Read Hrangkhol EZEKIELA 26 Bible Online

EZEKIELA 26 - Hrangkhol bible

EZEKIELA 26

¹Khan, kin sal intângna kum sôm hleikhatna, kha tha a sûn khatna nî sûn khan RENGPA’N a ni chongpuia.

²“Mihriam nâipa, Tura khopuia omhai khan hiang hin Jerusalem kha an nuisoa, ‘Jerusalem chu irnôitirin a om tâka, a sum bepâr thônahai chu inboipaiin a om tâka, ama chu itiklai khom a ni doitu ni thei ta ngai no ni,’ tiin an khêka.

³Khasikin atûn, kei RENGPA Pathian hin hiang hin ki iti a ni. O Tura khopui kei chu ni râl ki nia, nang a doi hrangin nam tamtakhai tuanghai ki ta, anni chu tuipui irsok angin hong suak an ti.

⁴Ni khopui banghai insiatpai an ta, ni in irsânghai insiatpai an ti. Khanchu keima’n vâiphin murdi chu phîtinfâi ving ki ta, lungpui inchangtir ki ti.

⁵Khataka omna tuipui kôla khan Tura chu nga cheltuhai lên phoina hmun chang a ti, keima RENGPA Pathianin ki iti a ni. Nam tinhaiin Tura chu mualphoi sak an ti.

⁶An khandaihai leh a khopui tânga omhai, a sûnga mihriam omhai chu that an ta, khanchu Tura’n RENGPA ki nih ti inhre thei ta a ti,” a tia.

⁷Khan, RENGPA Pathianin hiang hin a tia, “Tura doi hrangin rênghai laia a roiinpui tak Babulon rêng Nebukadnezara chu zuang tuang ki ta, ama chu hmâr tiang ata sipai tamtakhai leh sakorhai tâli le sakor chung chuang mihai leh zuang an ti.

⁸Tangka khopuia om murdihai chu irdoina khan thatin om an ta, an râlhaiin khur choi an ta, pil bun inpôngtir an ta, nang doina hrangin bang siam an ti.

⁹Khanchu ni banghai kâp insiatna hrangin a kâp irdîpna siam an ta, ni in irsânghai khom thîr tuanhai leh insimpai an ti.

¹⁰An sakorhai vâiphin inkhû khan nang bôm a ta, khopui siat dâi mikothaia an lût tena chu, an sakor thilkai irhâi le an tâlihai leh khan ni banghai chu inhnîngtir an ti.

¹¹An sakor chung chuang mihai chu ni mikot bulhaia lûtin an khandaihai leh ni mipuihai chu thathai an ti. Ni omna khopuia chopui dethai chu hnuaia inrîltir an ti.

¹²Khanchu nir chonhai chu râllâk sum inchang an ta, ni sum inpungtirna thilhai khom lapai an ti. Ni banghai insumpaiin ni in hoitakhai khom insiatpai an ta, ni lung le thinghai khom itinrêng tuipuia pai an ti.

¹³Ni hlasak irhâi murdihai inboipai ki ta, ni serânda lian irhâi khom inhriat ni ta ngai no ni.

¹⁴Khanchu lungpuiin nang siam ki ta, nang chu tuipui kôla nga cheltuhai lên phoina hmun chang ta ni ti. Khopui kha siam inding ni nôk ta no ni, kei RENGPA Pathian hin ki iti a ni,” a tia.

¹⁵Khan, RENGPA Pathianin Tura khopui chungthua hiang hin a hrila: “Ni sûnga irthatnahai a oma, a pop a liamhai an inrûm tena chu tuipui kôla omhai kha irthatâk irlâkin la om an ti.

¹⁶Khanchu tuipui kôla rama khan rêng murdihai chu an rêngtoihmun ata chum an ta, an songkol irfualhai le an puan mirimhoihai khekpai an ta, inthingpumin hnuai chunga toi an ti.

¹⁷Khan, mithi chûlpuina hla hi ni ta hrangin sak an ti: Khopui roiinpui tak chu inboipaiin a om tâka, a irkuanghai khom tuipui ata irhmang zoiin a om tâka, hi khopuia mihaiin tuipui chunga ircham lei neiin, tuipui kôla om mi tinhai chu an lei insîhai ngaia.

¹⁸Atûn chu a siat ni a ta, chômbunghai irnokin khaanga siatna irkhêl sika khan mipuihai an kamang zoi ta,” tiin.

¹⁹Khan, RENGPA Pathianin hiang hin a hrila: “Mihai om ta loina khopui ram tâk angin nang siam ki ta, tuikhanglian inthûk taka tuihai leh nang ngîm del ki ti.

²⁰Tiana lei thi tâkhai leh omsuam hrangin mithi khuaa nang tîr ki ta, kha hnuai rama khan kumtuang dêna siathai kuanga mithihai leh omsuam hrangin nang siam ki ti. Kha tena chu mihringhai rama omin ni hmunhai lua thei ta no chi ni.

²¹Nang chu inentirna ichiom takin nang siam ki ta, kha kha ni hekna chu ni ta a ti. Mihaiin nang zong an ta, khannisian nang hmu ta ngai no nihai,” RENGPA Pathianin a tia.