Read Hrangkhol EZEKIELA 16 Bible Online

EZEKIELA 16 - Hrangkhol bible

EZEKIELA 16

¹RENGPA thu chu ki kuang a zuang tung nôka,

²“Mihriam nâipa, Jerusalem chu intiromnahai inhriat suaktirin lân, a kuang,

³‘RENGPA PATHIAN khan Jerusalem kuanga khan hiang hin a ti, ti ro: Ni suakna ram le ni’rzirna ram chu Kanaan mihai ram a nia, ni pa chu Amor mi a nia, ni nu chu Hit mi a ni.

⁴Khan ni suakna thua khan ni suak laiin ni milâi hrui ât ni maka, tuia infâi hrangin tuia irsiltir khom ni mak che; michi leh innôt khom ni mak che, puan luma tuam khom ni mak che.

⁵Ni chunga nang inren hrangin le hiang thilhai nang tho pe hrangin, mi tukhomin nang lunginkham mahaia; sahrok kâra inhnotsuak ni nia; khaang khan ni suak nî khan ni mi nitna chu porinche’n a hong om tâk.

⁶Khan, ni kuanga ki hongin thisen irpol zuakin nang ki hmua, khaanga thisen kâra ni iom kha, ni kuang, thisena om khomin lân “Hring ro, dam suak hrang ni ni” ki tia.

⁷Ramhnuaia hloisûl hloi hnâ angin nang ki don inliana, ni hong irsôn hlut hluta, ni hmêl khom a hong sa tiai tiaia, ni’rhnutehai a hong oma, ni samhai khom a hong saa, khannisian korongboi ang mai ni la ni.

⁸Khan, ni kuanga ki honga nang ki ena, irngai ta, inditom ni ni tâka, ki puan ki lâka, ni korongboi chu ki’rkhû tâka: khanchu ni kuang irkhâmna ki siama, thuthunga ki lûtpui tâka, ki ta tak ni ni tâka, ti hi RENGPA PATHIAN thusuak a ni.

⁹“Khanchu, tuiin nang ki’rsiltir tâka, a ni, ni thisen chu ki’rsunfâi invâra, sahriak nang ki’rpoltir tâka.

¹⁰Irvôna puanin nang ki tuama, savun kekok satak nang kin buntira, puan irnêm leh nang ki tuama, puanirlung nang kin khumtir tâk a ni.

¹¹Irvôna thilin nang ki’rvôtira, ni kuta bânhrial hai, ni hroka rângachak zîngziri irthei hai,

¹²ni hnâra hnârbet hai, ni mikuara bômzoi hai, ni lua rênglukhum satak tak haiin nang ki’rvôtir tâka.

¹³Khanchu rângachak le sumrua irvôtir ni ni tâka, ni puan diarhai chu puan irnêm tak le puanirlung le puan insui satak a nia; ni bu nêk chu bai tiam indi le khuaihlutui le sahriak a ni, ni hmêl a hong satak taka, rêngnu ang khom ni hong chuk a ni ta.

¹⁴Ni sa tâk sikin, nir hming chu nam tin laia an thangsuak tâka; ki roiinpuina tuamin ni hong irkip ta, ti hi RENGPA PATHIAN thusuak a ni.

¹⁵“Khannisian ni hmêl satna chu ni’riampui hraia, ni’rhming inthangna sika khan ni hura, notizuara ni hong om tâka, mi tukhom ni kuanga hong tâk murdihai chunga khan ni hrâtna chu ni phala; ama ta ni inih tâk a ni.

¹⁶Ni puan silhai chu ni khekin, irbôl hmunhai chu ze dang dangin ni’rvôtira; a chunga khan notizuarna thil chu ni tho tâka, khaang rêng rêng kha la ni ngai mah.

¹⁷Ki rângachak le ki sumru bêlbûr satak tak nang ki ipêk kha ni lâka, mihriam illim siamna’n ni hmanga, ni hurpui tâka.

¹⁸Ni puan sil insui satak takhai chu ni lâka, anni ni tuama, ki sahriakhai le mirimhoi chu millim makunga ni dara.

¹⁹Bai tiam nang ki ipêk tâk khom kha bai phit indi satak le sahriak le khuaihlutui leh nang ki infâ ngaihai kha an makunga mirimhoia hâl hrangin ni siaa; hi hi a hong ni tâk, ti hi RENGPA PATHIAN thusuak a ni.

²⁰Khakhêla khom, ni nâinu ni nâipa, ni inei pehai chu an kuanga irbôl hranga hmang zit hrangin ni pêka; ni hurna hi thil irnêp a ini ma ni?

²¹Ki nâihai ni thata, meipuia pai lûtin an kuang ni inhlanhai hi?

