Read Hrangkhol EZEKIELA 12 Bible Online

EZEKIELA 12 - Hrangkhol bible

EZEKIELA 12

¹RENGPA thu chu ki kuang a zuang tung nôka,

²“Mihriam nâipa, mi tehelzong insûngkua, hmûna hranga mit neia hmu loihai, inhriatna hranga mikuar neia inhriat loihai laia om ni ni, mi tehelzong in sûngkua an lei ni ngaia.

³Khasikin, nang mihriam nâipa, sala intângnaa fe hrang angin ni neinunhai intêl infelin lân, khan sûn khovâra an mithmu ngêta sala intâng hrangin fesuak ro, an mithmu ngêta hi hmun ata hmun danga irson ro, tehelzong insûngkua an nina kha, an ngaitua thei nâk mo.

⁴Khan, ni neinun chu sûn khovâra an mithmu ngeia sala intâng fe hranga a neinun a ilâksuak angin lâksuak ni ta; khan, sala intâng fe hranghai tho angin khohloi tiang zoroa an mithmua nang ngei chu fesuak roh.

⁵An mithmua bang chu inverin lân, khataka khan ni neinun chu lasuak roh.

⁶An mithmu ngeia khan ni puak chu ni dârsuama irput ni ta, inthim kâra ni isuakpui hrang a ni. Irnênga lampui ni hmu thei loina hrangin ni mit kha puan leh tuam ro; Israelhai ta hrangin irsinsianaa nang ki isiam hrang a ni,” a tia.

⁷Khan, thu ni ni ipêk angin ki tho tâka; ki neinun chu sala intâng hrang neinun angin sûn khovâra ki lâksuaka, ki kutin bang chu khohloia ki’r-ônga, inthim kâra ki hong lâksuaka, an mithmu ngeia ki dâra ki’rput tâka.

⁸Khan, a tûk zînga chu RENGPA thu chu ki kuang a zuang tunga,

⁹“Mihriam nâipa, Israel insûng, tehelzong insûngkuahai khan ni kuang, Imo ni itho tâk? an itih a ini loi mo?

¹⁰A kuanga khan RENGPA PATHIAN khan hiang hin a ti. Hi thu inpuang hi Jerusalem hruaituhai le Israel insûngkua pumpui, an omna mihai chungthu hrang a ni.

¹¹Nin ta hrangin lei entîrna ki ni hi, ki iti ang hin an chunga tih ni a ti; thonpaiin, sala intâng hrangin, la fe an ti, ti roh.

¹²Khan, an laia hruaitu om khan inthim hnuaia koiin irput a ta, fesuak a ti. Khataka pêlsuakna hrangin bang chu inver ir-ông an ti, a mitin ram chu a hmu loina hrangin a hmâi chu tuam khak an ti.

¹³Ama chu ki lênin khum ki ta, ki chânga khit a ti: Kaldai rama Babulon-a khan hong hruai ki ta, kha khan thi hrang ni khom sianlân, hmu chu hmu no ni.

¹⁴Ama changpui hranga a kôla om ngaihai le a changpui hranga a hrungtuhai murdi ram tina irthekindarh an ta, khandai irlekin om ki ti.

¹⁵Khan, namhai laia inhnotsuak ki ta, ram tina ki inthekindarhai tika khan RENGPA chu ki nih ti inhriat an ti.

¹⁶Aniachu, khandai hai, châm hai, hripui hai inlêngtir ki ta, kha laia khan mi tômte zôk an ti; khahai khan an lei hongna rama namhai kuanga khan an porinchena murdi chu an inpuangna’n; khan kei hi RENGPA chu ki nih ti inhriat an ti,” a tia.

¹⁷Khan, RENGPA thu chu ki kuang a hong tung nôka,

¹⁸“Mihriam nâipa, ni bu kha inthing pumin fa ro, ni tui chu kamanga inthing pumin in ro;

¹⁹khan, kha rama mipuihai kuanga khan, RENGPA PATHIAN khan, Jerusalema omhai chungchânga le Israel ram chungchânga hin hiang hin a ti: ‘An buhai chu inret takin fâk an ta, an tui chu kamang takin in an ti, a ram chu a sûnga omhai sual porinchena sikin a sûnga thil om murdi ata ramchitin om a ti.

²⁰Khan, mi lêngna khopuihai chu siat chit a ta, a ram chu ramchitin om a ti. Khanchu RENGPA chu ki nih ti inhriat an ti,’ tiin hril ro,” a tia.

²¹Khan, RENGPA thu chu ki kuang a zuang tunga,

²²“Mihriam nâipa, Israel rama hin thuvâr tôi nin inei hi itina ma ni? ‘Nikhua a hong sôtin inlârna tina a rongin a om mai ngai,’ nin iti hi.

²³Khasikin RENGPA PATHIAN khan hiang hin a ti: Hi thuvâr tôi hi kin boipaia, Israel rama thuvâr tôia hmang ta ngai mahai; sûn chu anai tâka, inlârna tinrêng tung indik nî hrang chu, tiin an kuanga hril lem roh.

²⁴Israel insûngkua laia inlârna zuang tung rêng rêng le tasân sa lama hrilinsiatna rêng rêng om ta no ni.

²⁵RENGPA chu ki nia, hril ki ta, ki thu hril chu tung zôi zel a ti, khêkin hril ni no ning. O tehelzong insûngkuahaio, nin dam lai ngêt hin thu hril ki ta, ti hi RENGPA PATHIAN thusuak a ni,” a tia.

²⁶RENGPA thu chu ki kuang a zuang tung nôka,

²⁷“Mihriam nâipa, irngai ro, Israel insûngkuahaia mi khan, ‘Inlârna a hmuhai chu nakana mi hrang an nia, a lei hril diamnahai khom hlataka mi hrang a ni,’ an iti a ni.

²⁸Khasikin an kuang, RENGPA PATHIAN khan hiang hin a tia: ‘Ki thu rêng rêng hi khêkin hril ni no nia, ki thu hril murdi chu tung irkipin om zêl a ti,’ ti hi RENGPA PATHIAN thusuak a ni, tiin hril ro,” a tia.