Read Hrangkhol EZEKIELA 13 Bible Online

EZEKIELA 13 - Hrangkhol bible

EZEKIELA 13

¹Khan, RENGPA’N thu chu ki kuang a zuang tung nôka,

²“Mihriam nâipa, Israel deipu, mâni lungrîl suak ata thu hril hmanghai chunga khan thu hrilin lân, RENGPA thu chu irngai roi,

³RENGPA PATHIAN khan hiang hin a tia: Deipu invêt, mâni ngaidân zuia, ite hmu loihai chu an chung a rik e!

⁴O Israel, ni deipuhai chu rama sihal ang dên an ni ta.

⁵RENGPA sûna irdoinaa inding ngam hrangin a râl chi lai irtong ngam loiin, Israel insûngkuahai hrung le rakhâl hrangin kâmnang mak chêi.

⁶RENGPA thusuak a ni titu khan ite ni loi le lei hrilna milak an changa, RENGPA itîr an ini loi rêng rêng a ni; an thu chu a ini ngêt hrang angin mihai an in-iamtirhaia.

⁷Inlârna zuang chum mai nin hmu’n thu leihrilna dik loi nin ihril mo ni ma? RENGPA thusuak a ni, nin la ti nôk maia, keiin khaang khan ite lak hril ma unga.

⁸Khasikin RENGPA PATHIANIN hiang hin a ti: Ite ni lo loi nin hrila, milak ma mai nin hmu sikin, irngai roi nangni doi hrang ki ni, ti hi RENGPA thusuak a ni.

⁹Khan, ki kut hin thu dikloi hriltuhai le deipu tep loi ma mai hmutuhai chu doi ki ta, ki mihai inkhômnaa khan om sa thei no nihaia, Israel insûngkuahai irhming irziakna bua khan irziakin om no nihai; Khanchu RENGPA PATHIAN chu ki nih ti inhriat nin ti.

¹⁰Irtharngamna om loia, ‘irtharngamna a ni e,’ tia ki mihai an hruai insuala, irngeina om maka, mi banghai an siama, khan deipuhai chu hongin a chung kha an hong nâl inngoi zuaka.

¹¹An banghai kha chim hrang a ni ta tiin deipuhai kha inhrilhai roh. Rotui zuan thotir ki ta. Irialhai indêngtir ki ta, kêllaiherin sêm inzuan ki ti.

¹²Khan, irngai ro, bang chu chim zoiin, an iti loi hrang ma ni?

¹³Khasikin RENGPA PATHIAN khan hiang hin a ti; ki ninginmur phâivuapui irkhêl takin insiat zit ki ta, ki ninginmurin ropuivânsâng zuang tho a ta, ki ninginmurin irial irkhêl takin bang zuang insiat zit a ti.

¹⁴Khanchu, bang an inâl inngoi kha insim ki ti, irnêng dênin zuan thâk ki ti, khanchu a lungphunhai khom inlang zit a ti. Khan, a bang chim a ta, a bang chima khan irhmang chitin om nin ta; khanchu RENGPA ki nih ti inhriat nin ti.

¹⁵Hiang hin bang chunga le a nâl inngoihai chunga ki ninginmurna insum ki ta; khan, ‘Bang chu om ta no ni, a’rbeltuhai khom om viat ta no nihai.

¹⁶Kha kha Israel deipu Jerusalem chungthu hrila, irtharngamna om loia, irtharngamna irhmutirtuhai ngei kha, om ta no nihai, ti hi RENGPA PATHIAN thusuak a ni.

¹⁷Khan, nang mihriam nâipa, ni mihriam nâinuhai, an lungrîla irthoka thuhriltuhai, ni mihai nâinuhai tiang irnghatin lân, anni doi lamin thu hril roh.

¹⁸RENGPA PATHIAN khan hiang hin a ti: Nupang, mihai bâna thil inbuntir le mi hringnahai chel bêna hranga mi lian mi chîn lu irkhûna insuituhai kha an chung a rik e! Mâni hringna hrangin ki mihai hringna nin ichel hrang mo?

¹⁹Barli tômte le bai tiam hmu hranga thi loi hrang inthotir hrang le hring loi hrang inhringtir hrangin nin milak insîr hi mihaiin an iam sikin ki mihai laia ki’rhming nin porinchetir a ni.

²⁰Khasikin, RENGPA PATHIAN khan hiang hin a ti a ni: “Irngai ta roi, mi hringna, vâ anga man hranga nin thil inbuntirhai chu phôipai zit ki ta, mi nin imanhai hringna chu insua zit ki ti; vâhai anga nin man hranghai hringna ngei chu.

²¹Nin lu irkhûnahai khom chu inpotthêr ki ta, ki mihai chu nin kut ata insua ki ta, nin man thei hrangin nin kuta om ta mahai; khanchu RENGPA chu ki nih ti inhriat nin ti.

²²Keima beiindongtir ni maka, mi felhai lungrîl sunin nin innatir sik le mi sualhai chu hring dama la omna hranga an sualna lam ata irlet loina hrangin mi sual kuthai chu nin inhrâta.

²³Khasikin, ite ni loia, thu leihrilna dik loi mani chu hmu viat ta no chin ni; khan, ki mihai chu nin kut ata sansuak ki ta, RENGPA chu ki nih ti inhriat an ti, a ti ti’n hril ro,” a tia.