Read Hrangkhol EZEKIELA 30 Bible Online

EZEKIELA 30 - Hrangkhol bible

EZEKIELA 30

¹Khan RENGPA’N a ni zuang chongpui nôka,

²“Mihriam nâipa, RENGPA Pathianin hiang hin a tih tiin hrilin lân, inpuang ro; hi thuhai hi khêkin hril roh. Sûn ichiom tak a tung ta!

³Nikhua chu anai ta, RENGPA chângna hrang sûn chu, nam tin ta hranga sûmpui zîngna nikhua le buaina nikhua chu.

⁴Aigupta rama irdoi om a ta, ram chu longindarin om a ta, insiat chita mâksanin om a ti.

⁵“Kha irdoina khan Ethiopia ram, Ludia ram, Libna ram, Arabia ram le Kub ram ata sipai hmang laihai le, ki mihai lai ata khom thi sa an ti,” a tia.

⁶Khan, RENGPA Pathianin hiang hin a hrila, “Hmâr tianga Migdol ata le sim tiang Aswan ata Aigupta hrungtuhai chu thatpai ving ni an ta, khanchu Aigupta ram ata sipai omlianhai chu inboipai ni an ti. Kei RENGPA Pathian hin ki iti a ni.

⁷Khan, kha ram kha rammual pumpui laia ram inpon tak ni a ta, khopuihai chu insiata masan ni a ti.

⁸Khan, Aigupta ram chu ki hâla, a hrungtuhai ki thathai tena chu, RENGPA ki nih ti inhre ta an ti.

⁹Kha nikhua kha a hong tunga, Aigupta ram insiatpaiin a om tena chu, mihai chu irkuanga tîrhaiin, Ethiopia rama lungthitaka omhai kuang khan thurchi saloi chu inhretirhai ki ta, irthatâk vîkin om an ti, kha nikhua kha hong tung hrang a ni ta,” a tia.

¹⁰Khan, RENGPA Pathianin hiang hin a hrila, “Babulon rêng Nebukadnezara chu Aigupta irchon murdi insiatpai hrangin hmang ki ti.

¹¹Ama le a sipai nunsiathai chu zuang an ta, ram chu insiatpai chit an ta, Aigupta chu khandai leh doi an ta, mithi ruakin a ram chu sip zoi a ti.

¹²Nail vadung chu inkangtir ki ta, mi pualoihai kuta Aigupta chu sia ki ti. Khan, ram dang mihaiin a ram murdi chu insiatpai chit an ti. Kei RENGPA Pathian hin ki iti a ni,” a tia.

¹³Khan RENGPA Pathianin hiang hin a hrila, “Nof millimhai le pathian dolhai chu insiatpai ki ta, khan Aigupta ram chunga roirêltu hrang tukhom om ta no nihai, mipui murdi chu irthatâkin sehai ki ti.

¹⁴Sim tianga Aigupta ram chu ramchitin siam ki ta, hmâr tianga Zoan khopui chu meiin hâlpai ki ti. Khan, Thebes khopui chu hrem sa ki ti.

¹⁵Khan ki ningmurna chu Aigupta rama khopui kul nei Pelusium chunga bunthuan ki ta, Thebes irchonhai chu insiatpai ki ti.

¹⁶Aigupta ram chu hâl ki ta, Pelusium chu dengthei takin om an ti. Thebes banghai chu insimpai ni a ta, khopui chu tuiin sip a ti.

¹⁷Heleopolis le Bubastis khopuia ruathartehai chu irdoinaa thi an ta, khan mi danghai chu sala hruaiin om an ti.

¹⁸Aigupta sinthotheina le a hrâtna an irsorpui ngai kha kin boipai tena chu Tahfanes chu inthimin bôm ta a ti. Aigupta chu sûmin bôm a ta, khopuia mi murdihai chu sala hruaiin om an ti.

¹⁹Khan Aigupta chu hiang hin ki hrem tena chu, RENGPA ki nih ti inhresuak ta an ti,” a tia.

²⁰Khan kin sal intângna, a kum sômhleikhatna tha khat le sûn sari nî khan RENGPA’N a ni zuang chongpuia.

²¹“Mihriam nâipa, Aigupta rêng kut chu kin khiakpai tâka, a dam nôka khandaihai ar lên thei nôkna hrangin tukhomin thil a ngar zât leh tuam pe mahai.

²²Khasikin atûn RENGPA Pathian hin hiang hin ki iti a ni: Aigupta rama ki râl ni nia, a kut inhni chu inkhiakpai ki ta, kiaka lei om le la kiak ngai loi kha. Khan a khandai chu a kut ata inthapaitir ki ti.

²³Aigupta mihai chu rammual pumpuia hin irthekindartirhai ki ti.

²⁴Khanchu Babulon rêng kuthai chu inhrâttir ki ta, ki khandai chu a kuta sia ki ti. Khannisian Aigupta rêng bânhai chu inkhiakpai pe ki ti, a râlhai makunga khêkin thi a ti.

²⁵A ni, ama chu indoktir ki ta, Babulon rêng chu inhrâttir ki ti. Ki khandai chu ama ki pêka, Aigupta ram tiang an lek tena chu mi tinin RENGPA ki nih ti inhresuak ta an ti.

²⁶Aigupta mihai chu rammual pumpuia hin irthekindartirhai ki ta, khanchu RENGPA ki nih ti inhresuak thei ta an ti,” a tia.