni.

⁵RENGPA’N nangni le nin irchibulhaiin nin nei mai hranga nangni a ipêk rama nin om thei maina hrangin, nin sual hringnun le nin thil saloi thohai masan hrangin nangni a ihril ngai a ni.

⁶pathian danghai le nin isiam millimhai chubai mûk loiin, RENGPA ningmur loi hrangin nangni an inhril ngaia. RENGPA thu nin lei izôm ni sianlân chu dûk nangni tho no ni.

⁷Khannisian RENGPA hê irngai mak chêi a tia. Nin millimhai sika khan a ning nin inmurtir pea, a dûk thôna chu nangni ngeiin nin chunga nin intungtir ngai a ni.

⁸“Khasikin a thu irngai nuam mak chêia, RENGPA itinrêng thotheiin a ti.

⁹‘Hmâr tianga mi tinhaiin le a ni zui rêng Nebukadnezara, ki ikoi hrang a ni. Judai ram le a luatuhai le a kôlvêla nam danghai doi hrangin ki hong ihruai hrang a ni. Hi nam le a kôlvêla nam danghai chu insiat chit ki ta, mihai khan ar khêl ti an ta, ar khêl ti ok an ti, kumtuangin an insiat hrang a ni. Keima RENGPA’N ki iti a ni.

¹⁰An raifân le lômnahai le irneina hruaithe inhoihaia irngam ki ta, an meisera thun hrang a tui nei ta no nihaia, bu suk khôl irhâi khom om ta no ni.

¹¹An ram pumpui chu ramin masan ni a ta, mita hmua inlâi thei ni a ti. A kôlvêla nam tinin Babulon ram rêng sin kum sômsari sûng chu tho an ti.

¹²Khahai kha a hek tika chu, Babulon ram le a rêng chu an sual sikin dûk tho ki ti. Kha ram kha insiat ki ta, kumtuanga hrangin ramin siat ta a ti.

¹³Nam tinhai chu vânduaina irkhêl insum hranga irningna chong, Jeremia hmangin ki lei iti, hi lekhabua inchuanga om vânduaina irkhêlhai chu Babulon ram chunga dûk thôna’n nang hmang ki ti.

¹⁴Babulon rama mihai chu an sin thôna ra leh thuanhai ki ta, nam tamtakhai le rêng roiinpuihaiin anni chu suakin siamhai an ti,’ ” a tia.

¹⁵RENGPA Israelhai Pathianin a iti chu, “Hin uain khilât ki ningmurna sip chu a iom a ni. Nang ki itîrna nam tinhai kuang fe’n lân, hi khilât ata hi anni chu in intirhai roh.

¹⁶An ina a ni’n chu pêm an ta; lungrîl bulbâl nei no nihai, an kuang khandai ki tîr hrang sikin,” a tia.

¹⁷Khaang khan khilât kha chu RENGPA kut ata ki lâka, RENGPA’N a ni itîrna namhai kuang khan ki pêka, anni chu ki in intir a ni ta.

¹⁸Jerusalem le Judai ram khopuihai chu, an rênghai le an hruaituhai leh khan ramchâr thil irkhêl inlaina an ni theina hrangin le mihaiin an irhming kha khomâksâmna hranga na hmang theina hrangin, atûn tena an la ihmang ngai ang hin annihai chu hi khilât ata lei in intirhai hi a ni.

¹⁹Hiang hin a ni, khilât rengata a dang la in hranghai irhming chu: Aigupta rêng, a mi lianhai le hruaituhai Aigupta mi murdi le Aigupta ram dang mi murdihai, Uz rama rêng murdihai; Filistia khopuihai, Askelon, Gaza Ekron le zôka la om Asdod-a rênghai an rêngin; Ekron Moab le Amon mi murdihai; Tura le Sidon-ah rênghai an rêngin; Mediteranean tuipui kôla ramhaia rênghai an rêngin; Dedana, Tema le Buza khopuihai; lu ep inkolhai murdi; Arabia rênghai an rêngin; ramchâra om nam irpol rênghai an rêngin; Zimria, Elama le Media rênghai a dônte’n an i-in hrang a ni. Irnêng chunga tu nam khomin hi khilâta irthokin an i-in hrang a ni. A hnungkhôn taka Babulon rama rêng khomin in sa a ti.

²⁷Kha hnung chu RENGPA’N ki kuang, “Keima hi RENGPA itinrêng thothei Israelhai Pathianin mipuihai chu in hrangin thu ki pêk a nih ti inhre roh. An inruia, an inluak mâka le an inrîla, an thoi thei ta no mâka chu in hrangin annihai kuang khandai ki itîr hrang sikin.

²⁸Ni kut ata khilât lâka in hrangin an nuam noa ni’n chu, RENGPA itinrêng thothei khan kha khilât ata kha la in ngêt an tih ti hril roh.

²⁹Ki khopui sûng ngêta hin insiat theina sin chu ki iphut hrang a ni. Dûk tuanga loia zôk hrangin an irtûng ma ni? Zôk no nihai, dengthei ngêt an ti, irnêng chunga mi tin laia irdoina ki tîr hrang sika khan, keima RENGPA itinrêng thotheiin ki iti a ni.

³⁰“Nangma Jeremia hin ki itihai chu ni inpuang hrang a ni, hihai hi mipuihai ni ihrilhai ngêt hrang chu a ni, ‘RENGPA chu irvân ata khêk a ta, irvân hmun irsângna ata irthokin a hnuk insua a ta. A mihai doiin khêk a ta, mi grep ra chîltu angin khêk suak a ti. Irnênga mi tinin inhria an ta,

³¹an irhâi intông kha kôlkil dên chit a ti. RENGPA namhai doiin thubuai a neia, mi tinhai rêl infelhai hrangin hong hruaihai a ta, mi pualoihai chu thi hrangin rêl ni a ti,’ ti hi RENGPA’N a iti a ni,” a tia.

³²RENGPA’N a iti chu ram inkhat chung ata nam dang chunga vânduaina irkhêl a hong tung thiaia, rua le phâivua kôlkil ata a hong irthok mai a ni.

³³Kha nikhuaa khan chu RENGPA’N a ithathai ruak chu irnêng kil khat tianga irthokin kil dang tiang dênin irthek chit an ti. Tukhomin annihai kha a châ hrang om no nihaia; phûm hrang khomin chôi ni no nihai. Irnêng chunga khan sahrok sahrâi angin om rak an ti.

³⁴Khasikin hruaituhai chap roi, nangni ki mi belrapuhai, chap inring roi! Beidongin pil kâra inhlum roi. Thata nin om hrang zoro chu a hong nâi ta, kêlbelrachalhai angin irchan ni ta nin ti.

³⁵Nin ta hrangin zôkna lampui om no ni.

³⁷A ningmurin RENGPA’N ni nam le ram hoitaka omhai kha inramin insiat an ni sikin, lungzîngin khêk suak ta roi.

³⁸RENGPA’N a mihai chu kâmkeibaknei, a khur mâk angin, masan a ta; irdoina sikin ichiomnahai le RENGPA ningmur irkhêl khan ram sa kha ramchâr an changtir ta.