Read Hrangkhol JEREMIA 32 Bible Online

JEREMIA 32 - Hrangkhol bible

JEREMIA 32

¹Judahai rêng Zedekia an lal kum sômna khan RENGPA’N a ni chongpuia, kha kha Nebukadnezara khomin Babulon rama an lal kum sômhleiriatna a ni.

²Kha zoro taka khan Babulon rama rêngin Jerusalem a hong doia, kei chu rêng in hrungtuhai omna hmuna intâng ki ni.

³Kha hmuna khan rêng Zedekia’n a ni intângtir a nia, RENGPA’N a iti a ni, “Hi khopui hi Babulon ram rêng ki ipêk hrang a ni,

⁴rêng Zedekia chu a izôk loi hrang a ni. Ama chu Babulon rama rêng kuta pêk ni a ta; ama chu hmâiirsongin chongpui a ti.

⁵Zedekia chu Babulon rama hruaiin om a ta, ki ngaitua nôk mâka chu khatak khan om a ti. Babulon rama mihai chu irsualpuiin om tahai sian khom, hlohchuk no nihai. RENGPA thu suakin a ti,” a tia.

⁶RENGPA’N hiang hin a ti, RENGPA thu chu ki kuang a hong tunga;

⁷Hananela ka pa nâipangpa Saluma nâipa chu Anathot loia, Benjamina ramria om chu ircho pe hrangin a ni ngêna, ki kuanga hong hrang a nia, urêng laia a irnaipui tak ki ni sikin ircho hrangin ircham ki inei a ni.

⁸Khaangin, RENGPA iti lam tak khan, Hananela chu irhuan hrungtu sûnga keima kuang a honga, a loi kha ircho pe hrang a ni tia. Khanchu RENGPA’N a ni iti pe ngêt a nih ti kin hriat tâka.

⁹Hananela kuang ata loi kha ki’rchôka, a man hrangin sum ki vara, tangka sekel sômhleiriat a nia,

¹⁰irchôkna ngai lekhaa khan ki’rhming ki’rziaka, ki’rmantira, an hriatpuitu ki zonga, khanchu sum kha a varna leh ki vara.

¹¹Khanchu irchôkna lekha poimo keima ta inhni ki lâka, ram irpêkna dân chuangna a nia, inkhat irmantir a nia, a dang chu irman loi a ni.

¹²Neria nâipa Baruka, Maaseia tupa kut chunga ki pêka. Kha lekhahai kha Hananela mithmua le an hriatpuitu irchôkna lekha poimoa irhming irziaktuhai le irhuan hrungtu, Juda a toihai mithmua khan ki ipêk a ni.

¹³An rênga makunga khan Baruka kha ki ti pea,

¹⁴“RENGPA Itinrêng thothei, Pathianin hi ram hi ircho hrang dân irsinsiana irmantir le irman loi hi lâka, kum sôt tak la hong om hranga khom hin sataka a om mai theina hrangin pil bêla hrê hrangin thu nang a ipêk a ni.

¹⁵RENGPA, itinrêng thothei, Israelhai Pathianin a iti chu, inhai, loihai le grep irhuanhai chu hi rama hin irchôk la ni nôk a ti,” a tia.

¹⁶Ram irchôkna lekha poimo Baruka ki pêk zoia khan ki chongchai tâka,

¹⁷“RENGPA PATHIAN, ni thuneina lian tak le ni hrâtna’n irnêng le irvân ni isiam a nia; nangma hrangin chu thil intak zel om maka.

¹⁸Sâng tamtakhaia det lungkhamna nin neitirhaia, khan an pahai sualna sikin, mihai dûk ni tho sa ngai. Nang chu roiinpui le sin thothei tak Pathian ni nia; nang chu RENGPA Itinrêng thothei ni ni.

¹⁹Nang chu roirêlna satakhai nir fûkin thil roiinpuihai ni tho ngaia, mihai sintho hi ni hmu vinga, an sintho lam takin lômman ni pêk ngai.

²⁰Zoro fe tâk, tiana khan Aigupta rama sinirkhêl le irsinsiana thilhai ni thoa, a vuan sûn ten hin Israel rama le nam danghai laia ni la tho maia, khaangin atûn hmun tina inhriatin ni iom a ni ta.

²¹Sinirkhêlhai le irsinsiana thilhai hmangin kin râlhai nin thotira, ni mihai Aigupta rama irthokin hruaisuak hrangin ni sintho theina le ni’rnak ni ihmang a ni.

²²An irchibulhai kuang chong ni lei inkung ang lam takin hi ram irchong le sa hi anni ni pêka.

