Read Hrangkhol JEREMIA 48 Bible Online

JEREMIA 48 - Hrangkhol bible

JEREMIA 48

¹Hi hi Moab chungthua RENGPA Itinrêngthothei iti chu a ni: “Nebo mihai lungkham an om e, an khopui chu a isiat tâk a ni! Kiriathaim chu lâkpai a ni tâka, a kul roiinpuihai khom insimtir a ni tâka. A mihai chu mualphoiin an oma;

²Moab roiinpuina chu a boi tâk, Israelhaiin Hesbon khua an lâka, Moab namhai thatpaihai hrangin an rêla. Madmen khua chu inthim dapa siam ni a ti; ama doiin sipai pâlhai kalchôi an ti.

³Horonaim mihai an khêk suaka, ‘Nakhrâta irhnuaisiana siatchitna!’ tiin khêk roi.

⁴“Moab chu a siatchit tâka; nâipanghai chap irhâi so irngai roi ba.

⁵Luhit lampui tuanin an chapa, Horonaim lam suka an lungzîng chap irhâi inhriat a ni.

⁶‘Irhnot unglân, nin hringna inzôk hrangin intân roi! Rama sakuartung angin intân roi!’ an tia.

⁷“Moab, ni’rnak le ni’rchona ni’rnghata, khan atûn chu nangma khom rûnin om ni ta; ni pathian Khemosa chu a hruaituhai le ochaihai leh khan, sala intâng hrangin hruai ni an ti.

⁸Khua inkhat khomin siatchitna kha lôi thei no nia, hmun incham le phâizôl khom insiatchit an ti. Keima RENGPA’N ki iti a ni.

⁹Moab ta hrangin thân lung sinsiam ta roi; zoro sôtnotea chu siatchit ta a ti. A khopuihai chu rûnin masan an ta, kha khan tûte om nôk ta no nihai,” tiin.

¹⁰Lungrîl murdi neia, RENGPA sintho loi mi chu khomâksâmin om ri se. A khandai irlek loia that loi mi chu khomâksâmin om ri se.

¹¹Khan RENGPA’N hiang hin a hrila, “Moab chu inzôka lei hong om mai ngai angin sala intâng ngai maka. Moab chu uain, tui kha bêl tam dôrin sungirthâk ngai maka, inchâng loia omchian ngai a ni. A mirimhoinahai hek thei maka, ar hniknahai khom a pangai a ni mai ngai.

¹²“Mihai intir uain tui angin Moab ki bunthuanna hrang nî a hong inai a ni ta. A uain bêlhai bunpaiin rong a ta, vîkkhoi chit an ti.

¹³Kha tena chu Moab mihaiin an pathian Khemosa chu iamzoi ta no nihai, an irnghatna pathian chu, Israelhaiin Bethel chunga an irnghat zoi loi ang khan.

¹⁴“Moab mihaio, itho mo pasal sa, irdoina hmuna sipai mi hâitak nin irti tâk ma ni?

¹⁵Moab le a khopuihai chu insiatchit an ni tâka, an isong tak an ruathartehai khom thatin an om tâk. Keima hi RENGPA Itinrêngthothei ki nia, khasikin ki iti a ni.

¹⁶Moab lu chung rikna chu a hong irthoka, a ram khom hong tung zel a ti.

¹⁷Nam a kôlvêla omhai ta hrangin châ unglân, nangni ar hming inthangzia an hriattuhai khan, ‘A sinthotheina inlalna chu inmongin a om tâka, a’rnakhrâtna a boi tâk,’ ti roi.

¹⁸Nangni Dibona omhai, nin hmun roiinpui tak ata zuang chum unglân, irnênga pil chunga hin toi rak ta roi. Moab insiatchittu chu hin a om tâka, a kul tamtakhai a ram zoi tâka.

¹⁹Nangni Aroer khuaa omhai, lam sîra ngîr unglân nghâk roi; laizâm hong thohai kha chongpuihai unglân, a kuang i zât thil mo a tung inhre suak roi.

²⁰“Moab chu an rîl tâka,” tiin nangni sâm an ti. A ta hrangin chap roi, mualinphoina a ni, hi Arnon ivadung tuanin Moab siatchitna thu inpuang roi.

²¹“Tâng inchama om Holon, Jahza, Mefaat,

²²Dibon, Nebo, Beth-diblathaim,

²³Kiriathaim, Bethgamul, Bethmeon,

²⁴Kerioth, Bozra, khuahai chunga roirêlna a zuang tung tâk. Moab khopuihai a hla le nâi hmun tina roirêlna a tung tâk a ni.

