Read Hrangkhol EZEKIELA 1 Bible Online

EZEKIELA 1 - Hrangkhol bible

EZEKIELA 1

¹Kum sômthum kuma, tha minlina, tarik ringa nî’n Babulon rama Kebar dung kôla Judahai sal intâng laia ki om sa laiin irvân ar honga, Pathian inlârna ki hmua.

²Kha tha tarik ringa nî, rêng Jehoiakina an chel kum ringa kuma khan,

³kei, ochai Ezekiela, Buzia nâipa kuanga Babulon rama Kebar vadung kôla khan RENGPA thu chu a zuang tung tâka, RENGPA kut chu ki chunga a chum tâka.

⁴Ki hong ena, hmâr tiang ata phâivuapui a sate’n a hong thoa; sûm irsa tak kâra khan kôl a’rtêk sor sora, a kôlvêl chu a vâr sur sura, a’rtêknaa khan dârsen anga irtêk zur zur a oma.

⁵Kha vâr hong suaka khan thilhring ang, mihriam ang hi minli an hong suaka.

⁶Hmâi minli le mitha minli an nei chita,

⁷an kehai chu ke intuanphit an nia, an kechumhai chu sehrâtchal kechum ang an nia, dârsen irtêk ang a ni.

⁸Hmâi minli le mitha minli an nei baka, an panga mitha hnuaia khan kut mihring kut ang hi, an nei senga.

⁹An mithahai chu an irzom senga, an fe khomin irhêl kual ngai mahai, an rêngin mân tiang ringot an fe zit ngai a ni.

¹⁰An hmêl inlang dân chu hiang hin a ni. Maton tiang mihriam hmêl an irputa, chang tiang kâmkeibaknei hmêl, vei tianga sehrât chal hmêl, hnung tianga irmupui hmêl ang a ni.

¹¹An hmêl chu khaang khan a ni, an mitha inhni chu irtôn chiain an phar irzoma, an mitha inhni khan an takpum ar khua.

¹²Khan, an rêngin mân tiang irhei ringotin an fea, an nuamna tiang tiang an fea; an fe laiin sîr tiang irhei ngai mahai.

¹³Thilhringhai laia khan inkhat chu meiser ang, meiri-al vâr tak ang hi, thilhringhai laia a suk a tunga fe a oma, mei chu a vâr tak taka, mei ata kôlirtêk a hong suaka.

¹⁴Thilhring minlihai chu kôlirtêk anga inrang takin an va intân an hong intâna.

¹⁵Thilhring minlihai chu ki en mai laiin, an sîr tiang seng, tâli ke minli nei, irnênga ngîr ki hmua.

¹⁶Khan, tâli ke inlang dân chu lung hlu anga om, irang zit a ni; a ke irkual sûnga ke irkual dang om ang hi a ni.

¹⁷An fe zoro’n, an sîr minliin an fea, irhêl ngai mahai.

¹⁸An ke kualhai chu, an minliin ke kual mita siphai chu an nei senga.

¹⁹Thilhringhai fena tina, tâli, ke kualhai khom an sîra khan an fe sa zêla, an thoi le an thoi sa ngai a ni.

²⁰Thilhringhai fe nuamna tina an tâlihai khom an fe sa ngai, an thoi le an thoia, thilhringhai thu thua om an ni.

²¹An fena lam tinrênga an fe khomin an zui sa zêla, an ngîr le khom an ngîra, irnêng ata an thoi le khom tâli kehai khom khan an thoi saa, thilhringhai thu thuin an om a ni.

²²Thilhringhai lu chunga khan irvân anga êl krustal lung ang hi a oma, vur anga vâr a ni, an lu chunga khan ar zâma.

²³Kha thil om kul hnuaia khan, thilhringhai chu an ngîra, an mitha inhni an phara, an mitha inhni dangin an taksa an irkhûa.

²⁴Khan, an vuangin chu an mitha irhâi kha tuipui irhâi anga inring, sipai pâl irhâi anga om mur mur le Itinrêngthotheia irhâi anga om kin hriata, an ngîrin chu an mitha kha an thepin an irtumtir nôka,

²⁵an ngîra an mithahai an thep khomin, an lu chung irdîna irhâi a la om mur mura.

²⁶An lu chunga vân dum chunga khan rêngtoihmun ang tak, safir lung ang maia inlang hi a oma, khan, rêngtoihmun chunga khan mihriam ang tak hi a toia.

²⁷A kong chung tiang chu dâr thîr rô inlinga irtêk a nia, a hnuai tiang khom khan mei anga vâr a ni, a kôlvêl chu a êl invâr uama.

²⁸A kôlvêl vâr chu rotho nia sumrisâng rông ang hi a ni. Hi hi RENGPA roiinpuina inlang dân chu a ni. Kha kha ki hmu’n chu inbok rakin hnuaia ki’rteta, ni chongpuitu irhâi chu kin hriat tâka.