Read Hrangkhol EZEKIELA 34 Bible Online

EZEKIELA 34 - Hrangkhol bible

EZEKIELA 34

¹Khan RENGPA’N a ni zuang chongpuia,

²“Mihriam nâipa, Israel roirêltuhai kha theiloi inchangtirhai roh. An kuang thu hrilin lân, kei RENGPA Pathian hin hiang hin ki iti a ni, ti pehai roh. Nangni Israel belrapuhai nin chung a rik e! Nin bingin, nin irdonsuia, khannisian belrahai chu itiklai khom donsuihai ngai mak chêi.

³Nangni’n chu irhnutui nin ina, samul silkaihai nin irbela, belra satakhai chu thatin nin fâk ngai, khannisian belrahai chu donsuihai ngai mak chêi.

⁴A’rzalhai donsui ngai loiin, dam loihai khom indamtir tum ngai mak chêia, a pop a liamhai khom tuam pehai loiin, ar hmanghai khom zonghai ngai mak chêi, a rothai khom hruai kîrhai loiin. Nunsia takin kêng nin ilohai ngai.

⁵Belrahai khan belrapu an nei no sikin an irthekindara, ramsahaiin thatin an fâkhai ngai.

⁶Khasikin belrahai chu tâng irsânghai le mualhaia an lêng indara, irnêng chung murdia hin irthekindarin an oma, tukhomin anni chu enin zongsuak khom tum mahai.

⁷“Khasikin, atûn, o nangni belrapuhai, kei RENGPA hin nangni ki ihril hi irngai roi.

⁸Pathian hring ki ini ang hin nangni ki ti, ki chong hi irngai unglân, khanchu nin ta hrangin sa a ti. Ki belrahai chu belrapu an nei no sikin, ramsahaiin thatin an fâkhai ta a ni. Ki belrapuhai lakin zongsuak tum mahaia. Anni vai an irdonsuia, belrahai chu uksak viat mahai.

⁹Khasikin, o nangni belrapuhai, ki thu hi irngai roi.

¹⁰Kei RENGPA Pathian hin ki ti, kei chu nin râl ki nia, ki belrahai chu nangni ata lapaihai ki ta, khanchu itiklai khomin nangni chu belrapu’n nangni se ta ngai no ning, nin bing vaia irdonsui hrang khomin nangni siam ta no ning. Nangni rengata ki belrahai chu saninzôkhai ki ta, nangni infatir ta ngai no ning.

¹¹“Kei RENGPA Pathian hin nangni ki hril, keima ngêtin ki belrahai chu enkolin donsuihai ki ti.

¹²Belrapu’n a belra irthekindarhai bukkhôma a idonsui nôkhai angin donsuihai ta ki ti. Kha inthim le sûm zîng nia an inthekindarna hmunhai ata kha hruai kîrhai nôk ki ti.

¹³Ram dang ata kha hruaisuakhaiin bukhai ki ta, an rama ngêt hruai kîrhai ki ti. Tânghai le Israel rama ivadunga hruaihai ki ta, hloi hring hmun hoitaka hruaihaiin infâhai ki ti.

¹⁴Tâng chunga durba omna hmuna le irhôrhai le Israel ram murdia hloi hring hmunhaia lungthi takin fâk nêk inzongtirhai ki ti.

¹⁵Keima ngêt hi belrahai belrapu chu ki ni, an ta hrangin irngam hmun zong pehai ki ti, kei RENGPA Pathian hin ki iti a ni.

¹⁶A lei irhmang tâkhai chu zonghai ki ta, a rothai khom hruai kîrhai ki ta, a pop a liamhai khom tuam pehai ki ta, dam loia omhai chu indamtirhai ki ti. Khannisian a dam le a marhai chu inboipaihai ki ti, thil dik tho ngai belrapu chu ki ni sikin.

¹⁷“Khasikin atûn chu, o ki belrahai kei RENGPA Pathian hin ki ti, inkhat khatin nin chungthu rêl ki ta, a sahai chu a siathai le a bingin khâipaihai ki ta, belrahai chu kêltakhai leh a bingin sepaihai ki ti.

¹⁸Khan nin laia senkhathai chu durba satakhai nin fâk khomin, nin milung chuk hliak maka, nin ifâk loihai ten khom kha nin chîl insiatpai ngai, tui irthianghai nin in ngaia, nin iin loi ten khom kha nin innimtir ngai.

¹⁹Ki belra danghai khan durba nin ichîl insiathai le tui nin innimtirhai kha an fâkin an in a ni hi.

²⁰“Khasikin atûn, kei RENGPA Pathian ngêt hin nangni ki hril, nangni belra hrâthai le irzalhai kâr hi rêl hrang ki ni.

²¹A dam loihai chu nin naminzuanhai ngaia, a pâl lai ata a bingin nin siahai ngai.

²²Khannisian ki belrahai chu saninzôkhai ki ta, nuamninga loin inomtirhai ta no ning. Ki belrahai chu inkha khatin an chungthu rêl ki ta, a sahai chu a siathai lai ata a bingin sehai ki ti.

²³Khanchu ki sinthotu Davida anga rêng inkhat an belrapu hrangin pehai ki ta, ama’n anni chu donsuihai a ti.

²⁴Kei RENGPA hi an Pathian ni ki ta, ki sinthotu Davida anga rêng kha an chunga roirêltu ni a ti, keiin ki iti a ni.

²⁵Lungthi taka an omna hrangin an kuang thuthung siam ki ta, ki belrahai chu zôka an om theina hrangin le ram hnuaihaia an riak theina hrangin, ram sûnga ramsa murdihai chu irzûlpaihai ki ti.

²⁶“Satvurhai ki ta, ki tâng irthiang kôla inomtirhai ki ta, khataka khan an innang rikipa satvur rua pehai ki ti.

²⁷Thingkunghaiin ra insua an ta, loimânin bu le bâl insua a ti, mi tin chu mâni ram sûnga lungthi takin om an ti. Khan ki mipuihai khitna hrui sût ki ta, suaka siamtuhai ata kin sua zalêntirhai tena chu, RENGPA ki nih ti chu inhre thei ta an ti.

²⁸Pathian nei loi namhaiin longindarh ta no nihaia, ramsahai khomin anni chu thatin fa ta ngai no nihai. Anni chu lungthi takin om an ta, tukhomin insî thei ta no nihai.

²⁹Ram satakhai pehai ki ta, kha ram ata kha châm khom inboipai ta ki ta, nam danghaiin hmusit ta no nihai.

³⁰Mi tinin Israelhai ki hrunghaia, anni chu ki mihai an nih ti inhre ta an ti, kei RENGPA Pathianin ki iti a ni.

³¹Khan nangni ki belrahai, hloi hring hmuna belrahai, ki mihai chu nin nia, kei hi nin Pathian chu ki ni,” RENGPA Pathianin a tia.