Read Hrangkhol JEREMIA 40 Bible Online

JEREMIA 40 - Hrangkhol bible

JEREMIA 40

¹Sipai hruaitu Nebuzaradana’n Ramah khuaa irthokin a nin sua zoi hnungin RENGPA’N a ni chongpuia. Kha hmuna khan Judai ram le Jerusalema irthokin Babulon rama mi dang intângna ina om hranga hruaia omhai laia khan thîrhruia irkhitin ki iom sa a ni.

²Sipai hruaitu khan a hruai irkêma ki kuang, “RENGPA ni Pathianin hi hmuna vânduaina tung hrang hi a lei inpuang tâka.

³Tho hranga a iti kha a itho a ni tâk. RENGPA chunga thil nin tho’nchâia, a thupêkhai nin zôm no sikin, hihai hi a itung a ni.

⁴Atûn hin nang chu thîrhrui leh ni kuta irthokin ki sûta, nang ki insua a ni ta, Babulon rama keima leh hmunkhatin ni fe nuam noa ni’n chu, fe loiin ni om thei, ni nuamna tiang taka fe thei ni ti,” a ni tia.

⁵Ki sâm no tena chu, Nebuzaradana’n, “Babulon ram rêngin Juda khuahai op hranga bêin, Ahikama nâipa Gedalia, Safana tupa kuang kîr nôkin lân, a kuanga omin a mihai laia om ro, aninole, fe hranga ni itihna taka khan fe ro,” a tia. Khanchu thilpêk senkhat le bu ki chôi hrang a ni pêka, a nin fetira.

⁶Gedalia kuang Mizpa khuaa ki fea, ram sûnga mâksana omhai laia ki oma.

⁷Sipai hruaituhai le mi dang ar pêk loihai khan Babulon rama rêng Ahikama nâipa Gedalia chu ram optu, kha ram sûnga inriang tak, Babulon rama hruaia om loihai enkoltu hrangin bê a nih ti an len hriata.

⁸Mizpa khuaa Gedalia irhmupui hrangin hi mihai Nethania nâipa Ismaela, Korea nâipa Johanana, Tanhumeta nâipa Seraia, Netofa mi Efaia nâipasalhai, Makath mi Jezania le mi danghai an honga.

⁹Gedalia’n a ti pehaia, “Babulon-hai kuta irpe hrangin ite chi hrang zel om mah ti hi chong ki inkung a ni. Hi rama hin omhmun indet unglân, Babulon rama rêng sintho unglân, nin ta hrangin thil tinrêng fel ving a ti.

¹⁰Keima ngei Mizpa hin om ki ta, Babulon-hai hi an hongin chu nin irthûlin ngîr ki ti. A ni, uain, thei le oliv hriakhai la nin ta, bûm thei ta nin ta, nin inuamna tak khuaa om thei nin ti,” a tia.

¹¹Khaang khan, Israel mi tin Moab, Edom le ram danga omhai khan Babulon rama rêng mi tômte Judai rama a mâk thu le Ahikama nâipa Gedalia, Safana tupa chu khahai optu hrangin an inkung a nih ti a lei inhriata.

¹²Khanchu an hong irthokna ram danghai mâkin, Judai rama an hong kîra. Mizpa khuaa om Gedalia kuang an hong tunga, uain le kholum thei tamtak an hong chôi pea.

¹³Hi zoia hin Johanana le sipai hruaitu, ar pêk loihai kha Mizpa khuaa Gedalia kuang an honga,

¹⁴a kuang an ti pea, “Amon mihai rêng Baalisa’n Nethania nâipa Ismaela chu nang that hrangin a itîr a nih ti hi ni inhriat loi ma ni?,” an tia. Khannisian Gedalia khan iam maka.

¹⁵Khanchu Johanana khom Gedalia kuang, “Ismaela chu lei va that rong, tûte’n tu ithat mo a inih ti inhre no nihai. Itho ngân mo nang that hrangin phal a ini thei hrang? Kha thil khan Juda mi murdi nang irhuala irbûmhai irthekindarh a ta, Judai rama imâka la omhai hrangin vânduaina irkhêl intungtir a ti,” a tia.

¹⁶Khannisian Gedalia’n, “Kha thil kha tho no ro, Ismaela chungthu ni insîr hi thudik ni ma!” tiin a sâma.