Read Hrangkhol EZEKIELA 36 Bible Online

EZEKIELA 36 - Hrangkhol bible

EZEKIELA 36

¹Khan RENGPA’N, “Mihriam nâipa, Israel tânghai kuang khan thu hrilin lân, RENGPA Pathianin hiang hin a tih tiin hril ro:

²Israel râlhai chu tekirtoi takin hiang hin an hrila, ‘Atûn chu so tâng miluihai so ei ta a ni ta,’ an tia.

³“Khasikin thu leihrilin lân, kei RENGPA Pathian hin hiang hin ki tih iti hi inpuang roh. Khan Israel tânghai chu a kôlvêla namhaiin lâkin an longindartira, Israel an hmusit tena chu,

⁴kei RENGPA Pathian hin nangni mual le tânghai, ivadung le irhôrhai nangni khoram mâksana omhai le khopui longindara mâksana omhai, a kôlvêla nam murdihai hmusita omhai hi nangni ki hril.

⁵Kei RENGPA Pathian hin ningmurin a kôlvêla namhai le a bîktakin Edom chu irkôkhai ki ti. Râifân le hmusit takin ki ram chu an lâka, hloi hring hmunhai chu an lei lua tâka.

⁶“Khasikin Israel ram chungthua leihrilin lân, tânghai, mualhai, ivadunghai le irhôrhai kuang khan nam danghaiin hmusit tak le hmâimôk taka an lei ilonahai sika khan kei RENGPA Pathian hin hianga ningmura ki ihril a nih ti hril pehai roh.

⁷Kei RENGPA Pathian ngêt hin chong kin kung, a kôlvêla namhai kha hmâimôk lahai ngêt ki ti.

⁸Khannisian Israel tânghai chunga khan chu thingkunghaiin hna la nôk an ta, nangni ki mi Israelhai ta hranga hin ra insua nôk an ti. In tiang kîr nôk lat thei ta nin ti.

⁹Kei chu nangni tianga mi ki nia, nin loihai chu tho nôk nin ta, chîmu nangni insongtir nôk ngêt ki ti.

¹⁰Nangni inpungtir ki ta, khopuihaia khan om nôk nin ta, a siat a koihai chu indingtir nôk nin ti.

¹¹Mihriam le sahai nangni inpungtir ki ta, tiana nêkin tamtak hong ni ta nin ti; nâi le tehai khom tamtak nei sa nin ti. Tiana nin lei iom ngai ang khan, nangni inomtir nôk ki ta, matona nêkin tuanintungin nangni siam ki ti. Khanchu RENGPA chu ki nih ti inhre ta nin ti.

¹²O, Israel ki mipuihai, nin rama om nôk hrangin nangni hong hruai nôk ki ti. Kha kha nin ram ni a ta, khataka khan nin nâi le tehai châmin om ta ngai no nihai.

¹³“Kei, RENGPA Pathian hin hiang hin nangni ki hril. Mihaiin ram kha mihriam fâktu le namhai longindartirtu an ti ngaia.

¹⁴Khannisian atûn ata chu mihriam fâktu le nin nâi le tehai longindartirtu ni ta no ni, kei RENGPA Pathian hin ki iti a ni.

¹⁵Ram khan nam danghai nuisona thu inhre ta ngai no nia, mihai innuisan tong ta ngai no ni. Ram khan a nâi le tehai chu longindarh ta ngai no ni, RENGPA Pathianin a ti,” tiin.

¹⁶Khan RENGPA’N a ni zuang chongpuia,

¹⁷“Mihriam nâipa, Israelhai kha an rama an om lai khan, an omdânhai le an sinthôna khan ram kha an porinchetira, an omdânhai kha keima ta hrangin chu nupang a tha tina an hmu zoroa Pathian dâna irthiang loia an om ang dôra porinche chu a ni.

¹⁸Khan ram sûnga thisen an insuanahai le, millimhai sika khan ram an porinchetirna sikin, ki ningmurna chu an chunga kin sum tâka.

¹⁹An omdân le an lêng dân sika khan theiloi kin changtirhaia, khasikin ram danga kin thekindartirhai ta.

²⁰An fena hmun tina, ki’rhming irthiang chu an porinchetira, a san chu mihaiin, ‘Hihai hi RENGPA mihai chu an nia, a ram ata rothai chu an ni,’ an ti ngai sika hin.