²²Intirom ni nina le ni hurna murdia khan nâipang ni ni laia, korongboia ni iom le ni thisena porinchea ni om lai kha ni inhriat ta loi a ni,” a tia.

²³Khan, hi ni sualna murdi hnunga khom, hi hi a hong nia, (ni chung a rik e! a rik e! RENGPA PATHIAN khan a ti).

²⁴Hmun inlârhai millim biakna le irzuarna hrang ni siama.

²⁵Lampui lian tina hmun inlârhai chu ni siama, ni satna chu intiromnaa ni siama, mi a hong murdi kuanga ni râi a fâna, ni hurna chu nin langtir ual tâka.

²⁶Ni tualbôm, Aigupta mi leh khan uire nin lei ni tâka; ni ninginmurtir hrangin ni hurna chu nin liantir ual a ni.

²⁷Khasikin, irngai ro, ni chunga ki kut irlek ki ta, ni bu nêk ngai pangai chu irkômtir ki ta, nangma nang hnôltu Filistia nâinu, ni hur dân inzakpui tak tak ngaitu kuanga khan pesuak ki ti.

²⁸Mumalboia, Assuria mihai kuanga khom notizuara ni lei irsiam tâka; a ni, an kuang notizuar thil chu ni lei tho khomin ni milung la chuk mah.

²⁹Kanaan rama, Kaldai mihai kuanga ni hurna ni la insua zêla, la khop ual mak che.

³⁰Ni lungrîla inzakna nei viat mak chea, ni nunzia chu nupang tukullian sual tak thil ni thoa, ti hi RENGPA PATHIAN thusuak a ni.

³¹Tuangpui lam rengata inlangna takhaia millim biakna hmunhai ni siama, lampui lianhai khan ni hmun irsânghai chu irzuarna hmun ni neia, khannisian, notizuar poisa innang hi ni mak che.

³²Mâni pasal lungthung loia uiresana, mi dang daih pom tâk ang hi ni ni.

³³Notizuarhai murdi kuanga khan mi’n thilpêkhai an pêk ngaia, nang rêk chu ni lungthunghai murdi chu thilpêkhai ni pêk ngaia, a nuampuhai kuanga ram tin ata hong an ta, nang an zâlpui theina hrangin ni hrilhaia.

³⁴Khan, nang chu notizuar danglam tak chu ni ni, tukhomin notizuara om hrangin nang siam mahai. Nangma’n a man ni pêka, mi tûte’n a man an ipêk loi hi ni danglamna chu a ni.

³⁵Khasikin, o mi hurnu, RENGPA thu chu irngai roh.

³⁶RENGPA PATHIANIN hiang hin a ti: “Ni lungthungtuhai kuanga ni irzukna zâra khan ni korongna chu hmusuak a ni, intir ni omna chu bunsuak a ni sik le; ni porinchena millim murdihai le an kuanga ni ipêk tâk ni nâihai thisen sikin,

³⁷irngai ro, ni irditpuihai murdi chu koikhômhai ki ta, inhoitaka ni lei ilêngpuihai murdi le, ni lei irditpui tâkhai murdi le, ni ihmumâkhai murdi le kil tina mi, ni kuang hong hruaikhôm ki ta, ni korongna murdi an hmu theina hrangin ni korongna chu inlangtir ki ti.

³⁸Khan, nupang pasal irsena, mâni nâi thisen insuak chungthu an rêl angin ni chungthu rêl ki ti; ninginmurna le ninginthikna chu ni chunga zuang intungtir ki ti.

³⁹Khan, anni kuta pêk ni ni ta, ni hmun inlârhai chu insiat an ta; ni hmun irsânghai insimpai an ta; ni puan silhai hlîkpai an ta, an irvôna thil hluhai chu lâkpai zit an ta; khanchu, korongboi le rongralin om rak ta ni ti.

⁴⁰Nangma chunga inkhômpuina nei an ta, lungin nang dêng an ta, khandaiin nang irchan chit an ti.

⁴¹Ni inhai chu meiin hâl an ta, nupang tamtak mithmua ni chunga roirêlna intung an ta, ni ihur hi inboi ki ta; ni irditpuihai chu thilpêk pe nôk thei ta no chi ni.

⁴²Khanchu ki ninginmurna ni chunga tâk a ta, ki ninginthikna chu boi ta a ti, dâihrekin om ta ki ta, ki ninginmur ngai ta no ni.

⁴³Thoibop ni chang lai zorohai kha inhriat mai ta mak chea, aniachu hiang thilhaia hin ki ning nin murtir tâk sikin, irngai ro, ni nunzia ang takin, ni chunga intungtir ki ti, ti hi RENGPA PATHIAN thusuak a ni: Khan, ni porinchena tinrêng belsa’n hi ni hurna hi tho ta no chi ni,” a tia.

