Read Hrangkhol JEREMIA 33 Bible Online

JEREMIA 33 - Hrangkhol bible

JEREMIA 33

¹RENGPA chongbe chu hrungtuhai irhuan sûnga mi intâng ki ni lai khan a zuang tunga.

²RENGPA’N irnêng siama, RENGPA, an ngîrtirtu le an dettirtu RENGPA ar hming RENGPA khan hiang hin a ti.

³“Ni koiin lân, nang sâm ki ti; ni inhriat ngai loi thil roiinpui le irthup tak nang inhril ki ti.

⁴Keima, RENGPA Israelhai Pathianin ki iti a ni, Jerusalema inhai le Juda rêng inhai chu isetpai ni a ti. Fesuaka Babulon-haiin khopui irkulna hranga irnêng an ibuk va sia kha chu itea hmangna boi a ni. Kha sin khan ki ningmura ki ithathai hrang rêng ruakhai vai kha khopui a isip hrang a ni. Hi khopui hi a sûnga mihai sual sinthohai sika khan hnung ki isongsan a ni tâka.

⁶Khannisian hi khopui le a mihai chu indam nôk ki ti, hrisêl takin sehai nôk ki ta, khanchu an kuang thudik le irtharngamna tamtak chu inlangtir sa ki ti.

⁷Juda le Israel chu tuanintungin siamhai ki ta, matona an iom ang khan indinghai nôk ki ti.

⁸Ki chunga an lei insualna ata kha thârhai ki ta, an sualhai le an tehelzong ngai kha inzâhai ta ki ti.

⁹Jerusalem chu keima hrangin raifânna, chôiirsângna le songinruk ni a ta; Jerusalem mihai ta hrangin thil sa ki ithohai le khopui chunga vângsakna ki insum thu an lei inhriat tena chu, rammuala nam tinin chipumin an inthing hrang a ni,” a tia.

¹⁰Khan RENGPA’N, “Mipuihaiin hi hmun hi mihriam le ramsahai om loina ramchâr hmun ang chu a ni, an tia; a ni, an ihril indik kêng, a rong ving tâka, khataka khan mihriamhai le ramsahai khom om mahai. Khannisianlân hi hmunhaia hin inhre nôk ni ti,

¹¹raifânna le lômna khêk irhâihai le irneina hruaithe lômna irhâihai chu lan hre nôk nin ti. Mipuihai chu lômthu hrilna irbôlnahai ki biakbuka hong chôia, hi hla hi an sak lan hria nin ti. ‘Sipaihai RENGPA kuang lômthu hril roi, ama chu a saa, a lungkhamna chu kumkhontuangin a om hrang a ni sikin,’ ti hi. Hi ram hi matona tuanintung taka a iom ang khan siam nôk ki ti, kei RENGPA hin ki iti a ni,” a tia.

¹²Khan RENGPA Itinrêngthothei khan, “Ramchâr anga mihriam mo, sahai om loina, hi rama hin belrapuhaiin an belrahai vâina hrang sûlhring hong mông nôk a ti.

¹³Tâng ram khua lianhai tâng kôlhaia le sim tianga Judai rama, Benjamina ram irkul sûnga, Jerusalem kôlvêla khua chînhai, Judai rama khua lianhai belrapuhaiin an belrahai la tep nôk an ti. Keima RENGPA’N ki iti a ni,” a tia.

¹⁴Khan RENGPA’N, “Israel in sûngkua le Juda in sûngkuahai laia ki chonginkung kin tungna hrang nikhua chu a hong nâi thiai ta a ni.

¹⁵Kha tena chu Davida irchi fel tak kha rêng hrangin inthang ki ta, kha rêng khan a ram pumpui huapin a dikna le felna chu insua a ti.

¹⁶Juda mihai le Jerusalem mihai chu sansuak ni an ta, zôkriamin om ta an ti. Khopui chu ‘RENGPA EI SANINHRINGNA’ tia koi ni a ti.

¹⁷Keima, RENGPA ngêtin chonginkungin Davida irchia mi Israelhai rêng hrangin om mai a ta,

¹⁸khante ki sintho hrang le hâlirvôm thilpêkhai, chîmu thilpêkhai le irbôlnahai inhlan hrangin, Levi irchi ata ochaihai om mai an ti,” a tia.

¹⁹Khan RENGPA khan ki kuang,

²⁰“Sûn le zânhai kuang thuthung ki isiam a nia, a zoro taka a om theina hranga a nia, kha thuthung kha indanglamtir thei loi a ni.

²¹Khaangin, rêng chang hrang irchi nei mai a ti, tia Davida kuanga ki thuthung le Levi irchi ochaihai laia ki sin an itho mai hrang a nih ti thuthung ki isiampui; kha thuthunghai kha indanglam ni thei no ni.

²²A ni zui Davida irchihai le Levi nam ata ochaihai chu ki inpunghai hrang a ni. Irvâna ârsihai mo, tuipui kôla chiaihai khom tep zoi loi an ini angin, anni khom an ni theina hrangin,” a tia.

²³Khan RENGPA’N ki kuang,

²⁴“Mihaiin ki inthang, in sûngkua inhnihai Israel le Juda ki ihnôlhai ang khan an lei insîr hi nin hriat ngai mo? Khasikin ki mihai chu hmûsit takin an ni ena, nam ang khomin an ni ibe loi a ni.

²⁵Khannisian keima RENGPA hin sûn le zân kuang thuthung ki siama, irnêng le irvân fena hrang dânhai ki irfûktir a ni.

²⁶Hihai hi ki sin a ini angin Jakoba irchihai le a ni zui Davida le ki thuthung chu hlo ki inchuktir hrang a ni. Abrahama, Isaka le Jakoba irchihai chunga roirêl hrangin, Davida irchihai laia irthokin inkhat khôk inthang ki ti. Ki mihai chunga khonzâna nei ki ta, anni chu vângsakna siamhai nôk ki ti,” a tia.