Read Hrangkhol EZEKIELA 11 Bible Online

EZEKIELA 11 - Hrangkhol bible

EZEKIELA 11

¹Irtha khan a ni hong indomirsânga, nisua tiang panga RENGPA in mikota khan a ni hruaia, mikot bula khan mi sômhni ringa an oma, an laia khan mipui hruaitu, Azura nâipa Jaazania hai, Benaia nâipa Pelatia hai chu ki hmua.

²Pathianin ki kuang, “Mihriam nâipa, hi mihai hi an ni, thilsual ngaitua suaka, khopuia hin mihai inphûttu an ni.

³Anni’n, ‘Inhai sinna hrang zoro anâi teng tâk hi te, hi khopui hi sa suangna bêl a nia, eini hi a sahai chu ei ni,’ an tia.

⁴Khasikin, thu hrilin lân, o mihriam nâipa, an chunga thu hril ro,” a tia.

⁵Khan, RENGPA irtha chu ki chunga a hong tunga, ki kuang, “RENGPA’N hiang hin a tih ti hril roh. Israel in sûngkuahai, khaang khan ni lei ihril ma ni, nin lungrîla thil hong lûthai chu kin hriat.

⁶Hi khopuia hin mi nin ithat intamhai zêla, khataka tuallaihai chu mithi ruakin a sipa.

⁷“Khasikin, RENGPA PATHIANIN hiang hin a ti, mi nin ithathai a sûnga nin inzâltirhai hi, sa chu an ni; khopui chu sa suangna bêl a ni; khannisianlân, a sûng ata lâksuakin om nin ti.

⁸Nin ichi tak, khandai chu nin chunga hong intungtir ki ti, RENGPA PATHIANIN a ti.

⁹Khopui ata nangni lasuak ki ta, nam danghai kuta manin om nin ti, nin chungthu rêl an ti.

¹⁰Khandaiin thi ni nin ta, Israel ramri ngeia khan nin chungthu rêl ki ti; khanchu kei hi RENGPA chu ki nih ti inhriat ta nin ti.

¹¹Sa suangna bêla sa a ihôi loi anga hin, khopuiin nang saninzôk no ni,

¹²RENGPA chu ki nih ti inhre ta nin ti; ki dân siama kalchôi mak chêia, ki thusuak khom zôm ual mak chêi; nin vêla namhai tho dân chu nin zôm ual tâka,” a tia.

¹³Khan, thu ki hril lai khan Benaia nâipa Pelatia chu a thi tâka. Khan ki hmâi hnuai sikin kin bokhrupa, hnukirhâi inringtakin ki khêka, “O RENGPA PATHIAN! Israel la om sunhai hi ni inboipai zit hrang ma ni?” tiin.

¹⁴RENGPA thu chu ki kuang a zuang tunga,

¹⁵“Mihriam nâipa,” ni urênghai, nir chi le ni irkaipuihai ngei le Israel in sûnghai murdi, an rêngin, Jerusalem luahaiin, “RENGPA ata fesuak roi, hi ram hi kin ta hranga pêk a ni tâk e,” an tihai kha an ni.

¹⁶Khasikin, RENGPA PATHIANIN hiang hin a ti, “Hlataka namhai laia nangni ki thonpaia, ram tamtaka nangni ki inthekindarh nâkin, zoro sôtloite sûngin an hong tungna rama khan an ta hrangin hmun irthiang ni ki ti,” a tia.

¹⁷Khasikin RENGPA’N hiang hin a tia, “Nam danghai ata chu nangni hruaikhôm nôk ki ta, inthekindara nin omna ramhai ata nangni koikhôm nôk ki ti, Israel ram chu nangni pêk ki ti.

¹⁸Khatak ata hong an ta, thil intiromhai murdi le thil porinchehai murdi chu lâkpai an ti.

¹⁹Anni chu lungrîl hmunkhatin siam ki ta, lungrîl thar pêk ki ti; khan an taksa ata lungrîl lung anga ngar chu la ki ta, an kuanga khan taksa lungrîl irnêm pe ki ti.

²⁰Ki thu inkunga an fe theina hrang le, ki dânhai chu an inkola, an tho theina hrangin; khanchu, ki mihai hong ni an ta, kei khom an Pathian ni ki ti.

²¹Khannisianlân, an innimna le an porinchena kha lungrîla la zômhai rêk chu an sual mô chu an chunga inkhumtir ni a ti, RENGPA PATHIANIN a ti,” tiin.

²²Khanchu, cherubhaiin an mithahai chu an inzara, an sîra khan thîrsakor kehai chu a oma; Israelhai Pathian roiinpuina chu an chunga a oma.

²³Khan, RENGPA roiinpuina chu khopui lai rengata a hong suaka, khopui nisua tiang sîra om, tâng chunga khan a hong ngîr tâka.

²⁴Irtha khan a nin domirsânga, inlârnaa khan Pathian irtha’n Babulon rama sala intânghai kuanga khan a nin tunga. Khanchu inlârna ki ihmu khan chung tiang a ni fesan tâka.

²⁵Khan, sala intânghai kuanga RENGPA’N ki kuanga a nin entir tâk thilhai murdi chu ki hril tâka.