Read Hrangkhol EZEKIELA 39 Bible Online

EZEKIELA 39 - Hrangkhol bible

EZEKIELA 39

¹Khan RENGPA Pathianin hiang hin a tia, “Mihriam nâipa, Meseka le Tubala namhai chunga roirêltu roiinpuitak Gog chu theiloi inchangtirin lân, khanchu keima hi a râl ki nih ti hi hril roh.

²Ama chu hmun thar tiang irheitir ki ta, Israel tânghai a zuang tung mâna chu, hmâr tiang hlatak ata kha zuang hruai ki ti.

³Khanchu a vei kut tianga sâihli le a chang kuta thal kha inthatir ki ti.

⁴Gog le a sipai le a rual murdihai chu Israel tânghai chunga khan thi an ta, an ruakhai chu chunglêng vahai le ramsahai bu hrangin pe ki ti.

⁵Anni chu kholaidunga thi an ti, kei RENGPA Pathianin ki iti a ni.

⁶Khanchu Magoga le chômbunga omtuhai chunga khan mei insua ki ta; khanchu RENGPA ki nih ti inhre suak an ti.

⁷Khanchu ki’rhming irthiang kha ki mi Israelhai laia inlârtir ki ta, ki’rhming irthiang porinchetira om hrang chu irngai thei no ning. Khanchu nam tinhaiin, RENGPA, Israel mi irthiang chu ki nih ti inhre ta an ti,” a tia.

⁸Khan RENGPA Pathianin hiang hin a hrila, “Kha nikhua ki ihril kha hong tung ngêt a ti.

⁹Israel ram khopuihaia om mihai kha fesuak an ta, râltukfam mâksana omhai kha thingtua hrangin irkhôm an ti. Phôhai le sâihlihai thalhai, ufeihai le hmolhai kha mei thôna hrangin hmang an ta, khahai kha kum sari ten tua an ti.

¹⁰Ram kâra thing tua hrang an irkhôm nang no nia, ite rampui hnuaia irkhôm nang viat no ni. Râltukfam mâksana omhai kha an itua hrang a ni sikin. Anni longindartirtuhai le an neinun sampâr inrûktuhai chu, anni longindarhaiin an neinunhai leh pehai an ti,” RENGPA Pathianin a ti.

¹¹Khan RENGPA’N, “Kha thilhai kha a tung tena chu Gog chu Israel rama tuipui thi nisua tianga khualinzinhai irhôr an itihna hmun kha thân hmunin pehai ki ta, khataka khan Gog le a sipai murdihai chu phûm ni an ta, khanchu irhôr kha Gog sipaihai irhôr ti ni ta a ti.

¹²Ram kha irthiangtir nôkna hrangin, Israelhaiin an ruakhai phûmna hrang khan tha sari nang an ti.

¹³Khanchu a ram sûnga mi tinin, anni chu phûmhai an ta, khanchu inhnêna ki chang nî sûn chu chôiindômin om an ti. Kei RENGPA Pathian hin ki iti a ni.

¹⁴Khanchu ram kha an irthiangtir theina hrangin, tha sari zoi tena chu, mithi ruak a la om moh tia zongsuaka phûm hrangin a ram sûng murdi irfangsuak hrangin mi inthang suakin om an ti.

¹⁵Kha ram kha a suk a tungin irfang an ta, thânkhur choituhaiin Gog sipaihai irhôra khan an phûmhai theina hrangin mihriam ru an hmûna dôra irsinsiana nei an ti.

¹⁶Kha mithihai khopui kha Hamon tiin ar hming phua an ti. Khaang khan ram chu irthiangtir nôk ta an ti,” a tia.

¹⁷Khan RENGPA Pathianin ki kuang hiang hin a ti, “Mihriam nâipa, chunglêng vahaiin le ramsa murdihai chu an ta hranga thilinhlan ki isiamhai hi fa hrangin hmun tin ata koibukhaiin lân, Israel tânghai chunga a hruai theina roiinpuitak ni a ta, khataka khan hme chu fâkin thisen chu in an ti.

¹⁸Sipaihai hme chu fa an ta, irnêng chunga roirêltuhai thisen chu in an ti. Khahai kha an rêngin belrachalhai, belratehai, kêlhai le sehrât mar satakhai anga that ving ni an ti.

¹⁹Khan, kha mipuihai kha thilinhlanhai anga ki thathai tena chu, chunglêng vahai le ramsahaiin an thâihai chu fa an ta, an inrui mâka chu an thisen kha in an ti.

²⁰Khan ki dokânga khahai khan sakorhai, sakor chung chuang mihai, sipaihai le irdoi mihai hme chu an khop dôrin fahai an ti, kei RENGPA Pathianin ki iti a ni,” a tia.

²¹Khan RENGPA’N hiang hin a tia, “Nam tinhai kuang ki roiinpuina le ki roirêlna dik chu ki sinthotheina hmangin itin mo ki intungtir ti inlangtir ki ti.

²²Khanchu kha rengata kha Israelhaiin kei chu RENGPA an Pathian ki nih ti inhre suak ta an ti.

²³Khanchu nam tinhaiin Israelhai chu ki chunga an sualna sikin sala intângin an om ti inhre ta an ti. Kei chu anni ata a dang tianga irheiin, an râlhai indoitirin irdoina khan thathai ki ti.

²⁴An porinchena le an pualoinahai sikin an idongtumhai chu dong an ta, anni ata a dang tiang irheisanhai ki ti,” a tia.

²⁵Khan RENGPA Pathianin hiang hin a hrila, “Khannisian atûn chu Jakoba irchi suanpârhai tuanintungin khoza’rngâiin om ki ta, tuanintungin inomtirhai nôk ta ki ti, ki’rhming irthiang khom hi savingin hrung ki ti.

²⁶Khan anni inchitir hrang boiin, lungthi taka an rama ngêt an om tena chu, ki chunga an inchâinahai sikin an inzaknahai irnghil ta an ti.

²⁷Khanchu nam tamtak mithmua ki irthiang a nih ti inentirna hrangin, ki mipuihai chu an râlhai ram ata hong hruai kîrhai ki ti.

²⁸Anni chu sala intâng hrangin kin fetirhaia, khannisian atûn chu bukkhômhaiin inkhat lua masanhai loiin, an omna rama ki hong ihruai nôkna hin, mihaiin keima chu RENGPA an Pathian ngêt chu ki nih ti inhre suak ta an ti.

²⁹Israel mihai chunga ki’rtha chu buak ki ta, anni lai ata itiklai khom a dang tiang irheisanhai ta no ning, kei RENGPA Pathian hin ki iti a ni,” a tia.