Read Hrangkhol EZEKIELA 18 Bible Online

EZEKIELA 18 - Hrangkhol bible

EZEKIELA 18

¹RENGPA’N a ni chongpui nôka:

²“Israel ram chungchânga hi thuvâr tôi an ihmang, pahaiin grep thûr an fâka, an nâihai ha a kim, ti hi itina mo a ini?

³‘Kei hi Pathian hring ki ni, Israel-a, hi thuvâr tôi hi hmang nôk le hril nôk ta no nihai,’ ti hi RENGPA PATHIAN thusuak a ni.

⁴Irngai roi, hringna murdi hi ki ta zit a ni, pa hringna ki tah a ini angin, nâipa hringna khom ki ta a ni; thil tho insualtu murdi thi an ti.

⁵Khannisian, mi’n sin sa a thoa, irthiang le dik vai a thoa,

⁶irbôlna hmuna hruaithêna bu fâk loia, Israel insûngkuahai millim chu biak loia, a tualbôm dôngma chunga khom thilsual tho loia, nupang fel loi lai khom tôn loia,

⁷tûte chunga thilsual tho loia, thil pûktu’n a neinun bândaa a isia khom pe kîr nôkin, phîngchâmhai kuang fâk hrang pêkin, puan sil diarkai boihai chu silkai pehaia,

⁸a pung omin sum le puan khom inpûktir loiin, a pung khom la ual loia, thil saloi tho hranga a kut insum thei mi, mi le mi kâra roirêlna dik tho ngaia,

⁹ki thupêkhai zôma, ki dânhai vong insa chu mi diktak a ni, hring ngêt a ti,” ti hi RENGPA PATHIAN thusuak a ni.

¹⁰Khannisian kha mi khan, inrûk tho ngai mi le mi that ngai mi nâipasal nei sianlân,

¹¹kha nâipasal khan a pa itho ang tho nuam loiin, irbôlna hmun, hruaithênahaia khan a kopa, a tualbômhai dôngma khom siatpuiin,

¹²inriang le mi irsamna neihai deng an theihaia, a huanghaia, mi’n neinun bândaa an isia khom pe kîr loiin, millim biakin, thil porinchehai a thoa,

¹³a pung irzûla sum mi inpûktirin, a ihring hrang ma ni? Hring viat no ni; hi thil porinche murdi hi a tho sikin, a ithi ngêt hrang a ni, ama thisen moh chu ama chunga ngêt tung a ti.

¹⁴Khan, irngai ro, kha mi khan nâipa hong nei sianlân, a pa thilsual tho tâk murdi kha a hmua, a chia, kha thilhai kha tho nuam loiin a oma.

¹⁵Irbôlna hmuna hruaithênaa khom fâk nêk fa sa loia, Israel mihai millim tiang irhei loia, a tualbômhai dôngma khom siatpui loia,

¹⁶tûte chunga thilsual tho loia, neinun inpûk bânda thil khom la loia, tûte huang loia, phîngchâmhai fâk nêk pêka, korongboihai puandiar silkai pêka,

¹⁷sual chu tho nuam loia, tangka sum khom a pung omin mi inpûktir loiin, diktaka thil thoa, ki thupêkhai zômtu a ni’n chu, a pa sualnahai sikin ama chu thi no nia, hring ngêt a ti.

¹⁸Khannisian, a pa khan chu mihai a huanga, deng an theihaia, mi tin chunga sinsiat a tho mai ngaia, khasikin, kha pa kha chu a sin sualnahai sikin a ithi ngêt hrang a ni.

¹⁹Khannisian, itho mo a nâipa’n a pa sualna mô a iphur loi hrang? nin ti ngai. Nâipa khan dân chu a zôma thil fel a thoa, ki dân siam murdihai chu zômin a pom zita ni’n chu hring ngêt a ti.

²⁰Thil sual thotu chu thi ngêt a ti, nâipa khan a pa sualna mô pêl no nia, pa khomin a nâipa sualna chu pêl no ni; mi dikin a dikna man hmu a ta, mi sualin a sualna man hmu a ti.

²¹Khannisianlân, “Mi sualin a thil tho insual murdihai a mâksana, ki dân siamhai a poma, dân chu a zôma thil dik le sin sa a tho’n chu, hring ngêt a ti, thi no ni.

²²A sin sual tho tâkhai chu inhriat mai ni ta no nia, sin sa a ithônaa khan hring a ti.

²³Mi sual an thia hin ki ilôm hrang ma ni? an nun hong irleta, nun thara an iom hi ki ilôm ual loi hrang mo?” ti hi RENGPA PATHIAN thusuak a ni.

²⁴Mi sa khomin thil sa mâksanin thil sual a thoa, mi sualhai itho anga thil porinche tinrêng a tho hin a ihring hrang ma ni? A sin sa thohai chu inhriat mai ni ta no nia, a thilsual thôna le a inchâina sika khan thi zel a ti.

²⁵Khannisian, RENGPA sintho dân hi dik ma, nin ti ngaia. Israel insûngkuahaio, irngai roi, ki tho dân a idik loi mo? nin sintho dân hi a idik loi mo ni ma?

²⁶Mi dikin a diknahai a mâksana, thilsual a tho’n chu thi a ti, thil sual a itho ngêta khan thi a ti.

²⁷Mi sual khomin a sin sual thohai a mâksana, dân chu a zôma, thil dik le sa a tho’n chu a hringna inzôk a ti.

²⁸A milunga ar ngaituaa, a lei tho insualna murdihai a mâksanin chu hring a ti, thi viat no ni.

²⁹Khannisian, Israel mihai khan, “RENGPA hin mumal neiin sin tho ma,” an tia. Israel mihaio, mumal nei loiin sin tho ma unga, nangni omdân hi a idik loi mo ni ma?

³⁰Khasikin, O Israel mihaio, mi tin an omdân ang zêlin roirêl ki ti, ti hi RENGPA PATHIAN thusuak a ni. Irlet unglân, nin sualna murdihai chu masan zit roi; khanchu, nin sualnaa khan siatna tok ta no chin ni.

³¹Nin sintho insualnahai chu pai unglân, ngaituana thar le milung thar irput roi. Israel mihaio, itho mo thi nin ta?

³²Mi an thi hin lômna nei viat ma ung, ti hi RENGPA PATHIAN thusuak a ni, khasikin, “Nin sual ata irletin om roi,” a tia.