Read Hrangkhol EZEKIELA 22 Bible Online

EZEKIELA 22 - Hrangkhol bible

EZEKIELA 22

¹Khan RENGPA’N a ni zuang chongpuia,

²“Mihriam nâipa, thisen insuaktuhaia isip khopui chungthu hi rêl hrangin ni irsiam ma ni? Thil porinche a itho murdi hi fel takin inhretir roh.

³Khopui kuang khan RENGPA Pathianin hiang hin a ti, tiin hril ro: Ni mihai nanâk tamtak thathaiin le millim biakin ni bing bingin ni porinche tâk sikin, ni zoro chu a hong itung a ni ta.

⁴Ni thisen insuaknahai sika hin thiam no chang ni lei ni tâka, ni millim siamhai sika khan ni porinche tâk sikin, ni zorohai hekin, a nikhua a hong itung a ni ta. Khasikin nam tinhai nuiso hrang le, ram tinhai tufiam thôna hrangin nang ki isiam tâk a ni hi.

⁵Ni kôla ram le ram hlataka khom, nangmaa hin dân a om ta no sikin, nang an innuisan tâk a ni.

⁶Israel hruaituhai lak chu, an hrâtna irnghatin, mi an thata.

⁷Khopui mihai kha tukhom mâni nu le pa mahrip tho om ta mahaia, ram dang mihai hrangin, meithâi le farahai nuamningin an lohaia.

⁸Hmun irthianghai mahrip tho mak chêia, Sabat sûn khom vong indik mak chêi.

⁹Ni mi senkhathaiin mi an that theina hrangin minlak an thoa, senkhatin millim kuanga thilinhlanhai an fâka, senkhat lakin mâni taksa irzuknahai ngot an ngaituaa.

¹⁰Senkhat an pahai dôngma leh zâlsuam khom an oma, senkhatin nupang hulloi lai taka zâlpui khom an oma.

¹¹Senkhat uire an oma, senkhat an moi siatpui an oma, senkhat an far inchanghai chunga sinsiat tho khom an oma.

¹²Ni mi senkhathai khan mi thatna hrangin tangka sumhai an lâka, senkhatin an Israel chanpuihai kuang a pung omin sum an inpûktirhaia, nuamninga lohaiin irchon an bûma. Keima an ni’rnghil tâka,” RENGPA Pathianin a ti.

¹³“Inru ni ithônahai le ni thisen insuaknahai sikin ki kuttum ni chunga chum a ti.

¹⁴Ngam takin mo om theiin? Nang hrem hranga ki zuang tena ni’rnak nei mo lan hre theiin? Kei RENGPA hin ki iti a ni, ki iti tâk chu ki itho ngêt hrang a ni.

¹⁵Ni mipuihai chu ram tina le hmun tinhaia irthekindarin sia ki ta, ni sin saloihai hi inhektir ta ki ti.

¹⁶Khanchu nam danghaiin nang irngaiirhnuaitir an ta, kha tena chu RENGPA ki nih ti inhre ta ni ti,” tiin.

¹⁷Khan, RENGPA’N hiang hin thu a hril nôka,

¹⁸“Mihriam nâipa, Israelhai hi keima ta hranga hin chu ite ar fêna om mahai. Anni chu sum tamtak hâlinfâia a om zoiin a êk, sumsen thîra suang ang hi an ni.

¹⁹Khasikin atûn, kei RENGPA Pathian hin ki itihai hi, hmanghmunboi kha an lei ni tâk sikin Jerusalema an rêngin hruaibukhai ki ta,

²⁰sum tamtak, sumsen thîr, le suang inzôia a iom angin, ki ningmurna le ki taksena’n anni chu hâlinzôihai ki ti.

²¹A ni, anni chu Jerusalema hruaibukhai ki ta, an hnuai tiang mei tho ki ta, ki ningmur hraiin hâlirhmangtirhai ki ti.

²²Anni chu tangkarua hâlinzôina meisûmpuia inzôi angin Jerusalema khan hâlinzôiin om an ti. Kha tena chu RENGPA ningmurna chu bunthuanin a iom a nih ti inhresuak ta an ti,” a tia.

²³Khanchu RENGPA’N a ni zuang chongpui nôka.

²⁴“Mihriam nâipa, Israelhai kha ti pehai ro, an ram a’rthiang ta no sikin, ki ningmurna’n ki zuang ihrem a ni.

²⁵Kâmkeibakneiin sa a ithathai chunga a inrûm ngai angin, hruaituhai chu an inrûm sa ngai. Mihai an thata, tangka sum le neinun an ilâk thei dôr an lâka, mi tamtak meithâiin an siahai ngai.

²⁶Ochaihai khomin ki dânhai an inchâia, thil irthiang uksak loiin, thil irthiang le porinche thua irchutirna nei mahaia; sabat sûn khom uksak loiin. Khasikin, Israel mihai hin mahrip ni tho loiin an iom zoi a ni ta.

²⁷Sorkâr roirêltuhai khom chu inê, an sa fâk irchu irthêr ang an ni. Irchongna irzûlin mi an thathai ngai.

²⁸Deipuhaiin hi sualnahai hi an in banga an nâl inngoia, a sûng an irhlîpai angin an irthuppui ngaia. Inlârna dol an hmua, leihrilna dik loi an hrila, RENGPA Pathian thu hrilin an irhril ngaia, khannisian kei RENGPA hin chu annihai kha chongpuihai viat ma ung.

²⁹Mi lianhaiin mi huangin an lâkpai pehai ngaia, ram dang mihai chunga nuamningin an om ngai.

³⁰Khan, bang chînna hmunhai kôla an ngîra, ki ningmurna ram chu ki zuang inboipai hrang tika lei hrung hrangin mi ki zonga, khannisian inkhat lua hmu ma ung.

³¹Khasikin ki ningmurna chu an chunga insum ki ta, an sinthôna sika khan mei angin inboipaihai ki ti,” RENGPA Pathianin a tia.