Read Hrangkhol EZEKIELA 19 Bible Online

EZEKIELA 19 - Hrangkhol bible

EZEKIELA 19

¹RENGPA’N Israel rênghai ta hrangin sûnna hla phua inlân, hiang hin ti roh.

²Ni nu hi i mani? Kâmkeibaknei pui a ni; kâmkeibaknei vânglaihai laia inbokin a nâi an fâa.

³A tehai laia inkhat chu an fâ inliana, kâmkeibaknei tuai a hong nia, Sa chel dân ar chua, mihriam khom a sê tâka.

⁴Nam danghaiin an inhriatin, châng khur an choia, a tâk tâka; Thîr hrui an inbuntira, Aigupta rama an hruai tâka.

⁵A nu’n a nghâk maia, a sabeina tak a boi tah ti an hriatin, A te dang an fâ inlian nôka, kâmkeibaknei tuaia a siam nôka.

⁶Kâmkeibaknei danghai laia a suk a tungin a’rlonga, Kâmkeibaknei tuai a hong nia, sa chel dân ar chua, Mihriam sêtu a hong ni tâka.

⁷An kulhai chu an siata, an khopuihai an siatpaia, An hrûm irhâi chitna khan tûte suak ngam zel om mahai.

⁸Nam danghai khan an hong doia, Ram kil tin ata an honga, Lên châng an hong kaizara, an khuma, an chel tâka.

⁹Thîr hrui an inbuntira, koka an khuma, Babulon rêng kuang an hruaia, Israel tâng rama an hrâm irhâi an inhriat ta loina hrangin.

¹⁰Ni nu chu grep kung ivadung kôla irhuana phun ang hi a ni. Tui a tam sikin ra nuam tak le a ôna hnâ sipin a hong om ta.

¹¹A ôn ngartakhai chu rêng roirêltu hmola hmang a hong nia, A kung chu sûm phâk rak dôrin a’rsânga, ôn tamtakhai laia ar sâng bîk sikin an en sup sup tâk a ni.

¹²Khannisian, ningmurna sikin phôipaiin a oma, Irnênga an pai raka, nisua tianga phâivua’n a sêm inchâra, A ra a chil zoi tâka. A ôn liantak takhai khom chu kiakpai a hong nia, a châr tâka, meiin a kâng irhmang zit tâka.

¹³Khan, atûn chu ramkâra, ramchâr le tui boina hmuna phun sonpai a ni ta.

¹⁴A ônhai rengata mei a hong suaka, a rahai a kâng irhmang zita, Khasikin, ôn ngartak khom roirêlnaa rêng hmola hmang thei khom om ta mah. Hi hi beidongna hla a nia, sak mai hrang a ni.