Read Hrangkhol EZEKIELA 28 Bible Online

EZEKIELA 28 - Hrangkhol bible

EZEKIELA 28

¹Khan, RENGPA’N a ni zuang chongpuia,

²“Mihriam nâipa, Tura rêng kuang khan RENGPA Pathianin hiang hin a ti, ti ro: A sân ni om nin liantira, pathian angin ni oma, pathian angin rêngtoihmuna ki toia, kil tina tuipuiin a nir huala, ni tia. pathian angin ni oma, khannisian pathian ni mak chea, mihriam kêng ni ni.

³Daniela nêka vâr angin nir bêa, thil irthup ite nangma ata hi thup thei ni mah.

⁴Ni vârna le ni theina’n nang ar chongtira, rângachak le tangka ni neia.

⁵Vâr takin sum bepârhai tho pumin, irchon tamtak ni bûma, nir chonhai sika khan ni milung chu omlianna’n a sip zoi ta.

⁶“Khasikin, atûn kei RENGPA Pathian hin hiang hin ki ti: pathian anga vârin ni lei irbe tâk sikin.

⁷Ni râl sual takhai chu nang doi hrangin zuang hruaihai ki ta, anni khan ni theina le ni vârna hmanga thil sa ni ibûmhai kha insiatpai ving an ti.

⁸Annihai khan nang that an ta, tuipui laia thata lei om tâkhai angin thi sa ni ti.

⁹Nang that hrangin an zuang tena khom pathian angin ni la irbe mai hrang ma ni? Nang a that hrangtuhai kuta chu Pathian ni loiin mihriam kêng ni ini kha.

¹⁰Pathian nei loi ram dang mihai kuta ui thi angin thi ni ti. Kei RENGPA Pathian hin thu ki ipêk a ni,” a tia.

¹¹Khan RENGPA’N a ni zuang chongpui nôka.

¹²“Mihriam nâipa, Tura rêng chunga thil tung hranghai sikin ni charindongin lân, a kuang RENGPA Pathianin hiang hin a ti,” ti roh. Matona khan chu satirkip irkhînahai ni lei nei ngaia, ni vârin ni hmêl khom a sân a saa.

¹³Pathian irhuan Eden-a khan ni lei oma, lunghlu chi tinrênghai leh ni’rvoa; rubi, topaz, barli, karnelian, jasper, safir, emeral, garnet le lunghlu danghai leh khan. Rângachak tukrivohai khom ni neia, khaanga siama ni om nî khan, nangma ta hranga siamin an iom a ni.

¹⁴Khatak khan nang a hrungtu hrangin irvântirtôn ichiom tak ki siaa; ki tâng irthianga omin, lunghlu irtêkhai chunga khan ni chai ngaia.

¹⁵Fel loina sin ni tho mân khan chu, ni omdânhai chu isiama ni om ata kha satirkipin a oma.

¹⁶Thil zuar le irchonin ni buaia, kha khan sualna le thisen insuakna’n nang a hruai inlûta. Khasikin ki tâng irthiang chu masan hrangin nang ki tia, nang a hrungtu irvântirtôn khan lunghlu irtêkhai lai ata kha nang a’rzûlpai ta.

¹⁷Ni hmêl satna khan omlianin nang a siama, nir hming inthangna khan invêt angin nang an omtira. Khahai sika khan hnuai changa nang ki pai raka, khan rêng danghai irsinsiana hrangin nang ki imâksan tâk a ni.

¹⁸Ni sualna tamtakhai sika hin le iamom loi taka ni sum bepâr thônahai sika hin hmun irthianghai chu ni porinchetira. Khasikin khopui chu ki hâlirvômtir chit a ni ta. Nang a entuhai vaiin irvut ni chang lam hi nang an hmua.

¹⁹Nam tin nang an hriattuhaiin chu ar khêl ti an ti, irhmangna ichiom tak chu ni tung tâka, om khom om nôk ta ngai no chi ni,” tiin.

²⁰Khan RENGPA’N ki kuang hiang hin a tia,

²¹“Mihriam nâipa, Sidon khopui chu theiloi inchangtir roh.

²²Khataka mihai kuanga khan kei RENGPA Pathian ngêt hin an chungthu hiang hin ki ihril a ni, tiin inhrilhai roh. Kei chu ni râl ki nia, o Sidon ni chunga ki sinthohai sika hin mihaiin nin pâk an ti. Ni sûnga omhai hi ki hremhai tena chu, ki’rthiangzia le RENGPA ki inizia hi anni khan inhresuak ta an ti.

²³Hripui ni chunga zuang tîr ki ta, ni kotsuahai thisen inluangtir ki ti. Nang chu kil tin ata doiin om ni ta, ni mipuihai chu thatin om an ti. Kha tena chu RENGPA ki nih ti inhresuak ta an ti,” a tia.

²⁴Khan RENGPA’N, “Israel lei hmumâktuhai a kôlvêla namhai chu itiklai khomin Israelhai ta hrangin ilhling le buar-hai angin om nôk thei ta no nihai, khanchu RENGPA Pathian ki nih ti inhre thei ta an ti,” a tia.

²⁵Khan, RENGPA Pathianin hiang hin a tia, “Israelhai chu ki inthekindartirhaina ram ata kha bukkhômhai nôk ki ta, khanchu nam tinin ki’rthiangzia inhresuak an ti. Israelhai chu ki sinthotu Jakoba kuanga ki ipêk, anni ram ngêta om an ti.

²⁶Khataka khan milung irngam takin om an ta, inhai sinin, grep irhuanhai tho an ti. Lei hmumâkhaia anni lei lôtuhai, an kôlvêla nam murdihai chu keima’n hremhai ki ta, khan Israelhai chu zôkin om an ti. Khanchu RENGPA an Pathian ngei chu ki nih ti inhre ta an ti,” a tia.