Read Hrangkhol EZEKIELA 3 Bible Online

EZEKIELA 3 - Hrangkhol bible

EZEKIELA 3

¹Pathianin, “Mihriam nâipa, hi lekhabu irzuat ni ihmu hi fa’n lân, khanchu fe’n lân, Israel in sûngkuahai laia thu va hril ro,” a ni tia.

²Khanchu, ki bâi ki ânga, lekhabu irzuat chu a nin fâktir tâka.

³“Mihriam nâipa, lekhabu irzuat nang ki ipêk hi fâkin lân, khop takin fa ro,” a ni tia. Khanchu, ki fâk tâka, khuaihlutui ang takin a thuma.

⁴Khan Pathianin, “Mihriam nâipa, Israel in sûngkua laia fe’n lân, nang ki ihril murdi hi va hril roh.

⁵Chong hmang intak le ni inhriat loi chong hmang namhai kuang nang tîr ma unga, Israelhai kuanga nang ki itîr a ni.

⁶Chong hmang intak le ni inhriat loi chong hmang namhai kuang nang ki itîr ni sianlân, ni thu irngai no nihai.

⁷Israel mihaiin ni thu irngai no nihai, ki thu lua khom irngai nuam ngai mahai. Israel namhai hi lungrîl ngar tak le irkôk irhel mi tak an ni.

⁸Irngai ta, nang khom anni ang takin mi lungrîl ngar tak le irkôk irhel takin nang siam ki ti.

⁹Lung ngartak nêka ngarin nang siam ki ti, tehelzong tâk nihai sian khom chi no’n lân, rot viat no ro,” a ni tia.

¹⁰Ki kuang thu a hril zêla, “Mihriam nâipa, nang ki ihril hrang murdi hi takirtâi takin irngaiin lân, intûk ngit roh.

¹¹Thoiin lân, nir chi chanpui, sala intânghai kuanga fe’n lân, an irngai nuam mo an irngai nuam no mo, an kuanga, RENGPA’N hiang hin a ti van hril ro,” a ni tia.

¹²Khanchu, Pathian Irtha’n a nin domirsânga, ki hnung tiang irhâi inring tak chu kin hriata, “Ama hmuna ta irthoka suak RENGPA roiinpuina chu inpâkin om ri se,” tiin.

¹³Thilhringhai an mitha irtôka an ivuang irhâi le thîr tâli ke fe irhâi chu hnîngnu irhâi ang dôrin kin hriata.

¹⁴Khanchu, Irtha khan a nin domirsânga, a ni hruai tâka, lungchuk loi tak le ningmur takin ki fe tâka; khannisian RENGPA hrâtna’n a ni hruai inlût ngita.

¹⁵Kebar vadung kôl, Telabib hmuna om sala intânghai kuang khan a ni hruaia. An toinaa khan ki toi saa, sûn sari sûng chu omchianin ki oma.

¹⁶Sûn sari a hek zoi hnunga chu RENGPA thu chu ki kuang a zuang tunga.

¹⁷“Mihriam nâipa,” Israel in sûngkua enkoltu hrangin nang ki siam tâk. Thu nang ki inhril hi Israelhai chu hrilhai roh.

¹⁸Mi sual kuanga, thu ki hrila, “Nang chu ni ithi ngêt hrang a ni,” ki tia, ama chu irhril irhlômna khom ni lei pêk noa, a hringna chu saninzôkna hranga mi sual chu irlet hranga ni lei hril no’n chu, kha mi sual kha a sualna sik ngeia khan thi a ta; khannisianlân a thina mô chu ni chunga irnghat ki ti.

¹⁹Aniachu, kha mi sual kha ni lei inhrila, a sualna ar let nuam noa, a sual maiin chu a sualna sikin thi a ta, nangma chu a thina mô ata saninzôk ni ni ti.

²⁰Mi dik khom, hnung kîrin thil sual a tho’n chu, a matona irletna lung sia ki ta, thi ngêt a ti, ama chu leiirhrilna ni lei pêk no sikin, a sualnaa khan thi a ti, khan a thil sa thohai chu inhriat mai ni ta no ni; aniachu a thisen mô chu nangma’n pêl ni ti.

²¹Nangin mi sa chu sual tho loi hrangin nir chua, thil sual a tho no’n chu ni irchu a pom sika hring ngêt a ti, ni irchûna ar ngaia, nang khomin tuang no chi ni.

²²RENGPA’N a ni zuang chel ngita, ki kuang, “Thoiin lân, vadung phâizôla son va fe ta, kha khan thu nang inhril ki ti,” a tia.

²³Khanchu, ki thoia, vadung phâizôla khan ki fe tâka, RENGPA roiinpuina, Kebar vadung sîra ki ihmu ang ngêt kha a lei oma, inbok rakin ki’rtet tâka.

²⁴Khan, Pathian Irtha chu ki sûnga a hong lûta, a nin ngîrtira; RENGPA’N, ki kuang, “Fe’n lân, ni ina inkhâr irkhum roh.

²⁵Nang, mihriam nâipa, irngai ro, nang khitphiar khak an ta, a laia fesuak thei no chi ni.

²⁶Khan, ni milei chu ni danga inkoptir khak ki ta, anni chu irchu theihai no chi ni, kôkirhel mihriam an ni sikin.

²⁷Khannisianlân, ni kuang thu ki hong hril tika chu, ni bâi inhong ki ta, ‘RENGPA PATHIANIN hiang hin a ti,’ an kuang la ti ni ti. A nuam nuam irngai an ta, nuam loihaiin irngai ri sehai, mi kôkirhel mihriam an ni,” a tia.