Read Hrangkhol EZEKIELA 14 Bible Online

EZEKIELA 14 - Hrangkhol bible

EZEKIELA 14

¹Khanchu Israel upa senkhathai chu ki kuanga an honga, ki kôla an toia.

²Khan, RENGPA thu chu ki kuang a zuang tung tâka,

³“Mihriam nâipa, hi mihai hin an millimhai makunga an sualna irtetna chu an sia a ni; keima’n sâmna ki la ipêk hrang an la isôn ma ni?

⁴Khasikin, an kuang thu hril inlân, RENGPA PATHIAN khan hiang hin a ti a ni: ‘Israel insûngkuaa mi tinin an lungrîla an millimhai an lâk lûta, an millimhai makunga an sualna irtetna an siaa, deipu kuanga hong murdi chu kei RENGPA hin an millim tamzia ang zêlin sâmhai ki ti;

⁵Israel insûngkuahai chu an millim sika an ni irheisan tâk sikin an lungrîl tak ki man theina hrangin zuang sâmhai ki ti.

⁶“Khasikin Israel insûngkuahai kuanga, RENGPA PATHIAN khan hiang hin a ti: Hong kîr unglân, nin sual porinchena murdi chu hong irheisan ta roi.

⁷Israel insûngkua laia mi tukhom ni sian, mikhual Israel rama omhai mani, keima nir heisan, an lungrîla an sual irtetna kha sia sûngin, an chungchânga nir don hranga deipu kuanga hong chu kei RENGPA ngêt hin sâmhai ki ti.

⁸Kha mi kha chu doihai ki ta, ki mihaiin enbîka an hril insiathai theina hrangin ki mihai lai ata inboipaihai ki ta; khanchu kei hi RENGPA chu ki nih ti nin hriat an ti.

⁹Khan, deipu’n inthêma omin thu hril sianlân, kei RENGPA hin deipu chu ki ihuang a nia, a chunga khan ki kut irlek ki ta, ki mi Israelhai lai ata inboipaihai zit ki ti.

¹⁰Khan, an sualna man chu anni ngêtin pêl an ta; deipu sualna chu ama kuanga zongtu sualna ang ngêt chu ni a ti.

¹¹Israel insûngkuahai chu keima rengata an pêt ta loina hranga, an insiatnahai murdia an porinche ta loina hrangin, ki mihai an ni theia an Pathian ki ni theina hrangin RENGPA PATHIANIN a ti,” a tia.

¹²Khan, RENGPA thu chu ki kuanga a zuang tunga,

¹³“Mihriam nâipa, a ram mihaiin insiatna thil thoa, ki chunga thil insuala, keiin ki kut inlekin, an bu, hringna bul chu kin siata, an chunga châm intungtira, mi le sahai ki zuang inboihaiin,

¹⁴hi mi pasal thum Nova, Daniela le Joba-hai ngei khom hi hong om sahai sianlân, an felna’n anni hringna vai an inzôk hrang a ni, ti hi RENGPA Pathian thusuak a ni.

¹⁵“Ram sahrânghai an ram kin fe suaktira, ram chu an inpon chitin, lei sêhaiin, ramsa sika mi tûte fe ngam loiin omhai sian;

¹⁶hi mi inthumhai hi omhai sian khom, RENGPA PATHIAN khan, ‘Kei hi ki hring sûng an nâinuhai, an nâipahai chu sansuak no nihai; anni vai saninzôkin om an ti, ram chu inthim valin mâkpai ni a ti,’ a tia.

¹⁷“Aninole, kha rama khan, khandai zuang irlek ro, ki ti’n chu mi le sa murdi chu that zit ni a ti,

¹⁸hi mi pasal inthumhai hi omhai khom sian, a hringa ki hring sûng chu, ti hi RENGPA PATHIAN thusuak a nia, an nâinuhai an nâipahai sansuak thei no nihai, anni hringna vai inzôkin om an ti.

¹⁹“A ni no le, kha rama khan, hripui inlêngtir ki ta, mihriam le ramsa inboi hranga, thisen insuaa ki ninginmurna chu ram chunga ki zuang buakin,

²⁰Nova, Daniela le Joba hai lua khom hi lei om nohai sianlân, kei RENGPA Pathian hring ki ni, ti hi RENGPA PATHIAN thusuak a ni, an nâinu mani, an nâipa mani sansuak no nihaia, an felna’n anni hringna vai sansuak thei chak an ti.

²¹RENGPA PATHIAN khan hiang hin a tia: Jerusalem chunga ki roirêlna natak tak minlikhandai hai, châm hai, ram sahrâng hai, hripui hai, mihriam le ramsa hai inboipaihai zit hranga ki zuang tîr irkip tika chu itin takin mo a iom hrang na!

²²Aniachu, irngai ta, khataka omsun hruaisuak hranghai chu mâkin om an ta, an nâinuhai le nâipahai khom; irngai ta, nin kuanga hong suak an ta, an omdân le an sinthohai hmu nin ta, khan, Jerusalem chunga thil saloi ki zuang intung thua khan irtharngamin om nin ta, a chunga ki zuang intung tâk murdi thua khom.

²³An omdân le an sinthohai nin hmu tika khan irtharngamin om an ta; a chunga ki sintho tâk murdi chu a san tak nei loiin ki itho loi ti inhriat nin ti, ti hi RENGPA PATHIAN thusuak a ni,” tiin.