Read Hrangkhol EZEKIELA 29 Bible Online

EZEKIELA 29 - Hrangkhol bible

EZEKIELA 29

¹Khan kin sal intângna kum sômna, tha sômna sûn sôm hleihnina nî sûn khan RENGPA’N a ni zuang chongpuia.

²“Mihriam nâipa, Aigupta rêng kha theiloi inchangtirin lân, ama le Aigupta ram murdi hrema a omna hrang thu hril pe roh.

³Hi hi RENGPA Pathianin Aigupta rêng chungthua a ihril chu a ni ti roh. O, Faroa Aigupta rêng, Nail ivadung kôla rûlpui ang ni nia, Nail dung chu ki isiam a nia. Keima ta a nih ti ngaitu, keiin nang ki idoi a ni hi.

⁴Khan ni bâi sûnga irkuai inlatir rap ki ta, Nail vadunga ngahai chu ni hlipa khan inkhophai ki ta, nang le ni tuidunga ngahai kha tâng châra nangni kêlsua ki ti; khanchu tukhomin nang la nuam ta no nihai, phûm khom nang phûm no nihai. Ramsa le chunglêng vatehai bu hrangin nang pe ki ti.

⁶Khanchu, Aigupta rama mi murdihaiin RENGPA chu ki nih ti inhre ta an ti,” a tia. Khan RENGPA’N, “Israel mihaiin Aigupta mihai chu an irhnêlhaia, khannisian nangma chu khianghrol irnêm tak ang kha ni nih.

⁷Khan nang an irhnêl lai khan, nang chu ni kiaka, an dâr ruhai le an konghai nin khiak pehai ta.

⁸Khasikin atûn kei RENGPA Pathian hin nang ki hril, khandai le nang a doi hrangin mi zuang tuanghai ki ta, ni mipuihai le ni sahai thatpai ving an ti.

⁹Khanchu Aigupta ram chu ram inpon le kho ram chang ta a ti. Khanchu RENGPA ki nih ti inhre ta an ti. Nail vadung chu ki ta leh ki isiam a nih ni ti sikin.

¹⁰Khasikin irngai ro, kei chu nang le ni Nail dung râlhai ki nia, Aigupta ram murdi chu hmâr tiang Migdol khopui ata sim tiang Aswan khopui ten le Ethiopia ramri fena lamhai dênin ram inponin siam ki ti.

¹¹Mihriam mani, ramsa mani khom, kha khan inlôi thei ni no nihai, kum sômminli sûng chu tûte lua thei ni no ni.

¹²Aigupta ram chu rammual pumpui sûnga ram inpon takin siam ki ta, kum sômminli sûng chu Aigupta rama khopuihai chu omin siat chian a ti. Khopui danghai nêkin siat ual a ti. Aigupta mihai chu invâitirhai ki ta, ram tina rotin, nam tinhai laia inomtirhai ki ti,” a tia.

¹³Khan RENGPA Pathianin hiang hin a ti, “Kum sômminli zoia Aigupta mihai chu ki inthekindartirhaina ram ata hong bukhai nôk ki ti.

¹⁴An irzirna hmun Aigupta ram sim tiang khan inomtirhai nôk ki ti. Khataka khan inriang takin om an ti.

¹⁵Itiklai khom ram danghai chunga roirêl ta no nihaia, ircham boi dapin siamhai ki ta, tu ram khom an ircham hnuaia inomtir thei ni ta no ni.

¹⁶Israel khom changpuina zongin irhnêl ta ngai no nihai, Aigupta ngîrhmun siatzia khan Israelhaiin anni lei irhnêl kha a dik loizia inhriattir ni tah a ti. Khanchu Israela’n RENGPA Pathian chu ki nih ti inhre ta an ti,” a tia.

¹⁷Khan kin sal intângna kum sômhni kum hnina, a tha khatna sûn khatna nî khan, RENGPA’N a ni zuang chongpuia.

¹⁸“Mihriam nâipa, Babulon rêng Nebukadnezara chu Tura doi hrangin ar siam tâka. A sipaihai chu puakrik inpêltirhaiin, an lu kol rakin le an dârhai inlông rakin an oma. Khannisian rêng le sipaihai khan Tura rengata ite an sôlna man hmu mahai.

¹⁹Khasikin atûn, kei RENGPA Pathian hin hiang hin ki ihril a ni: Aigupta ram chu rêng Nebukadnezara kuta pe ki ta, ama’n mualphoi sak a ta, Aigupta irchon murdi chu chôiin a sipaihai hlo hrangin pehai a ti.

²⁰Keima ta hranga sin a lei thôna sikin, Aigupta ram chu pe ki ti. Kei RENGPA Pathian hin ki iti a ni.

²¹“Kha thilhai kha a tung tena chu, Israel mihai chu inhrâttirhai ki ta, khanchu nang Ezekiela mi tinin nang an inhriat theina hrangin thu nang inhril ki ta, khanchu RENGPA ki nih ti inhresuak ta an ti,” a tia.