Read Hrangkhol EZEKIELA 23 Bible Online

EZEKIELA 23 - Hrangkhol bible

EZEKIELA 23

²“Mihriam nâipa, tiana khan zuarpui inhni an oma.

³Dôngmate an ni lai khan Aigupta rama an oma, khan an dôngmate irthiang nina kha irhmangin, notizuarin an om tâka.

⁴Ulian ualnu irhming chu Oholai a nia, (khanu khan Samari an entira) a sangnu irhming chu Oholiba a ni, (khanu khan Jerusalem chu an entira). Khan, an ruaiin ki luahaia, nâi le tehai an ni nei pea.

⁵Oholai chu ki ta lei ni khom sian, notizuarin a oma, Assuria rama ar ditpuihai kha a sân a’rzukhaia.

⁶Khahai kha sipai silkai duma irvo, mi lianhai, roirêltu irsâng takhai an nia, an rêngin hmêlsa le sakor chungchuang mi an ni.

⁷Ama chu Assuria hruaituhai ta hranga notizuar a nia, a taksa irzukna khan ama chu hruaiin Assuria mihai millim kha biakin, ama le ama chu a porinche tâka.

⁸Aigupta rama a om laia a dôngmate irthiang nina irhmangtira, a notizuar thohai kha mong loiin a la tho maia, a thoibop ata kha ama chu pasalhaiin notizuar zâlpuiin an lei iompui ngai a ni.

⁹Khasikin ama chu a irditpui Assuria mihai kuta ki pêksuak tâka.

¹⁰Ama chu bomboiin an siaa, a nâipasalhai le nâinupanghai an sutpaia; kha hnung chu khandai leh an thata. Nupanghaiin hmun tina a thurchi an hril vêl tâka.

¹¹“Kha thilhai kha a sangnu Oholiba khan a hmu mai khomin, ama khom Oholai nêka irkhêl uala notizuarin a oma.

¹²Ama khomin Assuria mi lianhai, roirêltu irsâng takhai, sipai silkai cheka irvôhai sakor chungchuang mihai, ruatharte hmêlsa murdihai irzukin an dithaia.

¹³Ama khom chu porche takin a oma, a unu ang dênin a sangnu khom hi omin ki hmua.

¹⁴Khan ama chu a porinchena khan a lût inthûk ualin a oma,

¹⁵Babulon hruaitu ulianhai irlim banga an itâr, seninlâr leh irvôtir, an konga kongkhit leh khita, an lua lukôma irvo irzukin a oma.

¹⁶Khanchu khahai kha a hmu tena chu, taksa irzukna’n a sipa, Babulon-a khan mi a tîrhaia.

¹⁷Babulon mihai chu zuangin an zuang zâlpui ngaia, ama chu an nuam takin an lo pola, an porinchetir ta hrai sikin, a hnungkhôn taka chu a hmumâkhaia.

¹⁸Vântâng laia phoileng irtârin, mi tinin notizuar a nih ti an inhriata. A unu ki intir ang khan ama khom kin tir tâka.

¹⁹Aigupta rama dôngmate ni ni laia notizuara ni iom ang khan, ni notizuarna chu a luakinter uala.

²⁰Khan an neinun khom sakuartung neinun anga, an thilsuak khom sakor thilsuak anga suakhai chu a’rsâipuihai ngai.

²¹(Oholiba, Aigupta rama dôngmate ni ni laia pasalhaiin nir hnu irdâipuia, ni dôngmate irthiang nina irhmangtira, ni porinchena sika thei loi ni ichangna thilhai kha tho nôk ni tuma.)

²²“Khasikin Oholiba, kei RENGPA Pathianin hiang hin nang ki ti. Kha ni irditpuihai kha ni hnônghai tâka, khannisian ni chunga an ninginmurtirhai ki ta, nang irhual hrangin zuang tuanghai ki ti.

²³Babulon mi murdihai le Kaldai mi murdihai, Pekod mihai, Shoa le Koa mihai le Assuria mi murdihai chu zuang tuanghai ki ti. Kha ruatharte milianhai le, hruaitu hmêlsahai hruaitu poimohai le sakor chungchuang hruaitu ulianhai kha bûmhai ki ti.

²⁴Hmâr tiang ata nang doi an ta, sipai tamtak leh zuang an ta, an pho le lukhumin nang irhual khum an ti. An kuta nang inhlan ki ti, an dân angin ni chunga roirêl an ti.

²⁵Ni chunga ki ning an mur sikin, ningmurin ni chunga roi inrêltirhai ki ti. Ni hnâr le ni mikuar âtpai an ta, ni nâihai thathai an ti. A ni, ni pasalhai le ni nâinupanghai nang hruaipai pe an ta, a hring pumin hâlkhumhai an ti.