²⁵Moab irki chu tan inbûi pe a ni tâka, a bân khom khiak a ni ta. Keima RENGPA’N ki iti a ni,” a tia.

²⁶Khan RENGPA’N, “Ki chunga a tehel sika khan Moab chu inruitir roi, Moab chu a miluaka khan inhlum a ta, mi’n innuisan an ti.

²⁷Moab, Israel mihai ni inuiso dân kha inhre mai ro? Inru kâra chang mo an nia, an thurchi ni hril rikipin ni lu ni inthik ngai hi?

²⁸Nangin Moab khuaa om mihai nin khopui hi ma ta roi; rôl lunghai laia va om roi. Pûk bâi kôla irbu kaitu vasu ang chu ni roi.

²⁹Moab chu a irpâk tatak a ni. Mihai irpâk dân, irlek dân, mâni thu an iuar dân, an binga an irngaiirsâng dânhai ki inhriat ving a ni.

³⁰Keima RENGPA’N an irlek dân ki inhriat a ni. An irsongnahai chu chanlamboi hrang a nia, an thil thohai khan tuanintung no nihai.

³¹Khasika khan Moab khuaa omhai ta hrangin le Kir Heres khuaa omhai ta hrangin mitrithi sôm ki ti.

³²Sibma khopui, nang chu grep ônhai tuipui thi khêla Jazer dên raka irzâm ang kha ni ni. Khan atûn chu kholum zoroa thei le grep rahai chu insiatin an om tâka.

³³Lômna le raifânna chu Moab ram irnêng sana hmuna irthokin khâipaiin an om tâka. Grep sômna khurhai ata uain luang suak ki’rngamtira; uain siama raifân hrang tûte om ta mahai.

³⁴“Hesbon le Elealeh mihai an khêk suaka, kha an khêk irhâi kha Jahaz dêna inhriat thei a ni. Zoar mihai khomin an len hriat theia, Horonaim le Eglat-Selisia dênin an lei inhriat sa a ni. Nimrim ivadungte khom a kang tâka.

³⁵Moab mihai chu an hmun irsânghaia hâlirvôm thilinhlan le an pathianhai kuang irbôlna an inhlanhai, ki irngamtirhai hrang a ni. Keima RENGPA’N ki iti a ni.

³⁶“Mi an inei murdi an inchân zoi hrangin, theihle tuma a chûlpuina hla an isak ngai ang hin, ki lungrîl chu Moab le Kir Heres ta hrangin a ichap a ni.

³⁷An rêngin an lu an ep inkola, an hnerkamulhai an paia, an rêngin an kut an âta, mi tinin bora puan an sil tâka.

³⁸Moab mihai in chunga le vântâng mihai irbukkhômna hmuna chap inrung ti no chu ite a dang om ma, a san chu mi’n bêl an inpâm ta loi angin Moab chu kin khoi tâk sikin.

³⁹Khêk suak roi! Moab chu mualphoina siam a ni tâka, a ram tâka, a kôlvêla nam tinin an nuiso a ni ta. Keima RENGPA’N ki iti a ni,” a tia.

⁴⁰RENGPA’N chong an kunga, irmu’n a mitha phar dûr angin hi Moab chu nam inkhatin a inbo hrang a nia,

⁴¹khopuihai le kulhai chu lâk ni a ta, kha nikhuaa khan chu Moab sipaihai chu nupang nâiha isea chardong angin om an ti.

⁴²Moab chu ki chunga a tehelzong sika khan insiatin om a ta, nam tia inding thei ni ta no ni.

⁴³Ichiom, khurpadop le chângin Moab mihai chu a lei inghâkhai chian a ni. RENGPA’N a iti a ni.

⁴⁴Ichiom ata laizâm thotuhai kha khurpadopa tâk an ta, khurpadop rengata la hong suak nôkhai kha chânga khit an ta, RENGPA’N Moab siatchitna zoro ar fûktir sika khan.

⁴⁵Changpui hrang zonga intânhai khan Hesbon-a irbîkna an zonga, rêng Sihona lei inlalna hmuna khan, meiin a ikâng a ni. Moab mihai michala sam a kânga, irsual nuamhai lusîphai chu.

⁴⁶Moab mihai chu lunginkhamhai roi! Khemosa chubai mûkhai ngai chu mi intânga hruaiin an om ta.

⁴⁷Khan zoro la hong hranga chu RENGPA’N Moab ngîrhmun siam insa nôk a ti. Hihai hi RENGPA’N Moab chunga tung hranga a iti chu a ni.