²³Khannisian hi rama hin honga an lua tena chu, ni thupêkhai zômin mo, ni irchutirnahai ite an izôm loi a ni. Khasika khan an chunga hi vânduaina tin hi ni insum a ni ta.

²⁴“Babulon khopui la hrangin a vêla khan irnêng an vur irsânga, an irûn a ni ta. Khandai, châm le hri le hrâiin khopui chu an kuta a iom hrang a ni ta. Ni lei iti murdihai a idik a nih ti hmu thei ta an ti.

²⁵Khan khoma RENGPA Pathian khopui chu Babulon-hai kuta chelin om ta khom sian, an hriatpuituhai mithmua ram ircho hranga thu ni pêktu kha nangma hi ni nia,” tiin.

²⁶RENGPA thu chu Jeremia kuang hiang hin a zuang tunga,

²⁷“Irngai ro, keima hi RENGPA mi murdihai Pathian ki ni, keima hrangin chu thil ite an tak bâk om mah.

²⁸Hi khopui hi rêng Nebukadnezara le a sipaihai kuta ki ipêk hrang a nia,

²⁹an ihâl hrang a ni, in chung sîpa mihaiin Baal hranga rimhoi hâlin le pathian danghai kuang uain thilinhlan dêngzuana ki ning an inmurtir ngai rêng kha.

³⁰Israel mihai le Juda mihai chu an thurchi hor phutna ata an sintho khan ki milung hoi loiin ki ning an inmurtir ngai a ni.

³¹Hi khopuia mihai hin, an ding nî a ta ki ning an inmurtir a ni. Hi khopui hi insiat chit hrangin ki rêl tâka,

³²thil saloihai Judai ram le Jerusalem mihai, an rênghai, hruaituhai, an ochaihai le deipuhai an rênga thôna sikin.

³³Hnung an ni songsan ving tâka; anni chu ki irchuhai mai khomin, irngaiin, pom nuam mahai.

³⁴An millim intirom tak lua keima ni chongpuina hranga isin, ki tempil sûnga an siaa, an iporinchetir a ni ta.

³⁵Hinom phâia an nâipasalhai le nâinupanghai Moleka pathian kuang irbôlnaa inhlan hrangin Baal maichâmhai an siama, hianga tho hrangin thu khom pehai ma unga, khaanga thil tho an ta, Juda mipuihai sualin siam an tih ti khom ki irngaitua loi a ni,” a tia.

³⁶RENGPA, Israelhai Pathianin hiang hin a ti, “Jeremia mihaiin khandai, châm le hri le hrâihai sikin hi khopui hi Babulon rama rêng kuta ipêk a ini hrang a ni, a tia.

³⁷Ki ningmur hrai sika ki inthekindartirna rama irthokin mihai chu ki ibûmhai nôk hrang a nia, anni chu hong hruaihai nôk ki ta, hi hmuna hin zôkriamin inlêngtirhai ki ti.

³⁸Khanchu ki mihai ni an ta, keima an Pathian ni ki ti.

³⁹An dam sûnga hrang sintum inkhat pehai ki ti: an ta hranga sa hrang le an irchi suanpârhai ta hranga sa, zoro tina ni chôiirsâng hrangin.

⁴⁰Kumtuanga thuthung siampuihai ki ti. Itiklai khoma anni ta hranga thil sa tho irngam pehai no ninga, lungrîl taka ni ngîk hrangin siamhai ki ta, khanchu hnung ni songsan ngai no nihai.

⁴¹Thil sa an ta hranga tho chu raifân om sinin nei ki ta, hi rama hin det mai hrangin indinghai ki ti.

⁴²“Hi mihai chunga vânduaina irkhêl ki lei insum tâk angin, thil sa ki inkunghai chu ki ipêkhai hrang a ni.

⁴³Mihaiin, hi ram hi ramchâra mihriam mo, ramsahai mo om loina hmun anga ni hrangin, Babulon-hai kuta pêkin la om a ti, an tia. Khan loi hmunhai chu hi rama hin irchôkin an la iom nôk hrang a ni.

⁴⁴Mi’n ircho an ta, irchôkna lekhahai siam an ta; irmantir an ta, an hriatpuitu om an ti. Benjamina ram huala Jerusalem kôlvêla khuahai, Judai ram khopuihaia, tâng kôlhaia le Judai ram sim tiang, hi hi a itung hrang chu a ni. Mihai chu an rama siam insa pehai nôk ki ti. Keima RENGPA’N ki iti a ni,” a tia.