Read Hrangkhol EZEKIELA 24 Bible Online

EZEKIELA 24 - Hrangkhol bible

EZEKIELA 24

¹Khan, kin sal intângna kum kuakna, tha sômna le sûn sômna nî sûn khan, RENGPA’N a ni zuang chongpuia.

²“Mihriam nâipa, a vuana tarik hi irziak ro, Babulon rêngin a vuan hin Jerusalem a irûn nî sûn a ni sikin.

³“Khan mi tehel ngaihai kuanga khan chongirkhekin thu hrilin lân, an kuang, RENGPA Pathianin hiang hin a ti, ti ro: Sumsen bêl kha inchuan unglân, a sûnga khan tui insip roi.

⁴A sûnga khan hme irchan satakhai thun unglân, a dâr le a kehai le a ru irnoihai khom kha thun ving roi.

⁵Kêlbelra martak hme kha thun unglân, bêl hnuaia khan thing tua unglân, tui kha irtoktir unglân, a ruhai kha but roi,” a tia.

⁶Khan, RENGPA’N hiang hin a tia, “Thisen insuak ngai khopui lu chung chu a rik e! Tuiêka sip itiklaia khom infâi ngai loi ang kha a ni, a sûng rengata hme kha a tin tinin a oma, inkhat lua mâksanin om mah.

⁷Khopui sûnga khan thisen insuanahai a oma, khannisian thisen kha vâiphin irkhû theina hmun irnêng chunga bunthuanin om maka, lungpui chunga kêng bunthuanin a om ngai.

⁸Ningmur le phuba lâkna an tungtir theina hrangin a thisen chu irkhu loiin lungpui chunga ki siaa,” tiin.

⁹Khan, RENGPA Pathianin hiang hin a tia, “Thisen insuak ngai khopui chu intak pe a ti! keima ngei khomin thingtua hranghai buk irsâng sa ki ti.

¹⁰Thingtua hranghai hong chôi sa unglân, mei kha sêm inchok unglân, hme kha but unglân, a tui kang karin, a ruhai khom kâng rak ri se.

¹¹Atûn chu sumsen bêlrong kha meichok chunga khan inchuan unglân, inhong rakin om ri se. Kha bêla êk imanhai kha a kâng zoi tena chu dân angin irthiang nôk ta a ti.

¹²A tuiêk imanna murdihai kha meidônin ar hmangtir zoi no khomin.

¹³O Jerusalem ni sintho porinchehai khan irthiang loia nang a isia a ni hi. Nang irthiangtir ki lei tum nâka chu, irthiang loiin ni la om maia. Khasikin, ki ningmurna hi ni tuang mâka chu irthiangin om nôk ta no chi ni.

¹⁴Kei RENGPA Pathian hin ki iti a ni, ki chângna hrang zoro chu a hong tung thiai ta. Ni sualnahai chu hnôlpai no ninga, inrenna mani, khoza’rngaina mani ni chunga inlangtir no ning, ni sinthohai sika khan hremin om ngêt ni ti,” RENGPA Pathianin a ti.

¹⁵Khan RENGPA’N a ni zuang chongpuia,

¹⁶“Mihriam nâipa, ni lunginkham taknu kha voikhat zelin ni kuang ata lapai hrang ki ni. Khannisian chûlpui ual no’n lân ni mitrithi khom intha viat no roh.

¹⁷Ni irhniak irhâi khom inhriat hrang om no ri se, ni ichûlpuina lukhum loiin mani, ni ke rong khomin fe no roh. Ni hmâi hîp no’n lân, khanchu a chûlpuihaiin thil an ifâkhai khom fa sa no ro,” a tia.

¹⁸Khanchu zîng tiang inrang takin mipuihai kuang khan kha thu kha ki hrila, kha nî khohloi zela khan ki dôngma chu a thia; khanchu zîng nôka chu thupêk ki ini ang takin ki tho tâka.

¹⁹Khanchu, mipuihaiin ki kuang, “Itho sika hianga ni iom ma ni?” tiin an nir dona.

²⁰Khanchu an kuang, “RENGPA’N a ni zuang chongpuia,

²¹Hi thu hi nangni Israel mihai kuang hril hrangin a ni zuang hrila, biakbuk hrâtna chu nin irsorpui oka, a en nin nuama, kha khan nin fe nuam ngai. Khannisian RENGPA’N porinchetir hrang a ni ta. Khanchu nin nâipasalhai le nupanghai Jerusalema mâksana omhai kha khandaiin thi an ti.

²²Khanchu ki lei itho ngai ang khan tho ta nin ta, nin hmâihai hîp loiin, a chûlpuihai thil fâk ngai khom fa ta no chin ni.

²³Lukôm loiin mani, ke rongin mani, chûlpuiin mani, chapin mani om ta no chin ni. Nin sualnahai sikin irhmang nin ta, chûlpui irhlômin om nin ti.

²⁴Khan kei chu nin ta hranga irsinsiana ni ki ta, keima’n thil ki lei itho tâk ang khan nangni khomin thil tinrêng chu tho nin ti. Khanchu kha thilhai kha a tung tena chu RENGPA’N ama chu RENGPA Pathian chu a nih ti inhre ta nin ti,” a tia.

²⁵Khan RENGPA’N, “Atûn chu mihriam nâipa, biakbuk dettak nin irsorpui ngai le an raiinfânpuina ngai kha anni rengata lâkpai ni a ta, khan an nâipasalhai le nupanghai khom lapaihai sa ki ti.

²⁶Khanchu hi thilhai hi kin tungtir tika chu kha nî khan siatna ata zôk, mi senkhathai hongin nang la hong hril an ti.

²⁷Kha nî ngêt khan khahai kuang khan thu hril thei ta nin ta, khanchu an ta hrangin irsinsiana ni ta a ta, khanchu RENGPA Pathian chu ki nih ti inhre ta an ti,” a tia.