Read Hrangkhol JEREMIA 46 Bible Online

JEREMIA 46 - Hrangkhol bible

JEREMIA 46

¹Nam danghai chungchânga Jeremia kuanga RENGPA thu zuang tung chu:

²Aigupta chungthu: Juda rêng Jehoiakima an lal kum minlina Babulon rama rêng Nebukadnezara’n Eufrates dung kôla Karkhemis hmuna a inhnê tâk, Aigupta rêng Neko Faroa sipai pâl chungchâng thu chu:

³“Aigupta sipai hruaituhai chu an khêka, nin phôhai siam infel unglân, irdoi hrangin maton tiang kalphêt roi!

⁴Nin sakorhai irvôtir unglân, an chunga chuang roi! thîr lukhum khum pumin irzôt roi! Nin ufeihai intât roi! Nin thîr songkolhai innghâk roi!

⁵“Itho tâk ma ni? tiin RENGPA’N chongirdon a siama. Laizâm tho’n hnung tiang an irtôla, an sipaihai hnunga nor an nia; chitna sipin an hrât thei dôr an intâna, an hnung en viat ta loiin.

⁶Mi taksa inzânghai khom intân lat thei mahaia, mi hâitakhai khom zôk thei mahai. Hmâr tiang Eufrates dung panga khan irtolin an inrîla.

⁷Nail dung anga hong lian tâk hi tu mo a ini? Vadunga ivakuanghai dîla irsok but but ang tak hi?

⁸Aigupta chu a ni, Nail dung angin ar sôna, Ivadunga ivapanghai dîl angin. Aigupta khan irsôn ki ta, rammual irkhu ki ti; khopui le a sûnga mi omhai chu that ving ki ti.

⁹Sakorhai fe hrangin thu pe ki ta, sakor tâlia fe hrangin. Sipaihai tîr suak ki ta; Sudan le Libia rama irthokin mihai pho chôiin, Libia rama irthokin thal kâp theihai chu,” a tia.

¹⁰Hi hi RENGPA Pathian itinrêngthotheitu nikhua chu a ni: A vuan hin phuba la ki ta; a vuan hin a râlhai chu dûk tho ki ti. A khandai khan anni kha a nuam dôr fa a ta, an thisen chu a milung chuk mâka in mai a ti. A vuan hin itinrêngthothei irbôlna’n mi tamtak, hmâr tianga Eufrates dung kôla a ithat a ni.

¹¹Aigupta nâi dôngmate irthiang, Gileada fe’n lân, thinghnâi hloi la ro! Hloi tamtak ni ithohai khan sinthothei maka, ite khomin nang indamtir thei no ni.

¹²Nam tinhaiin ni mualinphoina an inhriata, mi tinin ni chap irhâi an inhriat a ni. Sipai inkhatin a dang kha ar pal raka, an ruaiin hnuaia an inrîl tâka.

¹³Babulon rama rêng Nebukadnezara Aigupta doi hranga a hong lai khan RENGPA’N a nin sama, a iti chu:

¹⁴“Aigupta ram khopuihai Migdol, Nof, Tahfanes-ah inpuang ro: mâni irhrung hrangin irtûng chian ta roi; nin inei murdi irdoina khan insiatchit ni a ti.

¹⁵Itho sika nin pathian hrât Afis kha a inrîl tâk ma ni? RENGPA’N ama kha a naminrîl tâk sika a ni.

¹⁶Nin sipaihai chu irtôlin an inrîl zoi tâka; mi tinin mi danghai kuang, ‘Irhnot ro! ei mihai kuang in tiang fe ei ta, râlhai khandai ata hi lei zôk rei,’ an irtia.

¹⁷“Aigupta rêng chu irhming thar, rêng irpâk nuam, a zoro inchum nghâktu tiin hlasak pe roh.

¹⁸Keima RENGPA Itinrêngthothei rêng chu ki nia, keima hi Pathian hring chu ki ni. Tâng chunga tâbor tânga irchuan luai angin, Karmel tâng chu tuipui chunga a ingîr ngut angin, nang a doitu irnak neizia chu khaang kha ni a ti.

¹⁹Nangni Aigupta mihaio, mi intânghai hruai hrangin irsiam diam ta roi. Nof chu ramchârin siam ni a ta, tûte a luatu om loiin ram a ti.

²⁰Aigupta chu sial illa nâmzan enhoi tak ang a nia, khannisian hmâr tianga mitip hong vuangin a indôp a ni.

²¹Sipai a irhlotirhai lua khom sete anga ite tho thei loi an ni. Sirsan lâkin doi maka, hnung kîrin laizâm an tho vinga. An chunga intak nî a hong ni tâka, an siatchitna hrang zoro chu.

²²Râlhai an hong nâi thiaia ni’n chu, mirûl anga inhrâmin Aigupta chu laizâm an tho tâk. ama chu hripui leh an doia, mi’n thing an iphûr angin.

²³Rampui an invât insiat ngai ang hin, an mihriam chu tep hrangin an tam hrai sikin, an sipaihai chu khâi fapôl inpung nêkin an tam uala.

²⁴Aigupta mihai chu mualphoia sia an ni tâka, hmâr tianga mihaiin an inhnêhai tâka. Keima RENGPA’N ki iti a ni ta,” tiin.

²⁵RENGPA Itinrêngthothei Israelhai Pathianin, “Thebes khuaa pathian, Amona, Faroa, Aigupta le a pathianhai an rêng le Faroa chunga irnghattuhai chu dûk ki ithohai hrang a ni.

²⁶Anni that tumtu Babulon rama rêng Nebukadnezara le a sipaihai kuta pe ki ti. Khan zoro la hong hranga chu, zoro fe tâka an lei itho anga khan, mihai Aigupta rama om nôk an ti. Keima RENGPA’N ki iti a ni,” a tia.

²⁷Ki mihai chi viat roi, Israel mihai nin thâiindôptir no roi. Ram hlataka irthokin, mi intânghai nin inina rama irthokin nangni sansua ki ti. In tiang hong nôk nin ta, irtharngam takin om nin ta; zôkriam nin ta, tûte’n irtha’nvâiin nangni sia ta no nihai.

²⁸Nin kuang zuang ki ta, nangni inzôk ki ti. Nangni kin thekindarna hmun nam tinhai that irhmanghai ki ta, khan nangni chu nangni that irhmang zoi no ning. Dûk tho loiin chu nangni inomtir no ning, nangni kin tuangtir khomin, diktakin nangni intuangtir ki ti.