Read Hrangkhol JEREMIA 49 Bible Online

JEREMIA 49 - Hrangkhol bible

JEREMIA 49

¹RENGPA’N Amon chungthu a iti chu hi hi a ni, “Israel mihai khôn mo an iom zoi tâk? A ram inzôk hrangin tûte an iom ta loi ma ni? Itho hranga mo Gada namhai chu Milkoma chubai mûkhai ngai an ram lâkin an ilua?

²Nikhua chu a hong itung thiai a ni, kha ni khan chu Raba khopuia mi omhai chu irdoina irhâi inhretirhai ki ta, mâkin om an ta, a khuahai chu hâlpai ni an ti. Khanchu Israelhai khan an kuang ata a lâk pehaia irthokin an ram chu lapai nôk an ti.

³Hesbon mihaio, khêk suak roi! Ai khua chu a siatchit ta! Reba nupanghaio, chap hrangin irsiam ta roi. Bora puan sil unglân, chap ta roi. Lungzîngin chai sup ta roi. Nin pathian Milkoma chu a ochaihai le hruaituhai leh khan sala intâng hrangin an ihruaihai hrang a ni.

⁴Mi iamom loihai i lo hranga nin irpâk ngai ma ni? Nin hrâtna chu a iduai a ni ta. I lo hranga nin sinthotheina songin tûte’n ni doi ngam no ni, nin iti ngai ma ni?

⁵kil tina irthokin nin ta hrangin ichiom a hong itung hrang a ni. Nin rêngin laizâm tho ving nin ta, nin urênghai bukkhôm hrangin tûte om ta no nihai.

⁶“Khan zoro la hong hranga chu Amon ngîrhmun siaminsa nôk ki ti. Keima RENGPA’N ki iti a ni,” a tia.

⁷Khan RENGPA Itinrêngthothei, Edom chungthua a iti chu hi hi a ni: “Edom mihaiin an thil sût theina kha an inchân tâk ma ni? Lungvâr sakhai ngai khan imo an itho hrang an ihril pehai thei loi ma ni ta? An vârna a ihek zoi ma ni ta?

⁸Dedana mihai, kîr unglân laizâm tho ta roi! irbi ta roi! Anni dûk tho hrang zoro a tung tâk sika hin Esaua irchihai chu ki irhmangtirhai hrang a ni.

⁹Mi’n grep an irhmala, a rânga tômte chu an la hôi ngaia, inrûhai zâna an hongin an inuam kai an lâk ngai.

¹⁰Khan, Esaua irchihai rêk chu ki khêlhai vinga, an irbîknahai ki’rlangtir pehaia, khasikin irbîkna zel nei ta mahai. Edom mihai chu an irhmang zoi tâka, inkhat lua hôi ni mahai.

¹¹Nin nâi farahai chu ki kuta siahaiin lân, anni chu enkolhai ki ti. Nin meithâihai khomin keimaa hin irnghat thei an ti.

¹²“Dûk tongna khilâta irthokin kop sa loina nei loihaiin an in a nangin te, tuang loia zôk hranga ni irsabei ma ni? Lôi thei no chi ni, khilâta irthokin ni iin ngêt hrang a ni.

¹³Keima ngeiin chong khomâk ki’rsâm tâk, Bozra khopui chu ena ichiom le ramchâr chang a ta, mihaiin nuiso an ta, ar hming chu khomâksâmna’n hmang an ti. Keima RENGPA’N ki iti a ni,” a tia.

¹⁴Khan keiin, “Edom, chongbe RENGPA kuanga irthokin ki ihmu a ni. Nam tinhaiin an sipaihai bûma, nang doi hrangin palai an itîr a ni.

¹⁵RENGPA’N namhai laia a chîn tak, mihai laia hmusitom takin nang siam a ti.

¹⁶Ni’rpâkna hin nang a ihuang a ni. Nang an chiin nir bê dôr kha tûte’n nang an ichi loi a ni. Tâng chung irsâng tak, lungpui rôl chunga om ni nia; khan irmupui ang taka irsângin omin lân khom, RENGPA’N nan sum a ti. RENGPA’N a iti a ni,” ki tia.

¹⁷Khan RENGPA’N, “Edom chunga siatchitna a zuang itung hrang irkhêl hrang dân chu mi a theng irlôihai chu inlâi rakin an ichi tatak hrang a ni.