⁴⁴“Irngai ro, hi thuvâr tôi hmang murdi hin hi thuvâr tôi hi hmang an ti, ‘A nâinu khomin a nu angin a om,’ ti hi.

⁴⁵Nang chu ni nu, mâni pasal le nâihai donsui loitu nâinu kha ni nia, nang chu ni zuarpuihai tiang khan, mâni pasal le nâihai donsui loitu zuarpui ni ni: ni nu lak Hit mi a nia, ni pa lak Amor mi a ni.

⁴⁶Khan, ni zuarpui ulian ual chu Samaria, ni vei tianga om ngai kha ama le a nâinuhai leh an ni; ni zuarpui nâipang ual lak chu, ni chang tianga om ngai kha Sodom le a nâinuhai an ni.

⁴⁷Khannisian, an omdânhai chu zui mak chea, an porinchenahaia khan ni milung chu chuk maka, aniachu zoro sôtloite sûngin ni omdân tinrênga anni nêkin ni siat uala.

⁴⁸RENGPA PATHIAN thusuakin hiang hin a ti: ‘Pathian hring ki ni,’ ni zuarpuinu Sodom le a nâihai khomin an itho ngai loi, nang le ni nâihaiin an itho tâk hi.

⁴⁹Khan, ni zuarpui Sodom sualna chu hi hi a ni: omlianna hai, fâk nêk khop hrai hai, ama le a nâinuhai inhoihôkna mai mai thohai an nia, mi inriang hai le fâk nêk irsamhai chu changpuihai mah.

⁵⁰Khan, mi omlian tak an nia, ki makunga thil porinche thohai an ni; khanchu sa ki iti ang takin anni chu kin boipaihai zita.

⁵¹Samaria khomin nangma sual ni tho chimrip khom tho ma, anni nêka sual porinche lian ual ni thoa, khasikin intiromna ni itho murdi khan ni zuarpuihai chu a felin ni inlangtir tâk a ni.

⁵²Ni zuarpuihai dik uala ni inlangtir sikin nang ngêtin ni mualinphoina sual chu ni ipêl hrang a ni, anni nêkin thil porinche lian ual ni thoa, ni sualnahai sikin anni chu nangma nêkin an ifel ual a ni; ni zuarpuihai fel uala nin langtirnaa hin nang chu inzak le mualinphoi tuangin om ro,” a tia.

⁵³Khan, “Sodom le a nâihai chu indingsuak ki ti; Samari le a nâihai khom indingsuaktir nôk ki ti; anni pâl chanpui, nang khom nang indingsuaktir ki ti.

⁵⁴An ta hranga irtharngamtu ni lei nia, ni thil lei tho tâkhai murdia khan inzaka, ni mualinphoina chu ni pêl theina hrangin.

⁵⁵Ni zuarpui Sodom le a nâinuhai, Samari le a nâinuhai chu an omdân matona angin om nôk an ti; nang le ni nâinuhai khom matona nin omdân angin om nôk nin ti.

⁵⁶Ni sualna hmusuak a ni mâna, ni omlian ni tho laia khan ni zuarpui Sodom chu khosâl hnôkna ni itho mo ni ma?

⁵⁷Atûn chu Suria nâinu le a vêla mi murdi, Filistia nâinuhai ni vêla nang hmusittuhai hrilsiattu hong ni tâk hi.

⁵⁸Ni hurna le ni porinchena hrema ni’rput zêla,” ti hi RENGPA thusuak a ni.

⁵⁹Khanchu RENGPA PATHIAN khan hiang hin a ti: “Thuthung insiatin, chonginkung nir ngaisak loizia ang zêlin ni chunga ki itho hrang a ni.

⁶⁰Khannisianlân, ni nâiinpang laia ni kuanga ki thuthung chu kin hriat maia, ni kuanga kumkhua thuthung siam ki ti.

⁶¹Khanchu ni zuarpuihai, ni u le ni sanghai ni pom hnunga ni omdânhai hong inhriatsuak ni ta, lan zak ni ti: anni chu ni nâinu ta hrangin pêk ki ti, ni thuthung sika khan chu ni loiin.

⁶²Ni kuanga ki thuthung kin dettir tâka, RENGPA ki nih ti inhriat ta an ti.

⁶³Ni sintho murdihai ki ngaidam zit tika inhriat ni ta, ni hmâimôk rup a ta, inzak sikin ni bâi a kak thei ta loina hrangin,” ti hi RENGPA PATHIAN thusuak a ni.