Read Hrangkhol JEREMIA 3 Bible Online

JEREMIA 3 - Hrangkhol bible

JEREMIA 3

¹RENGPA’N a ti, “Mi’n a dôngma leh teihai sianlân, a dôngma khan mâkin pasal dang nei sianlân, kha nupang kha hruai kîr nôk thei ni no ni. A ram pumpui a iporinchetir zoi hrang a ni. Khan Israel nang chu indit tamtak ni neia, atûn keima kuang hong kîr ni nuama!

²Tâng sîphai khi hong thîr ngân ta, notizuar anga ni om loina mo a om? Arab-haiin ramchâra mi an inruang ngai ang khan, ni indithai chu lampui tuana ni inghâk ngai angin, ni notizuarna le ni pualoinahaiin ram chu ni iporinchetir zoi a ni ta.

³Annihai tak sika hin kêng rua tho maka, rotui hnungkhôn khom a itho ta loi a ni. Kha tena khom khan notizuar ni la hmang maia. Inzakin ni biang sen zel suak maka.

⁴Nang chu ka pa, nâipangte ki ni lai ata lung ni ni thunga.

⁵Ni ning chu inmur mai no nia, ni ningmur chu ki chunga kumtuangin om no nia, tiin Israel hiang hin ni iti a nia. Khanchu sual tinrêng ni tho thei dôr ni la itho mai a ni,” tiin.

⁶Josia rêng chang laiin RENGPA’N ki kuang, “Nupang iamom loi Israel sintho kha ni lei hmu mo? Ki kuang ata tâng irsâng tui chunga le thing hring kung hnuaihai khan notizuar sin ni itho ngai a ni.

⁷Hihai murdi hi a tho zoi tena ki kuang hong kîr nôk ngêt a ti, ki lei tûnga. Khannisian hong kîr maka. A zuarpuinu Juda, mi iamom loi khomin thil omdânhai a lei hmu vinga.

⁸Kha Juda khom khan notizuar a chang tâk sika khan Israel kha ki mâka, ki irzûl dân kha a hmua. Khan, Israel zuarpuinu iamom loi Juda khan ki zui ngai chu ti maka. Ama kha notizuarin ar siama,

⁹a inzak viat loi a ni. Ram chu a porinchetira, lunghai le thingkunghai chubai mûkin a isiatpuihai a ni.

¹⁰Hihai zoia hin Israel zuarpuinu, iamom loi Juda chu tumna diktakin ki kuang hong kîr tum loiin tumna milak thoa hong kîr tumin,” keima RENGPA’N ki iti a ni ta.

¹¹RENGPA’N a hrila, “Israela’n ama hnung song ta sian khom, iamom loi Juda nêkin chu a sa ual iti a inlangtir a ni,” tiin.

¹²Israel kuang fe hrangin a nin hrila, keima kuang, “Iamom loi Israel ki kuang hong kîr nôk roh. Kei chu khonzâna sip ki nia, ki ninginmur no ni, kumtuangin ninginmurtir mai no ning.

¹³Ni itho insual a nih ti le RENGPA ni Pathian chunga ni tehel a nih ti inlang roh. Thingkung hringhai hnuaia nam dang pathianhai lung ni la thung maia, ki thupêk ni izôm loi dânhai irphuang suak ta ro, Keima RENGPA’N ki iti a ni.

¹⁴Iamom loi mihai hong kîr roi, ki nuchahai kêng nin ni, khopui tina irthokin inkhat lua, nam tina irthokin inhni lua nangni inthang suak ki ta, Zion tânga nangni hruai intung ki ti.

¹⁵Ki thu zôm roirêltuhai nangni pe ki ta, anni khan vârna le inhriatthiamna nangni rêl an ti.

¹⁶Kha rama khan nin hong pung tena chu, mihaiin ki Thuthung Bôm chungchâng thu sâm ta no nihaia, ngaitua lua ngaitua ta no nihai, an hriat lua inhre ta no nihai; a nang khom nang ta loi, a dang khom siam ual ta no nihai.

¹⁷Kha zoro kha a tung tena chu, Jerusalem chu ‘RENGPA rêngtoihmuna’ bê ni a ta, nam tinrêngin kha khan chubai ni mûk an ti. An lungrîl sual le sêtin tho hranga a ihril kha tho ta no nihai.

¹⁸Kha nî khan chu Israel le Juda irzomna ata hmâr tianga sal intângna ram ata hongin an idongtum dettak ni hrangin nin irchibulhai ki ipêkna rama hong kîr an ti,” tiin.

¹⁹RENGPA’N a tia, “Israel ram milung chuk om, rammual pumpui sûnga ram hoitak nang pe hrangin, ki nâi hrangin nang ki inuam a nia, ‘Ka pa,’ tiin a ni koia. Ki kuanga irthokin a dang tiang tehelzong ta loi hrangin, Nang ki inuam a ni.

²⁰Khan iamom loi dôngma ang taka, ki ta hrangin iamomin lei om ngai mak chea,” ti hi keima RENGPA’N ki iti a ni.

²¹Tâng sîp ata irhâi inhriat a nia, Israelhai chap irhâi le an ni ingênna irhâi, sualnaa sip hringnun an hmanga, RENGPA an Pathian an irnghil tâk sika a ni.

²²RENGPA hnung song sanhai murdi, nin rêngin hong kîr nôk ving roi; nangni len damtir a ta, iamomin nangni siam a ti. Nangni’n, “A dik RENGPA tianga kin ihong hi, Ama kha kin Pathian a ni sikin.

²³Tâng sîpa kin millim chubai mûkhai khan ni sâm thei viat mahai. Israelhai hranga changpuina chu RENGPA kin Pathian kuanga irthokin a izuang hrang a ni.

²⁴Khannisian kin chîn lai ata kin pahai sin sôlna ra, kêlbelra pâl, sehrât pâl, nâipasalhai le nâinupanghai lua khom hi Baal inzakpui om pathian chubai mûk sikin kin inchânhai zoi tâka.

²⁵Inzakin zâl kin ta, kin mualinphoina hin nir khû ri se. Keini le kin irchibulhai hin RENGPA kin Pathian chunga kin len sual ta ngai sikin, a thupêkhai zôm pe ngai ma ung,” nin tia.