Read Hrangkhol JEREMIA 43 Bible Online

JEREMIA 43 - Hrangkhol bible

JEREMIA 43

¹RENGPA an Pathianin mi tin laia insîr hranga a ni itîrna chu anni chu ki hril pehai zoi tâka.

²Khanchu Hosaia nâipa Azaria le Karea nâipa Johanana le mi irsong danghai khan an ni tia, “Milak ni itho a ni. RENGPA ei Pathianin Aigupta rama fe loi hrangin le khatak khan om loi hranga nin hril hrangin nang tîr mah.

³Kaldai mihaiin ni chela ni that hrangin mo, Babulon rama sala ni hruai theina hrang tia Neria nâipa Baruka’n nang a inthor a ni hi,” tiin.

⁴Khaangin Karea nâipa Johanana mo, sipai hruaituhai le mipuihaiin Judai rama om mai hranga RENGPA thupêk kha zôm nuam maka.

⁵Khanchu Karea nâipa Johanana le sipai hruaitu tinhai khan Juda mi la dam sunhai le nam tin laia irthekindarh an nina irthokin Judai rama om hranga hong kîrhai chu an hruaia.

⁶Khahai kha pasalhai, nupanghai, nâipanghai, rêng nâinuhai an ni. Sipai hruaitu Nebuzaradana Gedalia enkol hranga a imâk mipui an rêngin Baruka le keima tep sain an ni hruai vinga.

⁷RENGPA thupêk zôm loiin Aigupta rama lûtin Tahfanes khua dênin an fea.

⁸Kha hmuna khan RENGPA’N ki kuang hiang hin thu a hrila,

⁹“Juda mihai hmu pumin lunglianpa hrûtin lân, Tahfanes hmuna Faroa in panna lam siamna sîr ata lung lampui kôla khan phun roh.

¹⁰Khanchu an kuang hiang hin ti ro, RENGPA Itinrêngthothei Israelhai Pathianin hiang hin a ti. A ni zui Babulon rama rêng Nebukadnezara chu hi hmuna hin hong hruai ki ta, hi lung nin iphunhai chunga hin a rêngtoihmun do a ta, a rêng puan in chu an chunga zâr a ti.

¹¹Nebukadnezara chu hong a ta, Aigupta hi a inhnê hrang a ni. Khanchu hri le hrâia thi hranghai chu hri le hrâiin thi an ta, mi intâng hranga hruai suak hranga inkunghai chu mi intânghaiin hruai suak ni an ta, khandaia thi hranga inkunghai chu khandaiin thi an ti.

¹²Aigupta pathian biak inhai chu hâl ki ta, Babulon rama rêngin an pathianhai chu a nuamin chu hâl a ta, a nuamin chu chôi ving a ti. Belrapu’n a songkola pahrik a izen angin, Aigupta ram chu Babulon rama rêngin zen infâihai ving a ta, inhnêna changin rot a ti.

¹³Aigupta ram Heliopolis khopuia inhriat maina lungphun irthianghai chu insiat chit a ta, Aigupta pathian biak inhai chu hâlpai ving a ti.