Read Hrangkhol EZEKIELA 20 Bible Online

EZEKIELA 20 - Hrangkhol bible

EZEKIELA 20

¹Hiang hin a nia, kum sari kum tha ringana, tarik sômhni nî khan Israel upahai chu RENGPA irdon hrangin an honga, ki hmâi makunga an toia.

²Khan, RENGPA’N hiang hin a nin hrila,

³“Mihriam nâipa, Israel upahai kuang khan hiang hin ti ro, RENGPA PATHIAN khan hiang hin a ti: thu nir don hranga hong mo nin ini? Pathian hring kêng ki ini, nangni thu nir donin om ning, ti hi RENGPA PATHIAN thusuak a ni.

⁴“Mihriam nâipa, annihai hi an chunga roi ni irêl loi hrang mo? An pahaiin thil porinche an itho kha hril ro;

⁵khan, ki mi inthang, Jakoba irchihai chunga ki bân ki phara, kut phar maiin, kei hi nin Pathian ‘RENGPA chu ki ni, tiin Aigupta rama khan kin hriattira.

⁶Kha nî khan, Aigupta ram ata, ki ram zong suak, khuaihlutui le dûttui luangna ram, ram murdi laia ram sataka hruai inlût hrangin chong kin kunga.

⁷An kuang, nin indit thil porinchehai chu pai unglân, Aigupta rama millimhai leh khan porinchein om no roi, kei hi RENGPA nin Pathian chu ki ni,’ ki tia.

⁸Khannisian, ki chunga tehel an zonga, ki thu tûte’n irngai nuam mahaia, an inuam thil porinchehai chu pai nuam mahaia, Aigupta rama millim pathianhai la pai ual mahai, khanchu Aigupta rama ngêt an chunga ki ninginmurna insum ning mo, ki tia.

⁹Khannisian, an omna namhai mithmua ki’rhming a siat loina hrangin an chunga ite tho ta ma unga, Aigupta ram rengata hruaisuakin an kuang ki inhriattir zêl a ni ta.

¹⁰“Khan, Aigupta ram rengata hruaiin ramchâr dênin ki hruaisuak intunghaia.

¹¹Mihaiin an zôma an hring theina hrangin, ki thupêkhai chu kin hrila, ki dân chu ki’rchutira.

¹²Kei le anni kongkâra irsinsiana hrangin Sabat nî khom ki siama, kei hi RENGPA an ni ser bîkpu ki nih ti an inhriat theina hrangin.

¹³Khannisian, Israel mihaiin ramchâra khan ki chunga tehel an zonga, mi’n an zôma an hring theina hranga ki thupêkhai chu zôm nuam mahaia, ki dânhai an irheisana, ki Sabat nîhai lak an insiat zêla, khasika khan anni inboipai hrangin ki ninginmurna chu an chunga insum ning mo, ki tia.

¹⁴Khannisian, Aigupta ata ki hruaisuak laia hmutu nam danghai mithmua ki’rhming a siat loina hrangin ki itho ta loi a ni.

¹⁵Ramchâra khan ki pêk hrang ram, khuaihlutui lei dûttui luangna ram, ram murdi laia ram sataka khan hruai inlût no ning tiin chonginkungna ki lei siam tâk.

¹⁶An pathian irlimhai irngaina ualin ki dânhai an hnôla, ki thupêkhai zôm nuam loiin; ki Sabat sûnhai an insiat tâk a ni.

¹⁷Khannisian, ramchâra thatpaihai hrangin chu, kin renhaia, ki ithathai zit ta loi a ni.

¹⁸Ramchâra khan an nâihai kuanga, ‘Nin pahai thupêk zôm no unglân, an dânhai uksak ual loiin, an millimhai leh khan nangni le nangni porinchena no roi.

¹⁹Kei hi nin Pathian, RENGPA chu ki ni, ki thupêkhai zôm unglân, ki dânhai pomin zôm roi.

²⁰Ki Sabat nîhai irthiang takin ser unglân, khanchu, kei le nangni kongkâra irsinsiana ni a ta, nin Pathian, RENGPA chu ki nih ti inhresuak ta nin ti,’ ki tia.

²¹“Khannisian, an nâihai khomin ki chunga tehel an zonga, mi’n a zôma a hring theina hrangin ki thupêkhai chu zôm nuam mahaia, ki dânhai chu zôm ual mahai; ki Sabat nîhai chu an insiata, ramchâra khan ki ninginmurna an chunga insumin thatpaihai ril hrang ma ni, ki tia.

²²Khannisian, Israelhai Aigupta ram ata ki hruaisuak laia hmutu nam danghai mithmua ki’rhming a siat loina hrangin ki insum hrâm a ni.

²³Ramchâra khan, ‘Nam danghai laia thon darhai ki ta, ram tina indartir zit ki ti,’ tiin chong kin kung tâka.

²⁴Ki dânhai zôm nuam loia, ki thupêkhai zôm mahaia, ki Sabat sûnhai insiatin an pahai millimhai ngêt kha an biak tâk sikin.

²⁵Khasikin an satna hrang ni loi dân ki siama, an hring thei loina hrangin thu ki pêk saa.

²⁶An thilinhlanhai leh khan anni inporinchetirhai ki ta, an nâilutîrhai khom irbôlna hrangin hmang an ta; thei loi chang an ta, khanchu kei hi RENGPA chu ki nih ti an inhriat theina hrangin.

