Read Hrangkhol EZEKIELA 31 Bible Online

EZEKIELA 31 - Hrangkhol bible

EZEKIELA 31

¹Khan kin sal intângna kum sômhleikhatna, a tha thumna a sûn khat nî sûn khan, RENGPA’N a ni zuang chongpuia.

²“Mihriam nâipa, Aigupta rêng le a mipuihai kuang khan hiang hin hril ro: Ni sintho theizia hi ar sâng zâp na! I leh mo nang ki ihrilkhî ta hrang?

³Lebanon Sidar thing ang ni nia, ôn irbuk le enhoi tak nei, sûm tôn phâk raka thingkung ang chu ni ni.

⁴A’rsônna hrangin tui a tama, ama infâna hrangin tuirîlpût a tama, thing môngna hmun kha tui leh an inzotir maia. Khan rampui sûnga thing murdihai ta hrang khan tuidunghai a om saa.

⁵Ama chu sataka tui hmu’n a oma, thingkung danghai nêkin ar sâng uala, a ônhai khom sei le liantak tak a ni.

⁶Chunglêng va chi tinrêngin a ôna khan irbu an kai ngaia, ramsahai chu a ôn hnuaihai khan an têhai an lêng ngai; rammuala nam tinhai chu a dâihlîm hnuaia khan an irngam ngai.

⁷Kha thing kha en a hoiin, ôn sei takhai lâkin, irsâng tak a nia; a’rzunghai chu irnêng rîla tui luanghai dênin a phâka.

⁸Pathian irhuana Sidar kung danghai leh hrilirkhî thei ni maka, meisâr kung rêng rêngin khaanga ônhai kha la nei ngai mahai, Tângêm kunghai khomin a ônhai lua pha mahai. pathian irhuan thingkunghai lua’n a satna kha pha mahai.

⁹Keiin enhoitak le ôn irzat takhai neiin ki siama. Pathian irhuan Edena thingkung murdihaiin ama chu an hnarsa ngaia.

¹⁰“Khasikin atûn, kha thingkungin sûmhai a phâk mân tena irsôna a om chunga khan i zât thil mo a tung hrang ti hi kei RENGPA Pathian hin nan hril ki ti. A’rsâng lia a ôn a lian liaa.

¹¹Khasikin ki hnôlpai tâka, ram dang mi roirêltu kuta pe ki ti. Ama’n kha thingkung kha a pualoina dungzuiin a chunga thil tho a ti.

¹²Ram dang mi lungkham boihaiin phûrin masan rak an ta, a ônhai le a suamhai chu tâng tin le phâizôl tin chunga khan tâkin om a ti; a dâihlîm hnuaia nam tin omhai chu rot ta an ti.

¹³Vatehai chu hongin thing kiak sai chunga khan hong chuang an ta, ramsahai khom a ônhai khan inlôi an ti.

¹⁴Khasikin atûn ata chu thingkung murdi, savinga tui leh donsui khom ni sian, kha tânga khan sei thei ta no nia, a’rzîk khomin sûm dênin sei ta no ni. An rêngin anni chu mihriamhai anga thi hrang an nia, mithi khua lei fe tâkhai zu zompuihai an ti,” a tia.

¹⁵Khan, RENGPA Pathianin hiang hin a tia, “Thing kha mithi khua a fe tena chu a chûlpuina entîrna hrangin irnêng rîla tui leh inkhumpai ki ti. Tuidunghai chu khaphai ki ta, ivadung tam takhai khom inluangtir no ning, thing kha a thi tâk sikin, Lebanon tâng chunghaia inthimin sia ki ta, khan rama thing murdihai chu inthêmtirhai ki ti.

¹⁶Mithi khuaa ki tîr tena chu, a’rtetna irhâi khan nam tinhai chu inthingtir a ti. Khan Edena thingkung murdihai le, Lebanon-ah thing sa, tui leh donsui inliana omhai, irnêng hnuai tianga fe tâkhai kha a’rtetna sika khan an râiinfântir an ti.

¹⁷Ama le anni chu mithi khuaa irteta lei om tâkhai zompui hrangin fe an ta, an irhlîm hnuaia om murdihai chu, nam tinhai laia irthekindarin om a ti.

¹⁸“Thingkung kha Aigupta rêng le a mipuihai chu an nia, Edena thinghai lua khaanga irsâng le milung lâk kha om mahai; khannisian atûn chu, Eden irhuana thinghai ang khan, Pathian nei loihai le irdoina khan ithata lei om tâkhai zom hrangin mithi khuaa fe ta a ti, keiin ki iti a ni,” RENGPA Pathianin a tia.