²¹Kha thil khan ki’rhming irthiang chu a sân a nin ngaituatira, Israelhaiin an fena hmun tina an porinchetir ngai sikin.

²²“Khasikin atûn, Israelhai kuang khan RENGPA Pathianin hiang hin a tih tiin hril pehai roh. Ki sintho hranghai hi nangni Israelhai sika ni maka, khannisian ki’rhming irthiang, ram tina nin fena hmun tina nin porinchetir ngai sika khan kêng ki itho hrang.

²³Khan ki’rhming roiinpui tak irthiangzia nam tinhai laia nin lei porinchetir tâk kha ki târinlang tena chu RENGPA ki nih ti inhre ta an ti, kei RENGPA Pathianin ki iti a ni. Nangma chu nam tinhai laia ki’rthiangzia inlangtirtu ni hrangin nang hmang ki ti.

²⁴Nam tin le ram tin ata nangni hruai ki ta, nin omna rama ngêt nangni hruai kîr nôk ki ti.

²⁵Tui kathâr nangni inthikkhum ki ta, nin millim murdihai ata le nangni a porinchetirtu thil tinrênghai ata kha nangni thâr irthiang ki ti.

²⁶Milung thar le ngaituana thar nangni pe ki ta, nin milung, lung anga ngar kha lapai ki ta, thuzôm theina milung nangni pe ki ti.

²⁷Khanchu nangnia khan ki’rtha sia ki ta, ki dânhai chu zômin, ki thupêk murdihai chu vongindik ta nin ti.

²⁸Khanchu nin irchi bulhai kuanga ram ki ipêka khan om ta nin ta, nangni chu ki mihai ni ta nin ta, kei nin Pathian ni ki ti.

²⁹Thil tinrêng nangni porinchetirtu rengata kha nangni inzôk ki ta, khan bu khom pung hrangin thu pe ki ta, khanchu châm rêng rêng inhre ta ngai no chin ni.

³⁰Nin theikunghai le nin loihai chu ra tamtak insuatirhai ki ta, khanchu châm rêng rêng om ta ngai no nia, nam tinhai laia hmâimôkin nangni inomtir ta no ning.

³¹Nin omdân pualoihai le nin sin siat thohai kha inhre suak nin ta, khanchu nin porinchenahai le nin sualnahai sikin nin mithmu ngêta khan nin bingin irtir irhlôm nin ti.

³²O, Israel hi thil murdihai hi nangma sika ki itho ni ma, ti hi nin hriat ki nuam. Nin sinthohai sika khan inzôk le hmâimôka nin iom ki nuam, kei RENGPA Pathian hin ki iti a ni,” a tia.

³³Khan RENGPA Pathianin hiang hin a tia, “Nin sual murdihai ata nangni ki’rthiangtir tena chu nin khopuihaia khan, nangni inomtir nôk ki ta, nin kho ram lei chang tâkhai kha indingtir nôk ki ti.

³⁴Khan nin loihaia inlôituhai khan insûl zuakin hmu an ta, khannisian keiin loi nangni inneitir nôk ki ti.

³⁵Khanchu mi tinin, ‘Hi ram hi matona khan chu ramchâr a nia, khannisian itina mo Eden irhuan anga omin, hi khopui insimpaia, longindara, siata mâksana omhai khom kha lua nôkin kulhai indinga a iom nôk tâk ma ni?’ tiin la hril an ti.

³⁶Khanchu a kôlvêla nam inzôka omhai khan kei RENGPA hin khopui siathai chu inding nôkin ram inpon tâkhai chu ram hringin ki siam nôk ti inhre ta an ti. Kei RENGPA ngêt hin tho hranga chong kin kung tâk sikin tho ngêt ki ti,” a tia.

³⁷Khan RENGPA Pathianin hiang hin a hrila, “Israelhai chu ki kuanga changpuina zong hrangin voikhat chu siamhai nôk ki ta, khanchu belra pâlhai angin inpungtirhai ki ti.

³⁸Khan atûna khopui siata omhai hi, kha tena chu mihriam insiptirhai ki ta, tiana Jerusalema hruaithe zoroa an inhlan ngai belra sip nguta an iom ngai ang khan. Khanchu RENGPA chu ki nih ti inhre suak ta an ti,” a tia.