Read Hrangkhol JEREMIA 29 Bible Online

JEREMIA 29 - Hrangkhol bible

JEREMIA 29

¹Babulon rêng Nebukadnezara’n Jerusalema irthokin Babulon rama mi intânghai hruaitu ochaihai, deipuhai, mipui hruaituhai le mi danghai kuanga lekha ki thona.

²Kha kha Juda rêng Jehoakina le a nu, rêngin a mi lianhai, Judai ram le Jerusalema hruaituhai, kutsin theihai le thîrsuk theihai intângna ata hruaisuaka an om zoia a ni.

³Juda rêng Zedekia’n Babulon rêng Nebukadnezara kuang mi a tîra, Safana nâipa Elasa le Hilkia nâipa Gemaria hai kuta khan kha lekha kha ki ithon a ni. Hiang hin,

⁴“RENGPA Itinrêng thothei, Israelhai Pathianin, mi tin Jerusalema irthoka Babulon rama mi intâng inhni hranga Nebukadnezara ihruai hranga a iphalhai kuanga iti a ni.

⁵‘In sin unglân, nin omhmun indet roi. Irhuanhai sin unglân, khataka nin invânghai kha fa roi.

⁶Nin nâipasalhai hrang dôngma zong pehai unglân, nin nâinuhai hrang khom pasal inneitirhai roi, khan kêng anni khomin nâipasalhai le nâinupanghai an inei thei hrang. A tôm tiang ni loiin nin inpung ngêt hrang a ni.

⁷Sala nangni ki inomtirna khopuihai satna hrang sin tho roi. An ta hrangin chongchai pehai sa roi, an vângsak theina chu nangni vângsak theina ni sa a ti.

⁸Keima RENGPA Israelhai Pathian ngei hin nin laia om deipuhai mo, mi dang zoro la hong hranga leihril theina neia irbêhai huangin om no roi, ti nangni ki ihril a ni. Irmang an iphanhai kha ngaisak pehai no roi.

⁹Ki’rhmingin thu dik loi nangni an ihril a ni, anni chu tîrhai ma ung. Keima RENGPA Pathianin, ki iti a ni ta,’ tiin.

¹⁰“Khan RENGPA’N, ‘Babulon rama kum sômsari a hekin chu, nangni ngaisaka, in tianga nangni hruai kîr nôk hranga ki chonginkung thangsua ki ti.

¹¹Keima vaiin nin ta hranga thil tum kin hriata, vânduaina irkhêl ni loia vângsak theina nangni intungtir pe hranga thil tumhai, nin itûng tak nin matona a la zuang hranga nin thiltumhai chu.

¹²Khanchu ki’rhming irlam nin ta, ki kuanga hongin chongchai nin ta, nangni sâm ki ti.

¹³Ni zong nin ta, nin ni zong tatak sikin ni hmu nin ta,

¹⁴a dik ki iti a ni, ni hmu nin ta, nin rama khan nangni inomtir nôk ki ti. Ram tina irthokin le nangni kin thekindarna hmun tina irthokin nangni bûm nôk ki ta, sala intâng hranga nangni ki lei inhnotsuakna rama ngêt khan nangni hruai kîr nôk ki ti. Keima RENGPA’N ki iti a ni,’ tiin.

¹⁵“Nangni’n RENGPA’N Babulon rama khom deipuhaiin an ni ipêk nin ti ngaia.

¹⁶RENGPA’N rêng ram Davida lei inlalna ngai, rêng le hi khopuia nin urênga nangni le hmunkhata om hrangin hruaia om loihai chungthu a insîr hi irngai roi.

¹⁷RENGPA Itinrêng thotheiin a ti, ‘Khandaiin, châmin, hri le hrâi an chunga ki insum hrang a ni, theipui ra fa hranga a thûr angin siam ki ta,

¹⁸anni chu khandai, châm le hri le hrâihai leh irzûlhai ki ta, rammual nam tin chu an thil hmu chu an ichi sabak hrang a ni. Anni kin thekindarna hmun tina, an chunga thil tung sika khan, mihriamhai inlâiin chi sabak an ti. Mihaiin anni chu hnung songsanhai an ta, an irhming kha khomâksâmna’n hmang an ti.

¹⁹A ni zui ki deipuhai hmanga an kuanga chongbe ki ithon ngai, an zôm no sika khan, hi hi an chunga a itung hrang a ni, an irngai nuam no sikin.

²⁰Babulon rama intâng hranga nangni ki itîrhai, nin rêngin keima RENGPA’N ki insîr hi irngai roi,’ a tia.

²¹RENGPA Itinrêng thothei, Israelhai Pathianin, Kolaia nâipa Ahaba le Maaseia nâipa Zedekia, a’rhminga milak chong inpuang ngaihai chungthu an sîra. Anni chu Babulon rama rêng Nebukadnezara thuneina inhlan an ta, an mithmu chunga ngêt that an ti, a iti a ni.

²²Khanchu Jerusalema irthokin Babulon ram tianga kop hranga hruaia omhai khan mi khomâksâm an nuamin chu, ‘Zedekia le Ahaba, Babulon rêngin a hring puma mei leh a ihâl ang khan, RENGPA’N ni chunga tho sa ri se,’ ti ngai an ti.

²³Kha kha an ihlo hrang chu a ni. Sual irkhêlhai an tho’n chu, an tualbômhai dôngma an uirepuihaiin chu, RENGPA irhmingin thudik loi an hril sikin, kha kha RENGPA nuam loi lam a nia; an sintho kha an hriata, annihai hnôla thu inhretu a ni. RENGPA’N a iti a ni,” tiin.

²⁴Nehelam mi, Semaia kuang hiang hin thu hril roh:

²⁵Israelhai Pathian Itinrêng thotheitu RENGPA’N hiang hin a ti, “Jerusalem mipui murdihai kuang, Maaseia nâipa Zefania, ochai kuang, ochai danghai kuang khom nangma irhmingin lekha ni thona, hiang hin ni tia.

²⁶Nang Zefania RENGPA’N ochai Jehoiada irthûlin nang an kung, RENGPA ina a tataka thu inpuanghai kha sâm ro, thîr khitna leh khit hranga inkung ni nia,

²⁷atûn hin Jeremia, Anathot kho mi nin kuang thu inpuangtu hi ithoa mo ni irchutir loi?

²⁸Babulon-a omhai chu, sal intângna a isôt hrang kêng, in le loihai sinsiam unglân, irhuanhai khom siam unglân, nin chîmuhai fa roi, tia thu a bêhai hi,” tiin.

²⁹Ochai Zefania’n hi lekha hi deipu Jeremia inhriat hrangin a tepa.

³⁰RENGPA thu chu Jeremia kuang hiang hin a hong tunga:

³¹“Hi hi sal intânghai hrilhai ro: RENGPA’N Nehelam mi Zefania chungchâng hiang hin a hril; Semaia hin nin kuang thu a hrila, ama chu ki itîr ni ma, minlak nangni a in-iamtir a ni.

³²Khasikin RENGPA’N hiang hin a ti, Nehelam mi Semaia le ar chihai chu hremhai ki ti, nin laia irchi inkhat lua nei no ni, ki mihai hranga thil sa ki itho hrang khom chang sa thei no ni, RENGPA ata tehelna thu an puang sikin, ti hi RENGPA thu suak a ni,” a tia.