Read Hrangkhol EZEKIELA 17 Bible Online

EZEKIELA 17 - Hrangkhol bible

EZEKIELA 17

¹Khan, RENGPA thu chu ki kuang a zuang tunga,

²“Mihriam nâipa, Israelhai kuanga thukhir le chongirkhek thu hril ro,

³RENGPA PATHIAN khan hiang hin a ti: Irmupui roiinpui tak, mitha roiinpuitak le irmei sei takhai nei, mula sip, ze dang dang nei chu Lebanon-ah khan a honga, sidar thing rêla khan a chuanga;

⁴a rêl vîktak chu an khiaka, bepâr thôna rama a vuangpuia, bepâr thôna khopuia a phun tâka.

⁵Khan, kha rama thing chiak chu a lâka, irnêng satna hmuna a phuna, tui tamtak kôla khan a phun tâka, a laia a’rsôntir hrangtu tui khom a om maia.

⁶Khan, a hong irsôna, grep hrui irhnuai taka irzâm a hong ni tâka, a ônhai chu irmupui tiang a’rzâma, a’rzunghai chu irnêng inthûk taka khan a lûta, khanchu grep kung a hong nia, a ônhai a hong inchera, a hnâ chu a hong suak tâka.

⁷Irmupui lian tak dang a om saa, mitha roiinpui tak le mul tamtak nei a oma; khan irngai ro, hi grep kung hi ama tiang a zu irzâma; a phunna hmun rengata khan ama tiang a ônhai an cher suak tâka, ama chu tuiin a buak mai theina hrangin.

⁸A ônhai a hong suaka, grep satak a ni theina hrangin tui tamtak kôla irnêng satnaa phun a ni.

⁹“RENGPA PATHIAN khan hiang hin a tia: A ihong lian thei hrang ma ni? A hnâ incher tharhai murdi chu a thêm theina hrangin a’rzunghai chu phôi dokin, a rahai chu sâtthâk loi hrang ma ni? a’rzunghaia phôidoktu hrang mi tamtak le sinthotheina nei lian tak khom nang ual no ni.

¹⁰A ni, irngai ta, phunin om sian khom a hong ilian thei hrang ma ni? nisua tianga phâivua’n a hong sêm tika chu, a ithêm zit loi hrang mo? A môngna hmuna irthok ngêta khan thêm a ti,” tiin.

¹¹Khan RENGPA thu chu ki kuang a zuang tung nôka,

¹²“Tehelzong insûngkuahai kuanga khan hril ro, hi thil omzia hi an inhriat loi ma ni? Hril ro, irngai roi, Babulon rêng chu Jerusalem-a a honga, an rêng le hruaituhai chu a manhaia, ama kuanga Babulon-a a hruaia,

¹³rêng sûngkua laia mi inkhat a hruaia, ama leh thuthung a siampuia, iamom taka om hrangin khomâk a’rsâmtira, a rama mi lianhai chu a hruai paihai zita;

¹⁴an lalna ram kha a hong irhnuaia, a bingin an dingsuak thei loina hrangin, le a thuthung kha an vong nôk mai theina hrangin.

¹⁵Khannisian, Judai ram rêng chu tehelin, sakorhai le sipai tamtakhai a hong tîr theina hrangin Aigupta rama palai a tîra. Hlochukin mo om ni! khaanga thotu khan a irsaninzôk thei hrang ma ni?

¹⁶“Pathian hring ki ni,” ti hi RENGPA PATHIAN thusuak a ni. “Inlaltak, rênga siamtu, a chonginkungna hai hmusit le a thuthunghai an siat sikin kha rêng kha Babulon ngêta thi a ti.

¹⁷Irdoinaa mi tamtak thatna hrangin pil bun inpônghai le kul bang an siam tena chu Faroa sipai hâitakhai le a pôl roiinpui tak khomin ite san thei ta no nihai.

¹⁸A thuthungna le a chonginkungna chu an siat tâka; chong an kung hnungin hi thil murdi hi a la tho nôk sikin, zôk ta no ni,” a tia.

¹⁹Khasikin RENGPA PATHIANIN hiang hin a ti: “Pathian hring ki ni, ki chonginkungna hmusita, ki thuthung vong indik hranga ki iti kha an siat sikin ama chu hrem ki ti.

²⁰Lên dâp ki ta, ki chânga khan khit a ta, Babulon-a hruai ki ti. Khanchu ki chunga siat a ithôna sikin ama chu hrem ki ti.

²¹Khan, a sipai hrâttak takhai chu irdoinaa chem leh that zit ni an ta, a hringa la zôkhai chu ram kil tina inthekindarh zit an ti. Khanchu kha hriltu kha kei, RENGPA ki nih ti nin hriat an ti,” a tia.

²²RENGPA PATHIANIN hiang hin a ti: “Sidar thing irsâng tak rêlvîk chu la ki ta, a dôn irzîk kha khiak ki ta, Keima ngêtin tâng irsâng chunga khan phun ki ti.

²³Israel tâng irsâng khan phun ki ti, a ônhai hong zap a ta, hong ra a ti. Sidar thing roiinpui tak la ni a ti. a hnuaia khan chunglêng va chi tinrênghai chu om an ta, a ôn hnuai dâihlîmhaia khan om an ti.

²⁴Khanchu, kha rama thing murdihaiin, kei RENGPA PATHIAN hin thing irsânghai chu irhnuaitira, thing irhnuaihai chu irsângtira, thing hringhai chu inchârtira, Thing chârhai chu inhringtir ki ti, ti inhriat an ti. Kei RENGPA hin ki hril tâk chu, ki tho ngêt ngai a ni,” a tia.