Read Hrangkhol CHAP HLA 5 Bible Online

CHAP HLA 5 - Hrangkhol bible

CHAP HLA 5

¹RENGPA kin chunga thil tung hi inhre mai ro, ni hong enin lân, mualphoi kin irlâk ta hi te!

²Kin irchonhai khom nam danghai laia pêk a ni zoi ta. Kin inhai khom hmêl hriatloi kuta omin.

³Fara nu le pa boi kin ni ta. Kin nuhai khom meithâi anga omin,

⁴Tuidâi khilât khat khom irchôk vaiin kin in thei ta. Kin thingtua ngai khom irchôk a nang tâk.

⁵Kin ringa chelin kin oma; kin ngûiin, irngam thei ta ma ung.

⁶Aigupta le Assuria-hai kuanga kin kut kin do tâka, kin khop theina hrang zongin

⁷kin pahai khom an suala, om zoi ta mahai, an dik loinahai kin ipêl a ni ta.

⁸Suakhaiin kin chunga an inlala; an kut ata ni sansuak thei tûte om mahai

⁹Parân fe pat thei ang dôrin fâk kin zonga, ramchâra khandai tuang hrang sikin,

¹⁰Kin vunhai khom irtap mei angin a luma.

¹¹Zion nupanghai chu an siatpuihaia; dôngmatehai khom Juda khopui laia khan.

¹²Reng nâihai khom an kut leh an kaiphiarhaia, upahai inzak loiin,

¹³ruathartehaiin bu sukna khôla an insuktirhaia; nâipanghai chu thingsâi hnuaia an dêngzuanhaia;

¹⁴Upahaiin mikot kul kôla an rotsanhaia, ruatharhai mâksanin.

¹⁵Kin lungrîl lômna a heka; kin lampui a ping ta.

¹⁶Ki lu ata rênglukhum a tâka; kin chung a rik, kin lei tho insual tâka.

¹⁷Hi sika hin kin irzal ta. Kin mit khom a zîng ta.

¹⁸Zion tâng chu a chuai tâk sikin, sihalhaiin a sûnga an lênga.

¹⁹Nang chu RENGPA kumkhuain nin lala; ni rêngtoihmun chu irlo tin dênin,

²⁰Itho sika mo kumtuanga ni ni irnghil, hi ten sûn ni ni irotsan?

²¹O, RENGPA nangma tiang nir heitir nôkin lân, hong kîr thei kin ti; tiana angin kin mihai inhar nôkin lân.

²²Aninole, nangin ni ni ihnôl sabak mani tâk? Kin chunga ni ning a inmur sabak ma ni ta?