¹⁸Sodom le Gomora le a kôlvêla khuahai le insiat an ini ang khan, Edom chunga khom tung a ti. A sûnga tûte zel om thei no nihai. Keima RENGPA’N ki iti a ni.

¹⁹Kâmkeibaknei rampui sêt tak ata Jordan dung hong zui sûlhringna hmuna hong angin hong a ta, Edom mihai chu an ram ata inrang takin irzûlpaihai ki ti. Khanchu hruaitu ki inthang khan nam chunga khan roirêl a ti. Keima le irkhi thei tu mo om? Tu mo ni doi ngam hrang? Tu roirêltu mo ni doi thei hrang?

²⁰Khasikin o Edom mihai doi hi ki thiltum, Temana khopuia mihai chunga tho hranga ki itum hi, irngai roi. An nâihai ten lua kaizam phît ni an ta, mi tinin chi tatak an ti.

²¹An irtet irhâi khan irnêng inhnîng a ta, an chap irhâi khom kha tuipuisen tenin inhria an ti.

²²Bozra chu râlhaiin irmu a mitha phar puma a inbôhai angin, an idoi hrang a ni. Kha nikhuaa khan Edom sipaihai chu nupang nâiha isê irtha’nvâi ang hin om a ti,” a tia.

²³RENGPA’N Damaska chungthua a iti chu hi hi a ni: “Hamath le Arpad kho mihai chu thurchi saloi an len hriat sikin, an lungrîl inhnângin an ibuai a ni. Lungkângna chu tuipui angin an chunga luangin an iom chian thei loi a ni.

²⁴Damaska mipuihai chu irzalin chiin laizâm an tho tâka. Nupang nâiha isê angin na tuang le lungrîl buaiin an iom a ni.

²⁵Khopui irhming inthang lôm taka om ngai kha, dâisanhreka mâk a ni tâka.

²⁶Kha nikhua kha chu ruathartehaiin khopui kotsuahaia thatin om an ta, an sipaihai thatpai ni an ti.

²⁷Damaska kulbanghai mei leh hâl ki ta, rêng Benhadada inhai hâlpai ving ki ti. Keima RENGPA Itinrêngthotheiin ki iti a ni,” a tia.

²⁸Khan Kedara nam le Hazor thuhnuaia om ram bunghai, Babulon rama rêng Nebukadnezara’n a ilâkhai chungthua RENGPA’N a iti chu hi hi a ni: “Kedar mihai chu doi unglân, nisua tianga mihai nam kha insiat roi!

²⁹An puan inhai, an belrahai, an puan inzarhai le puan in sûnga thil omhai la pehai roi. An saringseihai lapai pein mipuihai kuang, ichiom zât nin kôlvêla khan a iom a nih tiin hrilhai roi.

³⁰“Hazor mihai rota irbîkna hrangin keima RENGPA’N nangni ki inhril a ni. Babulon rama rêng Nebukadnezara’n nangni a phiara, hi hi a iti a ni.

³¹‘Hong roi, lungirhnik tak le zôkriama omhai so la va doihai rei! An khopuihaiin dâi mikota kalna khom nei loiin hrung viat loia om kêng,’ tiin.

³²“An saringsei le sehrâtchal la pehai ving roi! An sam epinbonghai chu irthekindartirin, kil tina irthokin vânduaina irkhêl intungtir ki ti.

³³Hazor chu ramchârin sia mai ta ki ti. Sihalhai omna hrangin, a sûnga tûte zel om ta no nihai. Keima RENGPA’N ki iti a ni,” a tia.

³⁴Zedekia Juda rêng a chang zoiin chu, Elam ram chungthua RENGPA’N a ni chongpuia.

³⁵A iti chu, “Elam sinthothei taka siamtu, thal kâp mihai chu ki ithat hrang a ni.

³⁶Kil tina irthokin Elam chu phâivuahaiin sêm ki ta, ram inkhat lua an invâi loina a om mâka chu, a mihai kil tina in thekindartirhai ki ti.

³⁷Elam mihai chu anni that nuam, râlhai, chi hrangin siam ki ti. Ki ningmurin Elam mihai chu insiat ki ta, anni ke hnuaia an hek mâka chu, an râlhai doi hrangin tîrsuak ki ti.

³⁸An rênghai le hruaituhai that irhmanghai ki ta, Elama khan ki rêngtoihmun intoitir ki ti.

³⁹Khan, zoro la hong hranga chu Elama ngîrhmun siam insa nôk ki ti. Keima RENGPA’N ki iti a ni,” a tia.