Read Hrangkhol EZEKIELA 21 Bible Online

EZEKIELA 21 - Hrangkhol bible

EZEKIELA 21

¹Khan, RENGPA khan hiang hin a ni tia,

²“Mihriam nâipa, Jerusalem tiang irheiin lân, hmun irthiang demin thu hrilin lân, Israel ram chungchâng thu inpuang ro;

³Israel ram kuang khan hiang hin thu hril ro: RENGPA khan hiang hin a ti: Irngai ro, ni chunga ki ningmur insum ki ta, ki khandai chu irlek ki ta, nin laia mi sa khom, mi sual khom that zit ki ti.

⁴Mi sa le mi sual ki that zit hrang sikin sim le hmâra mi murdi chunga ki khandai irlek ki ti.

⁵Khan, mi murdi’n, kei RENGPA hin ki khandai ki iphôi a nia, lâk kîr ta no ning ti inhriat an ti.

⁶“Nang mihriam nâipa, lungni takin inrûm vong vong ro, an mit hmu ngeia lung insiat takin chap roh.

⁷Khan, ‘Ithoa mo ni inrûm?’ an ti’n chu, ‘A thurchi chu a hong tung tâk sikin ki irzal a ni. Mi murdi lungrîl zâm irzal a ta, an kut sahai kim a ta, thâiindôpin om an ta, irlo’nthingin om an ti,’ ti roh. Irngai ro, a zoro a hong tung tâk a ni,” RENGPA PATHIAN thusuakin a ti.

⁸RENGPA khan hiang hin a ni tia;

⁹“Mihriam nâipa hiang hin inpuang ro: RENGPA khan hiang hin a ti. Khandai chu intât inngaih a nia, Khandai chu innôt irtêk a ni ta.

¹⁰Mi sâtna’n intât inngaih a nia, Vâr anga irtêk lop lop hranga innôt infâi a nia, Raifânna zel om thei mah. Ki mihai hin irchûna rêng rêng uksak viat mahai.

¹¹Hmang thei ta hrangin khandai chu intât a ni ta, A ni, thîr ngaiha innôt infâi a ni ta, thattu kuta chuang hrangin.

¹²Mihriam nâipa, chapin lân, inrûm vong vong ro, Ki mihai tuang hrang an nia, ki mihai chu Israel mi lianhai leh khandaia that an ini hrang a ni. Khasikin beidongin ni rôp irchûm roh.

¹³Ki mihai hi fia an nia, An irtet no’n chu thi zit an ti, RENGPA PATHIAN thusuak a ni.

¹⁴“Atûn, o nang mihriam nâipa, ni kut inbên pumin thu hril ro, khandai khan voihni voithum sât sianlân, sât sât ri se. Khandai hrât tak a nia, khandai liantak le ichiom tak a ni. An vêla mihai thatna hrang chu.

¹⁵Ki mihai chu a’rzaltirhaia an irtet zoi tâk, irthatna khandai kôlirtêk anga irtêk lop lop hrang, kul mikot tina ki sia ta, mi thatna hranga irsiam diam a ni tâk.

¹⁶A suk a letin, chang tiang le vei tianga sât zêlin lân, ni maton le nir heina tiang tiang khom sât zêl roh.

¹⁷Kei khomin ki kut inbên ki ta, Khanchu, ki ninginmurna dâi a ti, kei RENGPA hin ki ihril tâk a ni hi,” a tia.

¹⁸RENGPA khan hiang hin a ni ti nôka:

¹⁹“Nang mihriam nâipa, Babulon rêng khandai chu a hong tung theina hrangin lampui inhni lei siam ro; kha lampui inhnihai kha ram inkhat ata hong suak hrang a ni, lampui irhmûna hrang siamin lân, khopui lûtna kotsua chu irsinsiana târ roh.

²⁰A lampui irsenna laia khan irsinsiana târin lân, inkhat khan Amon khua Raba lampui irkôk sianlân, inkhat khan Jerusalem kul lampui irkôk ri se.

²¹Babulon rêng chu lampui irsenna lai, lampui inhnihai irchunna taka khan, a fena lampui inhriatna’n dôi hmangin tâ a sâna, hnung tiang mân tiang thalhai chu a pêla, millim chu chong ar dona, irbôlna sa mithin chu a en vong vonga.

²²Jerusalem tiang irnghain, tasânna thal chu a kut chang tiangin a chela; irkâpna hmunhai siamna hrang le, thattuhai ta hranga bâi kak hrang le, khêka rôl insua hrang le, dâi mikothai epa irkâp hmunhai siam hrang le, irnêng inpônghai siama, kulhai siam hrang chungchâng thu tasânna khan an langa.

²³Jerusalem mihai khan Babulon leh an thuthungna a lei om sikin tasânna dik loia an irngaia, khannisian, an sualzia inhriat suaktir hrang a nia, chel an ini ngêt hrang a ni.

²⁴“Khasikin, RENGPA PATHIAN khan hiang hin a ti: Nin sin siatna chu inhriat mai a nia, nin sualhai chu inpuang a nia, nin sinthôna rikipa nin sin siatzia an lang tâka, inhriat suak nin hong ni tâk sikin, kuta man ni ngêt nin ta.

²⁵O nang, Israel hruaitu mi sual, thi hrang ni ni, ni sualna hremna hnungkhôn tak zoro a hong tung ta.

²⁶RENGPA PATHIAN khan hiang hin a ti. Ni rênglukhum le ni tupi khum chu khekpai ro, hi hi a pangai ni ta no ni; mi irhnuaihai chu chôiirsângin om an ta, mi irsânghai chu irhnuaiin om an ti.

²⁷Inletpai ki ta, inletpai ki ti, khopui chu inletpai chitin siam ki ti; khannisian, a neitu diktak hrang a hong tung mâka chu tho no ning; khan ama kuanga khan pêk ki ti.

²⁸“Nang mihring nâipa, thu inpuangin lân, hiang hin ti ro: RENGPA PATHIANIN Amon nâihai chungchânga le an hrilsiatna thua hiang hin a ti: khandai, khandai irlek a ni ta, mi sât thatna’n le mi inboipaina’n kôlirtêk anga irtêk khandai chu irlek a ni ta.

²⁹Inlârna dik loi nang an irhmua, tasânna dik loiin nang an inentir a ni, ni ringa khandai irbuntirin om ni ta, ni sualna intirom tak sikin ni zoro a hong tung ta, hremna hnungkhôn tak sûn kha.

³⁰Khandai chu a koka thun ro, ni’rzirna le ni suakna rama ni chungthu rêl ki ti.

³¹Ni chunga ki ninginmurna insum ki ta, ki ninginthikna mei chu ni chunga sêm inchok ki ta, mi nunsiat tak, mi that thei tak kuta nang inmantir ki ti.

³²Meiin nang kâng irhmang a ta, nangma ram ngeia ni thisen suak a ti; mi tukhomin nang inhriat ta no nihai, kei RENGPA PATHIAN hin ki ihril a ni,” a tia.