Read Hrangkhol EZEKIELA 37 Bible Online

EZEKIELA 37 - Hrangkhol bible

EZEKIELA 37

¹Khanchu RENGPA sinthotheina liantak chu ki chunga a oma, khanchu ar tha’n a ni hruaia, irhôrpa hin a ni sia tâka, kha irhôrpa kha ru hi a sip khaka.

²Kha irhôrpa kha a nin hîltir chita, khataka khan ru châr tamtak hi ki hmua.

³Khan ki kuang, “Mihriam nâipa, hi ru chârhai hi hong hring thei nôk nihai mo?” tiin a nir dona. Khan keiin a kuang, “RENGPA Pathian nangma vaiin kêng ni inhriat,” tiin ki sâma.

⁴Khanchu ama’n, “Ruhai kuang hin thu hrilin lân, hi ru chârhai kuang hin RENGPA thu chu irngai roi tiin hril roh.

⁵Khan an kuang, RENGPA Pathianin hiang hin a iti a nih tiin hrilhai ro: phûk nangnia khan thun lût ki ta, nangni inhringtir nôk ki ti.

⁶Khanchu irthahrui le taksahai nangni pe ki ta, vun leh nangni tuam ki ta. Nin sûnga phûk thun lût ki ta, nangni inhringtir nôk ki ti. Khanchu RENGPA ki ni tih inhre ta nin ti,” a tia.

⁷Khanchu thupêka ki iom ang khan thu chu ki hril tâka, thu ki hril mai laiin, thil irnok irhâi hi kin hriata, khanchu ruhai kha an hong irzomkhôm tâka.

⁸Khan ki en mai laiin, ruhai kha irthahrui le taksain a tuama, kha hnung chu vunin a hong tuamhaia, khannisian an puma khan phûk chu om maka.

⁹Khan Pathianin ki kuang, “Mihriam nâipa, phâivuahai kuang thu hrilin lân, an kuang khan RENGPA Pathianin kil tin ata honga, hi mithihai sûnga hin phûk pehaia, inhringtirhai nôk hrangin thu nangni a pêk ti hrilhai ro,” tiin a hrila.

¹⁰Khanchu thupêka ki iom ang khan thu chu ki hril tâka, khanchu phûk kha an taksa sûnga khan a lûta, khanchu hong hringin an ngîr tâka.

¹¹Khan Pathianin ki kuang, “Mihriam nâipa, Israelhai chu ki ruhai ang hi an ni. ‘Ei ruhai lak a châr zoi tâka, ei isabeina lak a boi tâka, sûn maton ite nei ta mak me,’ an tia.

¹²Khasikin ki mi Israelhai kuang khan thu hrilin lân, kei RENGPA Pathian ngêt hin an thânhai chu inhongtir ki ta, kêlsuahai ki ta, Israel rama hong hruaihai nôk ki ti, tiin hrilhai roh.

¹³Khan ki mihai phûmna thânhai chu kin honga ki kêlsuahai tena chu RENGPA Pathian chu ki nih ti inhre ta an ti.

¹⁴Annia khan ki phûk thunlût ki ta, inhringtirhai nôk ki ta, an rama ngêt inomtirhai nôk ki ti. Khanchu RENGPA ki nih ti inhre ta an ti. Hi thil hi tho hrangin chong kin kung tâk sikin tho ngêt ki ti, kei RENGPA hin ki iti a ni,” a tia.

¹⁵Khan RENGPA’N a ni zuang chongpui nôka.

¹⁶“Mihriam nâipa, thing khianghrol inkhat hi lan lân, a chunga hi thu hi irziak ro, ‘Juda rêng ram’ ti hi. Khanchu khianghrol dang la nôkin lân, a chunga ‘Israel rêng ram,’ ti hi irziak nôk roh.

¹⁷Khanchu khianghrol inkhat anga an inlang theina hrangin a hmor le a hmor kha zomhai roh.

¹⁸Khanchu ni mipuihaiin, kha thil kha i thôna ma nih tia nang an irdon tena chu,

¹⁹an kuang RENGPA Pathianin hiang hin a ti, tiin hrilhai roh. ‘Israel inentirna khianghrol kha Juda inentirna khianghrol leh khan hmunkhata sehai suamin lân, khianghrol inkhat inchangtir ki ta, ki kutin chel ki ti,’ a tih tiin.

²⁰“Khan khianghrol inhnihai kha ni kutin chelhaiin lân, mipuihai irhmutirhai roh.

²¹Khanchu RENGPA Pathianin hiang hin a ti, tiin hrilhai roh. Ki mipuihai chu, nam tinhai laia an lei fena hmunhai ata kha hruaisuakhai ki ta, bukhai ki ta, anni rama ngêt hong hruaihai ki ti.

²²Anni chu an ram sûnga le Israel tânghaia khan hmunkhatin siamhai ki ta; an chunga roirêltu hrangin rêng inkhat nei an ta, anni chu nam hniin om ta no nihai.

²³Anni chu millim leh ite porinche ta no nihaia, sualhai tho’n mani le mâni porinchein om ta no nihai. An lei sualna lampui murdihai ata le an lei ihnôlnahai ata kha insuahai ki ta, anni chu ki mihai ni an ta, kei chu an Pathian ni ki ti.

²⁴Reng ki sinthotu Davida ang khan an rêngin om an ta, an rêngin roirêltu inkhat hnuaia inthurual takin om an ta, khanchu iamom takin ki dânhai chu zôm an ti.

²⁵Khanchu an irchibulhai omna ram, ki sinthotu Jakoba kuanga ki lei ipêk rama khan om ta an ta, khataka khan kumkhontuangin anni le an nâi le tehai le an irchi suanpârhai chu om ta an ti. Ki sinthotu rêng Davida angin an chunga kumtuangin roirêl ta a ti.

²⁶Kumtuanga lungthi taka an om theina hrangin anni leh thuthung siam ki ta, khataka khan phunhai ki ta, inpunghai ki ta, ki biakbuk chu an rama sia ki ta, khataka khan kumtuangin om ta a ti.

²⁷Khataka khan kei chu anni leh omsuam ki ta, kei chu an Pathian ni ki ta, anni chu ki mihai ni an ti.

²⁸Khan, khataka khan ki biakbuk chu kumtuanga hrangin ki sia tena chu, nam tinhaiin kei RENGPA ngêt hin Israel chu ki mihai ni hrangin kin thang suakhai a nih ti inhre ta an ti,” a tia.