²⁶Ni silkaihai inpotthêr an ta, ni tukrivohai chôipai an ti.

²⁷Khanchu Aigupta ram ni om ata ni thil porinche thohai le ni taksa irzuknahai kha inboitir ki ta, millim zel en ta no chi nia, Aigupta ram khom ngaitua ta ngai no chi ni,” a tia.

²⁸Hiang hin RENGPA Pathianin a ti, “Mi nin ihmumâkhai le nin ihnônghai kuta pêk ni nin ti.

²⁹Ni sintho murdihai kha chôipai an ta, kut korongin nangni masan an ta, notizuar angin phoileng nang ni târ an ti. Hi thil hi ni taksa irzukna le ni notizuarnahai khan a intungtir a ni.

³⁰Nam tinhai ta hranga notizuar ni nia, an millimhaiin nang a porinchetira.

³¹Ni unu lampuihai ni hro sikin, hremna khilât ir-ang mai kha nang pe ki ti,” a tia.

³²Khan RENGPA Pathianin hiang hin a hrila, “Ni unu khilât, liantak le inthûk taka khan nang khomin ni in saa, Mi tinin nang hmumâk an ta, nang nuiso an ti, khilât kha a sip hrai sikin.

³³Ni unu Samari khilât, chitna khilât le siatna khilât khan dengtheina le inruiin nang siam an ti.

³⁴In ni ta, pai ving ni ti, a koina hâr leh khan nir hnuhai kha invitphophai ni ta. Kei RENGPA Pathianin ki iti a ni,” a tia.

³⁵Atûn chu RENGPA Pathianin hiang hin a ti, “Keima chu ni’rnghilin, hnung ni ni songsan sikin ni taksa irzukna le ni notizuarna sika khan dengthei tuang ni ti,” a tia.

³⁶Khan RENGPA’N a ni zuang chongpuia, “Mihriam nâipa, Oholai le Oholabai chunga hin roirêl ni itum ma ni? An sintho porinchehai sika khan theiloi inchangtirhai roh.

³⁷Uire le thisen insuakin an oma, millim le uirehaiin an sipa, nâi an inei pehai kha an thata, ki nâihai chu millimhai kuang an inhlanhaia.

³⁸Kha vai kha ni loiin ki biakbuk porinchetirin, Sabat sûn khom uksak ta loiin an oma.

³⁹Ki nâihai millimhai kuang an inhlan nîhai khan, ki biakbuk sûng lûtin an porinchetira.

⁴⁰Khan, ram hlataka mihai fial hrangin tirtônhai voi iza an tîrhaia, mihai khom an zuang ngaia, zuarpui inhnihai kha tui irsilin, an mithai irnâlin tukrivo sa irbelin an om ngai.

⁴¹Khan, zâlhmun hoitaka toiin, an makunga thil sahai le dokâng an siaa, mirimhoi le oliv hriak ki ipêkhai khom kha an sia saa.

⁴²Khan, mipui raifân taka omhai irhâi inhriatin an oma, ramchâr ata mihai khom irpâlin hruai inlûtin an oma. Nupanghai kuta khan bânhrialhai inbuntirin le, an lua rênglukhum enhoi takhai an inkhumtirhaia.

⁴³Khanchu ki bingin uirena sika ngûi taka omnu chungthu chu hiang hin ki hrila, ‘ama chu notizuar angin an nuam nuamin lo pol ri sehai, kha vai kha a ithei sun a ni sikin,’ ki tia.

⁴⁴Hi notizuarhai kuang hin voi tamtak an fe ngaia, Oholai le Oholabai, nupang porinchehai kuang hin.

⁴⁵Mi felhaiin chu an uirena le an thisen insuaknahai sika hin theiloi inchangtirhai an ti, uirea omin an kuthai chu thisen a kop sikin,” a tia.

⁴⁶Khan hiang hin, RENGPA Pathianin a ti, “Anni insîna hrang le an longindarna hrangin mipui hong hruaihai ki ti.

⁴⁷Mipuihai khan lung leh dêngin, khandai leh doihaiin, an nâi le tehai thatpaiin, an inhai hâlpai ri sehai.

⁴⁸Kha ram murdia khan porinchena thilhai chu inboipai ki ta, kha kha nupang ta hranga an uirena anga uire ta loi hrang ti inhriattirna ngar tak chu ni a ti.

⁴⁹Khan, nangni zuarpui inhnihai hi nin porinchenahai le millim nin biakna sika nin sualnahai sikin nangni hrem ki ti. Kha tena chu RENGPA Pathian chu ki nih ti inhre ta nin ti,” a tia.