Read Hrangkhol JEREMIA 28 Bible Online

JEREMIA 28 - Hrangkhol bible

JEREMIA 28

¹Kha kum ngêta khan Judai rama rêng Zedekia an lal kum minli tha ringana khan, Hanania, Azura nâipa Gibeona khua ata deipu khan tempila a ni chongpuia. Ochaihai le mipuihai inhriatin,

²RENGPA Itinrêng thothei, Israelhai Pathianin a ti a ni: “Babulon rêng thuneina chu kin tômtira,

³Babulon rêng Nebukadnezara’n tempil neinun a ichôi murdihai chu kum hni sûng, hi hmuna hin hong chôi zoi nôk ki ti.

⁴Judahai rêng Jehoiakina, Jehoiakima nâipa le Juda mipui sala intâng Babulon-a fe murdihai khom, hi hmuna hin hruai kîrhai nôk ving ki ti. A ni, Babulon rêng thuneina chu ki intômtir hrang a ni. Keima RENGPA hin ki iti a ni,” tiin.

⁵Ochaihai le tempila mipui omhai laia Hanania kuang hiang hin ki hrila,

⁶“Inhre mai hranga sa chu a ni. RENGPA’N tho a tih ti ki iam. Ni leihrilna chu a tak changin Babulon rama neinunhai chôia omhai le mipui sala hruaia omhai khom hong chôiin, hong hruai kîrhai a ti, ki iiam ngit a ni.

⁷Khan nangma le mipuihai kuanga ki itih hi irngai roh.

⁸Tianlai ata nangma le keima suak nama irthokin deipuhaiin irdoina, châmna le hri le hrâi, nam tamtak le rêng ram roiinpui takhai chunga a itung hrang a ni, an ti ngaia.

⁹Khan, deipu râl irngamna irthoktu khan a thu insîr tung hrang vai kêng, RENGPA itîr ngêt deipua ipom a ni ngai,” tiin ki hrila.

¹⁰Khanchu Hanania’n ki ringa ringkol kha a lâka, an khiakpaia,

¹¹mipuihai inhriatin a tia, “RENGPA’N hiang tak hin rêng Nebukadnezara’n nam tinhai ringa ringkol a inpêltirhai chu inkhiak ving ni a ti, ti a ni. Hi hi kum hni sûnga a itho hrang chu a ni,” a tia. Khanchu ki rota.

¹²Zoro sôt loite hnunga chu RENGPA’N ki kuang,

¹³Hanania kuanga fea ti pe hrangin a ni hrila, “Thinga sin ringkol chu nin siat khom a ni thei, khan khomin thîr ringkolin thûl nôk a ti, a iti a ni.

¹⁴RENGPA Itinrêng thothei, Israelhai Pathianin a iti a ni, ‘Hi nam tinhai chunga hin thîr ringkol ama’n inpêltirhai a ta, anni khan Babulon rama rêng Nebukadnezara sin tho an ti. Ramsahai ten khomin Nebukadnezara sin tho an ti,’ tiin RENGPA’N a iti a ni,” a tia.

¹⁵Khanchu kha thu kha Hanania kin hrila, a kuanga a iti pe nasan, “Hanania inhre ro, RENGPA’N nang a itîr ni maka, hi mipuihai hi thudik loi ni in-iamtirhai a ni.

¹⁶Khasikin RENGPA khan nang a ithat hrang a ni. RENGPA doia mipuihai tehel nin zongtirhai sikin, hi kum sûnga ngêt hin thi ni ti,” tiin.

¹⁷Hanania chu kha kum ngêta khan a tha sarina khan chu a thi tâka.