Read Hrangkhol EZEKIELA 10 Bible Online

EZEKIELA 10 - Hrangkhol bible

EZEKIELA 10

¹Khan, ki hei ena, irngai ta, cherubhai lu chunga vân duma khin safir lung ni ômtak, rêngtoihmun ang hi a hong inlanga.

²Mi puan irnêm silpu kuanga khan thu a hrila, “Cherubhai hnuaia thîr sakor ke irhêlhai kongkâra khan fe’n lân, cherubhai kongkâra meihol chu ni kut kianghni’n insip sa ro; khan khopui chunga khan inthekindarh ro,” tiin. Khan, ki mit ngeia khan a va lût tâka.

³Khan, kha mi kha a lût lai khan, cherubhai chu tempil sûnga sim tiang an indinga, insûng chu sûmin a sipa.

⁴Khan, cherubhai rengata RENGPA roiinpuina chu a hong suaka; biak in mikot bula khan a ngîr tâka, in chu sûmin a sipa, tuallai chu RENGPA roiinpuina vâr khan a hong sip tâka.

⁵Cherubhai mitha zâp irhâihai chu Pathian Itinrêng thotheiin thu a hril laia a hnukirhâi angin, tual pên tiang ata khom inhriat thei a nia.

⁶Khan, mi puan irnêm sil kuanga, “Cherubhai hnuaia thîrsakor ke kâra mei so va la ro,” tia thu a pêkin, puan irnêm sil mi chu a va fea, thîrsakor ke bula khan a va ngîr tâka.

⁷Cherub inkhatin, cherubhai hnuaia mei chu a lâka, puan irnêm sil mi kuta a pêka, khanchu a lâka, a suakpui tâka.

⁸Khan, cherubhai chu a mitha hnuaia mihriam kut ang mai hi a hong inlanga.

⁹Khan, ki hei ena, irngai ta, cherubhai inkhat kôla, thîrsakor ke inkhat, cherub dang sîra thîrsakor ke dang inkhat ki hmua.

¹⁰Khan an inlang dâna, an minli khan ir-angna an nei senga, thîrsakor ke inkhat sûnga thîrsakor ke dang om ang mai hi a nia.

¹¹An lônin chu, sîr minlia an fe theia, an fe khomin irhêl ngai mahai; aniachu a maton tak fena na an zuia, an fe’n irhêl nôk ual ngai mahai.

¹²An takpuma, an ruangzânga, an kuthaia, an mithahaia, an thîrsakor kea khom mit a sip zita.

¹³Thîrsakor kehai kha chu ki mikuar inhriat ngeia, “Thîrsakor ke irhêl” ti a ni.

¹⁴Khan cherub tin chu hmâi minli an nei senga, hmâi inkhatna chu cherub hmêl a nia, hmâi inhnina chu mihriam hmêl a nia, hmâi inthumna chu kâmkeibaknei hmêl a nia, hmâi minlina chu irmupui hmêl a ni.

¹⁵Khan, cherubhai chu an vuanga, hi hi a ni, Kebar vadung kôla thilhring ki ihmu chu a ni.

¹⁶Cherubhai an fe’n chu thîrsakor kehai chu an sîra an fe saa; khan, cherubhai kha irnêng ata vuang hranga an mithahai an inzarin thîrsakor kehai leh a pâlin an fe sa ngai.

¹⁷Cherubhai an irngamin anni khom an ngîr saa, an vuang le chu an vuang sa ngai, cherubhai thu thuin an iom a ni.

¹⁸Khan, RENGPA roiinpuina chu in inkhâr bul rengata a fesuaka, cherubhai chunga khan a ngîr tâka.

¹⁹Khan, cherubhai khan an mithahai chu an phara, an fesuak lai khan ki mithmu ngêta khan hnuai ata chung tiang an vuanga; an thîrsakor kehai khom chu an sîrhaia khan a om saa; khan RENGPA in dâi inkhâr nisua tianga khan an ngîra; khan an chunga Israel PATHIAN roiinpuina chu a oma.

²⁰Hi hi Kebar vadunga Israel Pathian hnuaia thilhring hmu chu a ni; cherubhai an nih ti kin hriat.

²¹Cherub tinin hmâi minli seng an neia, mitha minli seng an neia; an mithahai hnuaia khan mihriam kut ang an nei sa senga.

²²Khan, an hmêl khom Kebar vadung panga ki hmu ang chie kha a ni, an inlang dân le annihai ngêt kha an ni; anni chu intûn takin maton tiang an fea.