Read Hrangkhol JEREMIA 37 Bible Online

JEREMIA 37 - Hrangkhol bible

JEREMIA 37

¹Babulon rama rêng, Nebukadnezara’n Josia nâipa Zedekia chu Jehoiakima nâipa Konia irthûlin Judai rama rêngin a siama.

²Khan Zedekia’n mo, a mi lianhaiin mo, mipuihai khomin RENGPA chongbe ni pêk kha an izôm loi a ni.

³Reng Zedekia Selemia nâipa Jehukala le Maaseia nâipa ochai Zefania chu a nam pumpui irthûlin RENGPA’N kin Pathian kuang chongchai hranga ngênin a hong tîra.

⁴Intângna ina khum la ni ma unga, mipui laia zalên takin ki la om thei lai tak a ni.

⁵Babulon sipai pâlhai khan Jerusalem chu an ihualkhak a nia, khan Aigupta sipai pâl Aigupta ramri an hong khêl tah ti an inhriatin chu, an hnung tiang an kîr nôk tâka.

⁶Khanchu RENGPA Israelhai Pathianin Zedekia kuang ti pe hrangin,

⁷a nin hrila, “Aigupta ram sipai pâl nang san hrangin an ihong mai a nia, khanchu in tiang kîr nôk a ti.

⁸Khanchu Babulon-hai hong kîr nôk an ta, khopui doi an ta, la an ta, an ihâl insiat hrang a ni.

⁹Babulon-hai hong kîr no nih tia nin binga irhuang loi hrangin keima RENGPA’N irningna chong nangni ki ipêk a ni, a san chu an hong kîr nôk hrang sikin.

¹⁰Babulon sipai pâl inhnê ving khom unglân, a pophai vai mâkin, an puan in sûnga zâl khomhai sian, kha mihai kha la thoi an ta, hi khopui hi a ihâl insiat ving hrang a ni,” a tia.

¹¹Aigupta rama sipai pâl an hong nâi sikin Babulon ram sipai pâl khan Jerusalem an imâk a ni.

¹²Khaangin in sûngkua irchon ata ki dongtum la hrangin, Jerusalem mâkin, Benjamina ram huala ki fea.

¹³Khan Benjamina kotsua ki tungin chu, khataka hrungtu sipai ulianpu ar hming Irija, Selemia nâipa Hanania tupa khan a ni lei dana, “Babulon-hai kuanga rot ni itum a ni,” a tia.

¹⁴Khan keima’n, “Khaang khan ni ma, rot tum ma ung,” ki tia. Khan Irija khan ki thu insîr kha pom nuam maka, a ni chela ulianhai kuang a ni hruaia.

¹⁵Ki chunga ningmur an lâka, ni vîk hrangin le a intângna ina an ihmang pe roirêl ziaktu Jonathana ina ni khum hrangin thupêk an insuaa.

¹⁶Irnêng rîl tentana thun ki nia, kha khan sûn tamtak siain ki iom a ni.

¹⁷Inhnung tiang chu rêng Zedekia’n a ni koia, dâihrekin rêng ina khan, “RENGPAA irthokin chongbe mo a nei?” tiin a nir dona. “A om,” tiin ki sâma. Khan, nang hi “Babulon rama rêng kuang pêkin om ni ti,” ki ti pe saa.

¹⁸Khanchu keima’n, “I mani, ni chunga mo, ni mi lianhai chunga mo, aninole ni mihai chunga tho’nchâina ki nei mo, intângna ina khum ki ichukna hi?

¹⁹Babulon rama rêngin, nangma mo, ni ram doi no nih tia nang hril ngai, ni deipuhai imo an ichang zoi ta?

²⁰Khasikin atûn ka pu inlal tak, ki chong irngaia ki ititak tho hrangin nang ki ingên a ni. Ngaihoi takin Jonathana ina intângna ina khan chu ni tîr no ro, ni ni tîr nôkin chu, khatak khan ki ithi ngêt hrang a ni,” ki tia.

²¹Khanchu rêng Zedekia hrungtu hualsûnga ni khum hrangin thu a pêka. Kha khan ki om maia, a sûn tin baitiam khopuia baihai a hek mâka chu bai siamna hmuna irthokin pêkin ki oma.