Read Hrangkhol CHAP HLA 3 Bible Online

CHAP HLA 3 - Hrangkhol bible

CHAP HLA 3

¹A ningmurna khianghrola vîk tuangtu ki ni.

²A vârna fe loiin inthimna tiang a ni hruaia.

³A ni tin a kut vîk ki tuang mai ngai.

⁴A nin kôngtira, ki’rzal ki thêm ta, ki ruhai khom a irtan ok tâka.

⁵Lungrîl natna le intaknahaiin a ni bôma.

⁶A lei thi tâkhai angin inthima a nin omtira.

⁷Hruiin a ni khitthunga, suak thei loiin a ni sia ta.

⁸changpui zongin ki khêka, khannisian inhre loi omin a om.

⁹Ki fena hrang lampuia lung a’rkhama, an hrukpai zoi ta.

¹⁰Savom angin a nin ruanga, kâmkeibaknei irdîp angin.

¹¹Ki lampuihai chu ilhlingin a bit zoia, a ni invit phet phut zoi a ni ta.

¹²A thal ngul leh a ni irzîk mai a ni.

¹³A thal chu ki milung irbua a sun inlûta.

¹⁴Mi murdi’n an nin nuisana, kei chu mihai ta hranga tufiam thôna chu ki lei ni tâka.

¹⁵Ki hnông tâk khomin thil khazât a nin intira, thil irkhêl tak a ni intuangtir a ni.

¹⁶Ki hmâi irnênga a nin tât pea, lungtâtin ki hâhai an thingtira;

¹⁷Phûkdâia om ni rêng nei ma unga, a hoi ti thei ta ma ung.

¹⁸A tuang lam zel inhre ta ma ung, RENGPAA khan ki sabeina a boi ta.

¹⁹Ki tuangna le kin vâinahai, inhresuak hi antak ki iti a ni ta.

²⁰Ki hong insâp sabakin chu, Ki irzal ual ual ngai a ni.

²¹Hi hi kin hriat suakin chu ki sabeina a irhmang hlet ngai a ni.

²²RENGPA nunhoi le inrenna hi chu chuai ngai maka.

²³A sûn tin a thar mai ngai, iamom tak a lei ni.

²⁴RENGPA vai hi ki ineisun a ni, Ama kuanga hin irnghat mai ki ti.

²⁵Ama nghâka zongtuhai ta hrangin, RENGPA hi zong mai a nang.

²⁶RENGPA’N a ni saninzôk hrang zoro chu nghâk hi a satak a ni.

²⁷Nâipang lai irchu hi a satak a lei ni.

²⁸Intak zap khomsian, dâihreka tuang insôt hi a satak chu a ni.

²⁹Kûn chiana irdô rak hrang a nia, beiindong loi hrang a ni.

³⁰Ki bianga a nin bên hin, inchêng zap khomsian, dô pe mai hrang hi thil sa a ni.

³¹RENGPA hin chu ni hnôl mai ngai no ni.

³²A nin renin lung a ni ithung ngêt hrang a ni.

³³Mihriamhai beiindongtir le sôlhai hi a nuamlam ni mah.

³⁴Irnênga lung in intânghai murdi sirbêa an omin;

³⁵Anchungtak mit hmua mi a dikna hnôl pea a omin;

³⁶Mi chaninvâi donsui ngai loihai hi RENGPA inuam loi tak a ni.

³⁷RENGPA’N thu a pêk no’n chu, tu thu mo hlochuk ngai?

³⁸Anchungtakpu bâi ata ti no’n, thu sia le sa ite suak ngai loi mo ni mah?

³⁹Ei dam sûng hin ei sual sika tuangin, ei ichiar hrang ma ni?

⁴⁰Ei omdân hi sûtin ir-enfel ei ta, RENGPA tiang kîr ei ti.

⁴¹Irvâna Pathian tianga lungrîl irhongin chongchai ual ei ti.

⁴²“Thil saloi thoin ei rotsana, nangin ni ngaidam mak che.

⁴³Ningmur pumin ni ni’rzûla, Irdîn viat loiin ni ni thata.

⁴⁴Sûm irsatak sûnga ni’rkhum chiana, kin chongchaina ni kuang hong tung thei mah.

⁴⁵Nam tin laia sahrok pai khômna’n ni ni isiam a ni ta hi te.

⁴⁶Kin râlhaiin êsêl takin an ni ikhêksan a ni ta.

⁴⁷Thil irkhêl tak le tuang theiloi rakin kin iom a ni ta.

⁴⁸A siat thei dôra siat kin tonga, ki mitrithi a iluang zul zul a ni.

⁴⁹Ki mit chu mong loiin chap mai ta ki ti.

⁵⁰Irvân ata RENGPA’N a zuang ena a ni zuang don mâka chu,

⁵¹Khopui sûnga nupanghai tuang lam ki hmu ualin, ki milung a na u ual ngai a ni.

⁵²Râlhai lakin ite a bi boiin, vatehai angin an ni inhnota.

⁵³Hring uamin khura an nin thâka, lung leh an ni dênga.

⁵⁴Tuiin ki lu a ni buak pe khan chu, “ki ithi ta hrang ni a ti,” ki tia.

⁵⁵Khur sûng ata irthokin O RENGPA nir hming ki hong koia,

⁵⁶Ki khêk irhâi ni len hriata, mikuar hîp loi takin.

⁵⁷Ki hong khêk tak takin chu a ni zuang nâia, ‘Chi no ro,’ a ni tia.

⁵⁸RENGPA’N a ni dona, ki hringna a zôk ta.

⁵⁹RENGPA ki tuangnahai ni hmu ta, ki chungthuhai hi ni rêl infel pe ta roh.

⁶⁰Phuba lâk hrangin an irsiam chak lai khom ni hmu mai a ni.

⁶¹RENGPA an ni ilô lamhai hi ni hmu maia, an ni ikhitphiar dânhai khom hi.

⁶²A ni doituhai chu sûn misa tâk dênin keima thurchi hrilin an ichiar mur mur ngai a ni.

⁶³An toi lai le an ngîr lai khomin, êsekara’n hla an ni isak khum a ni.

⁶⁴RENGPA an sintho ang takin, anni khom intongtirhai roh.

⁶⁵Khomâk sâmhaiin lân, an beidong ri se.

⁶⁶Ningmurin irzûlhaiin lân, RENGPA, hnuai chunga hin thatpaihai ving roh.