²⁷“Khasikin, Mihriam nâipa, Israelhai kuanga hiang hin hrilin lân, RENGPA PATHIAN khan hiang hin a ti: ‘Nin pahaiin an ni philsan sikin ki’rhming an ni insiat ok tâk a ni.

²⁸Pêk ki itum ram ki hruai intungin tâng irsânghai le thing hringhai an hong hmua; kha khan, an irbôlnahai an inhlan tâka, ki ninginmurtirna thilpêkhai an inhlana, an mirimhoihai an hâla, an thilinhlan uainhai an bunsuaka.

²⁹Hi hmun irsânghaia hin itho sika mo nin ife ngai? ki tia; kha kha atûn ten hin hmun irsâng, ti a la ni.

³⁰Khasikin, Israel insûngkuahai hril ro, RENGPA PATHIAN khan hiang hin a ti: Nin pahai hnung zuiin porinchein nin oma, an millim biak intirom takhai tiang nin zui zêla.

³¹Millim kuanga thilinhlan le irbôlna hrangin nin nâihai hâl hrangin a vuan nî ten hin porinche’n nin la oma, Israel insûnghaio, ni chongpui hranga hong mo nin ni? Mi hring ki ni hi, RENGPA PATHIAN thusuakin a ti. Nangni ni chongpui zât ni ma ung.

³²Nam dang, hi rama chi dang dang omhai tho dân angin thing le lung biak nin tum ngit tâka; khannisian, kha kha ni thei viat no ni.

³³“Pathian hring ki ni, RENGPA PATHIAN thusuakin a ti, kut hrâttak le, bân pharpum le ningmur insuakin nin chunga inlal ngêt ngêt ki ti.

³⁴Nam danghai lai ata nangni hruaisuak ki ta, inthekindara nin omna ram ata chu kut hrâttak le bân phar le ninginthik sûngin nangni hruaikhôm ki ti.

³⁵Nam dang rama, ramchâra khan nangni hruai ki ta, nin hmâi makunga nin chungthu rêl ki ti.

³⁶Aigupta ram ramchâra nin pahai chungthu ki irêl ang khan nin chungthu rêl ki ti,” RENGPA PATHIAN thusuak khan a ti.

³⁷“Khan, vîkna fung hnuaia nangni infetir ki ti, thuthung hnuaia nangni inlûttir ki ti.

³⁸Nin laia tehelhai le ki chunga thilsual thotuhai chu infâi zit ki ta, an omna ram ata hruaisuak ki ta, khannisian Israel rama khan lût viat no nihai; khanchu, kei hi RENGPA chu ki nih ti inhriat an ti,” a tia.

³⁹Nangni Israel insûng mihaio, RENGPA PATHIANIN hiang hin a ti: “Mâni millim chu pan zêl unglân, chubai mûk roi, ki chong irngai nuam ngai mak chêi! ki’rhming irthiang hi nin thilinhlan le nin millimhai khan porinchetir ta no roi.

⁴⁰“Israel ram, ki tâng irthianga khan, Israel insûng tin, nin rêngin, kha rama khan ki sin tho nin ta, kha khan lei lôm ki ta, nin thilinhlanhai, ra masatak nin inhlanhai, nin thil irthiang inhlanhai lei dong ta ki ti.

⁴¹“Nam dang lai ata nangni hruaisuak ki ta, nin irthekindarna ram ata nangni ki hruaikhôm tika chu nin thil mirimhoi inhlanhai leh lei lôm ki ti, nam danghaiin ki irthiangzia hmu an ti.

⁴²“Khan Israel rama kut pharin nin pahai kuanga ram pêk ki inkung sai rama nangni kin tung tika chu, kei hi RENGPA chu ki nih ti inhria nin ti.

⁴³Khataka khan nin omdânhai le nin sinthohai, nin thil tho porinchena murdihai chu inhresuak ta nin ti; khanchu nin thil tho insual murdihai sikin nangni mithmu ngeia nangni le nangni chu irtheimâk irhlôm ta nin ti.

⁴⁴O Israel insûng mihaio, ki’rhming sikin, nin omdân sual le porinche taka thil nin ithohai ang ni loia, nin chunga thil ki tho tika chu RENGPA chu ki nih ti inhre ta nin ti,” RENGPA PATHIAN thusuakin a ti.

⁴⁵Khan, RENGPA thu chu ki kuang a zuang tunga,

⁴⁶“Mihriam nâipa, ni hmâi kha sim tiang irnghatin lân, sim tiang demin thu hrilin lân sim tianga ram chungthu inpuang roh.

⁴⁷Sim tianga rampui kuanga khan, ‘RENGPA thu irngai ro, RENGPA PATHIANIN hiang hin a ti a ni. Irngai ro, ni sûnga hin mei sêm ki ta, ni sûnga thing hring tinrênghai chu kâng irhmang zit a ti, thing châr tinrêng khom, meichok vung vung chu chuai no nia, sim tiang ata hmâr dênin, mi tinrêng em irûthai zit a ti.

⁴⁸Khan, mi murdihaiin, kei RENGPA hi mei insuaktu ki nih ti hmu an ta, thi no ni,’ ti ro” tiin.

⁴⁹Khan, keiin chu, “Ni mak e, RENGPA Pathian, kha kha chu nin thotir no ro; kei hi chu mi tinin thukhir ringot hril ngai kêng an ni ibe,” ki tia.