Read Hrangkhol EZEKIELA 27 Bible Online

EZEKIELA 27 - Hrangkhol bible

EZEKIELA 27

¹Khan, RENGPA’N a ni zuang chongpuia,

²“Mihriam nâipa, Tura ta hrangin chûlpuina hla sak ro,

³kha khopui kha tuipui kôla omin, tuipui kôla om murdihai le sum bepâr tho puma omhai kha, RENGPA Pathianin hiang hin a tih ti pe ro: O, Tura enhoi irkip taka ni iom kha ni’rsorpuia.

⁴Ni in chu tuipui a nia, nang a sintuhaiin irkuang angin a sate’n nang an sina.

⁵Ni thing phêkhai chu Hermon tânga meisâr thinghai leh isiam a nia, nir kuang ngul hrangin Lebanon-ah sidar thinghai hmang a nia.

⁶Ni’rkuang zâpnahai chu Basan rama Seso thinghai leh siam a nia; ni’rkuang hnuai dâphai chu Kitim-ah thing a sôi zât leh siamin, sâiha leh inluan del a ni.

⁷Ni puanzârhai chu puan zâiirhmi Aigupta rama puan mirimhoi leh siam a nia, hlatak ata inhriat thei zôi a ni ngai. Ni’rkuang pang chu Elisa chômbunga puan satak, a duminpôl leh siam a ni.

⁸Ni’rkuang chalaituhai chu Sidon le Arvad khopuia mi an nia. Ni mi kut theithiamhai ngêt kha nir kuang chalaituhai chu an ni.

⁹Ni’rkuang siamtuhai chu Biblos rama thing kut theithiamhai an ni. Tuipuia irkuang murdihai chu nangma anga sum bepâr thohai ngai an ni.

¹⁰“Persia, Ludia le Libna rama mihai chu sipai sintho’n an oma, an phôhai le an thîr lukhumhai chu ni sipaihai riakbuka an sia ngai. Kha mihai kha nangma ta hranga roiinpuina sintuhai chu an ni.

¹¹Arvad ram ata sipaihai khan ni kul banghai an hrunga, Gamad ram ata mihai khan ni in irsânghai chu an hrung ngaia. An phôhai chu ni kul banga khan an inkhâi ngaia; annihai khan enhoitaka nang inomtirtuhai chu an ni.

¹²“Tarsis-a sum bepâr thoin, tangkaruahai le thîrhai, tîn le irchonhai chu ni neinun inchangin ni lâk ngai.

¹³Grik, Tubala le Mesek suakhai le sumsen neinunhai sikin sum bepâr thoin ni om ngai.

¹⁴Sakor puak pêl ngaihai le irdoina sakorhai le sakuartung puihai chu Beth-Togarma rengata ni neinunhai zuarin ni lâk ngai.

¹⁵Rodes mihai chu nangma le sum bepâr tho’n ni hmang ngai, tuipui kôla om mi tamtakhaiin ni neinunhai chu sâiha le pervom thinghai le an hong thûlpai ngaia.

¹⁶Suria mihaiin ni sum bepâr thôna sumhai le ni rama neinun tamtakhai an irchôk ngai. Lunghluhai, puan duminpôl hai, puan âmnei hai, puan zâiirnêm hai le lungmantam hai chu ni neinun irchôkna’n an hmang ngai.

¹⁷Juda le Israel ramhai rêkin chu fasen le khuaihlutui le oliv hriakhai le thil mirimhoihaiin ni neinunhai chu an thûl ngai.

¹⁸Damaska mihaiin ni sum inpârna le ni thil siamhai kha an hong lâk sup supa, Helbon uain le Sahar samulin nang an hong dota.

¹⁹Uzal vêla Vedan le Javan mihai khan nang an hong dota, thîr hlûm hai, mosola hai, thingzungthum hai, thing mirimhoihai an hong chôi.

²⁰Dedan mihaiin ni neinunhai chu tâlia dâp zât puan an irchôk ngai.

²¹Arabia le Kedar rama roirêltuhaiin belratehai le belrahai le kêlhai le ni neinunhai an irchôk ngai.

²²Seba le Raama suminpâr mihaiin rângachakhai, lunghluhai le rimhoi satakhai leh ni neinunhai an irchôk ngai.

²³Khan Haran, Kanne le Eden khopuihai le Seba sum bepâr thôhai le Assur le Kilmad khopuihai chu nangma leh sum bepâr tho’n an om ngai.

²⁴Ni kuanga puan satakhai, puan duminpôlhai, puan âm neihai, zâmpher a chial le hrui hrual sahai an zuar ngai.

²⁵Ni suminpârna thilhai chu neinun pêlna irkuang lian takhai chôiin an om ngai, nang chu tuipui laia irkuang, neinun tinrênga sip ang kha ni ni.

²⁶Ni irkuang vaituhaiin tuipui chunga hlataka nang an fepui laiin, nisua tianga phâivua’n tuipui laia khan an siat tâka.

²⁷Ni sum bepâr thôna irchon murdihai, nir kuang chalaituhai, nir kuang sintuhai, ni sum bepâr thôhai le irkuang chunga sipai murdihai chu an rêngin, a om murdihai chu tuipuia khan nir kuang a siat tika hmunkhatin thi sa ving an ti.

²⁸Irkuang chalaituhai khêk irhâi chu tuipui panghai khan an tônga.

²⁹Irkuang murdi chu mâksanin irkuang chalaituhai murdi chu tuipui panga la fe ving an ti.

³⁰A sate’n nang chûlpui an ta, an luhaia vâiphin irthupumin, irvuta la’rbual an ti.

³¹Nangma ta hrangin an sam ep an ta, bora puanin irvo an ta; an chap lia an milung la na pehai liain om an ti.

³²Nangma ta hrangin chûlpuina hla sak an ta. ‘Tura ang hi tûte dang om mahai, Tura chu tuipui laia inboipaiin a om ta.

³³Ni sum bepâr tho mihai chu tuipui râl tiang an fe ngaia, mi tamtak chu nir chon roiinpui tak le ni thil zuarhai khan an milung nin hoitir pehai ngaia. Irnênga rênghai chu nir chongtirhai ngai.

³⁴Khan, atûn chu tuipui laia ni siat tâka, tuikhanglian inthûkna laia ni tâk a ni ta, ni neinunhai le ni sinthotuhai murdi chu nin rêngin tuipui laia nin tâkin nin irhmang zoi a ni ta,’ tiin.

³⁵“Khanchu tuipui kôla om murdihai chu ni thil tongna sika khan an kamanga, an rênghai ten lua an irthat zoi tâka.

³⁶Nang chu nir hmang tâka, kumkhontuanga irhmang chu ni ni ta; khanchu rammual pumpuia sum bepâr thohaiin ni itong ang kha tong kin ti, tiin a satêrenga chi le inthingin an om zoi tâka,” a tia.