Read Hrangkhol JEREMIA 42 Bible Online

JEREMIA 42 - Hrangkhol bible

JEREMIA 42

¹Khanchu, sipai hruaituhai Karea nâipa Johanana, Hesaia nâipa Azaria le mipui a chîn a lian an honga,

²“RENGPA ni Pathian kuang, keini ta hrang le hitaka hôia la omhai ta hrangin ni chongchai pe sa roh. Zoro lei fe tâka khan chu tamtak kin ni ngaia, khan atûn hin chu ni ihmu anga hin mi tômte vai imâkin kin iom a ni.

³Kho tiang mo kin ipan hrang le imo kin itho hrang RENGPA ni Pathianin a ni hril theina hrangin chongchai ro,” an ni tia.

⁴Khan keima’n, “A sa, RENGPA nin Pathian kuanga nin ingên angin chongchai ki ti. Khan a iti kai chu nangni inhril ki ti. Ite nangni thup no ning,” tiin ki sâmhaia.

⁵Khanchu anni’n ki kuang, “RENGPA ni Pathianin kin tah hranga thu nang a inhril angin kin tho no’n chu, RENGPA chu thu inhriattu dik, iamom mi ni ri se.

⁶Chongchai hranga nang kin itîrna RENGPA kin Pathian thu kin zôm hrang sikin thil tinrêng kin ta hrangin a ifel hrang a ni,” an tia.

⁷Sûn sôm zoia RENGPA’N a ni chongpuia,

⁸khaangin Johanana, a kuanga om sipai hruaituhai le mi danghai an rêngin ki bukkhômhaia.

⁹An kuang, “RENGPA Israelhai Pathian, a kuanga chongchai hranga nin ni itîr khan hiang hin a ti,

¹⁰‘Hi rama om mai nin nuamin chu, khaangin nangni siam loiin nangni san inding ki ta; nangni phôi loiin phunindet ki ti. Nin chunga siat ripna kin tungtir sikin, ki milung a ina a ni.

¹¹Nin ichi Babulon rama rêng hi chi ta no roi. Nin kuang ki oma; a thuneina irthokin nangni sansuak ki ti.

¹²Kei chu khonzâna nei ki ta, nin chunga khonzâna nei hrangin siam ki ta, nin rama nangni inomtir mai ki ti,’ tiin

¹³“Khannisianlân nangni Judai rama mâksana omhai, hi rama hin om nuam loiin RENGPA nin Pathian thuzôm loiin nin iom hrang ni viat mah. Ni ma, Aigupta rama, irdoina irhâi, bekul irhâi le châm inhriat loina hmuna fe kin ta, om kin ti, nin iti viat hrang ni mah. Nin tia ni’n chu, RENGPA Itinrêngthothei Israelhai Pathianin a ti, ‘Aigupta rama fe nin tum ngitin chu,

¹⁶khandai nin ichi ngêt khan nangni irzûl a ta, châm nin ichi ngôi ngôi khan nangni zui a ta, Aigupta rama khan thi nin ti.

¹⁷Aigupta rama fe hrang tum ngit mihai chu an rêngin khandaiin mo, châmin mo, aninole hri le hrâihaiin an ithi hrang a ni. An laia inkhat lua dam suak no nihaia, vânduaina irkhêl an chunga ki zuang intungtir hrang chu an laia inkhat lua intân suak thei no nihai,’ tiin.

¹⁸RENGPA, Israelhai Pathianin, ‘Ki ningmurna khan Jerusalema mihai chunga insuma a iom angin, ki ningmurna chu nin chunga, Aigupta nin fe’n chu insumin om a ti. En intak takin om nin ta; mihai ihmusit tuang nin ta, nin irhming khomâksâmna’n hmang an ta, hi ram hi hmu nôk ta no chin ni,’ tiin” ki tia.

¹⁹Khanchu ki lan sîr nôka, “RENGPA’N nangni Judai rama mâksana la omhai, Aigupta rama fe loi hrangin nangni a inhril a ni. Khasikin atûn nangni ki iti a ni.

²⁰Thipui thei rak hranga sualna lian nin itho a ni ta. Nin ta hrangin RENGPA ei Pathian kuang chongchai hrangin chong nin inkung a ni.

²¹Khan RENGPA ei Pathianin nangni inhril hranga a ni iti murdi nin izôm loi a nih ti hi atûn hin nangni ki inhril a ni.

²²Khasikin hi hi inhre roi: nin ife nuamna le nin iom nuamna rama khan irdoina’n mani, châmin mani, hriin mani thi nin ti,” tiin.