Read Hrangkhol JEREMIA 47 Bible Online

JEREMIA 47 - Hrangkhol bible

JEREMIA 47

¹Faroa’n Gaza a rûn mâna khan, Filistia chungthua RENGPA’N a ni chongpuia a iti chu:

²“En roh hmâr tiang tui ar sôna, ivadung tuilian angin a hong iluang zut hrang a ni. Irnêng le a sûnga thil om murdi irkhu zit a ta; khopuihai le a sûnga mi a om murdi ngîmhai a ta; khopui le a sûnga mi omhai an rêngin. Lungzîngin mihai khêksoi an ta. Irnêng chunga mi tin inrung tatak an ti.

³Sakorhai inper irhâi le sakor tâli irhâi rum tiin le an ke irhâi inringin inhria an ti. Pasalhai kut irzal pehai a ta; an nâihai khom donsui zoi thei ta no nihai.

⁴Filistia insiatchit hrang nikhua chu a hong tung ta, Tura le Sidon changpui theia a la omsun, a la damhai that irhmangtir zoro chu, keima RENGPA’N Filistia chu insiatchit ki ti; Kret tui kôlhaia irthokin mi honghai an rêngin.

⁵Gaza mihai hrangin ngaisiatna irkhêl a hong tunga, Askelon mihai chu an inthim ngeng tâk. Phâizôla a la dam sunhaio, idôr ten mo nin la ichûl hrang?

⁶Nin khêka, ‘O RENGPA khandai! idôr ten mo ni la isâthai mai hrang hi? Ni koka kîr nôk inlân khatak khan irngam ta ro,’ ti roi.

⁷Hi sintho hrang ki pêk laiin, ama chu itin mo irngam thei a ta? Ama chu Askelon doi hrangin thu ki pêka, tuipui kôla mi a omhai khom kha,” a tia.