Read Hrangkhol EZEKIELA 4 Bible Online

EZEKIELA 4 - Hrangkhol bible

EZEKIELA 4

¹Khan Pathianin, “Nang, mihriam nâipa, irnêngpila siam lung phêk lan lân, ni hmâi makunga sia’n lân; Jerusalem khopui illim irziak roh.

²A vêla irhualin kul siamin lân, mual inpôngin lân, sipai riakbukhai siam sa’n lân, ar hîlin kulhai sin roh.

³Khan, thîrphêk lan lân, nang le khopui kâra khan bang angin intung ro. Ni hmâi chu khopui tiang irheiin lân, ni irhual angin siam ro, hi hi Israel in sûngkuahai irsinsiana ni a ti.

⁴“Khatak khan ni vei tiang delin zâlin lân, Israelhai sualna mô nang inpêltir hrang ki ni. Ni zâla ni in sûngin Israelhai sual hremna tuang ni ti.

⁵An kum khat sual sik kha sûn khat nang intuangtir ki ti, sûn sôm irzathum le sûn sômkuak sûng Israelhai sual chu tuang ni ti.

⁶Kha zoia khan ni chang tiang delin zâl nôk ni ta, sûn sômminli sûng Judahai sual tuang nôk ni ti, an kum khat sual sik kha sûn khat ni ituang hrang a ni.

⁷Jerusalem omna tiang khan ni hmâi irnghatin lân, ni bânhai lîmin lân, a siat hrang chungthua hrilsuak roh.

⁸Khan, irngai ta, hruihrualin khitphiar ni ni ta, rûn hranga ki iti sûng a chuk mâka chu khôte tiang nir son thei loina hrangin.

⁹Gohu le barli hai, bê le dâl hai, changpêr hai lâkin lân, bêla siakhôm ro; khatak ata kha bai siamin lân, ni vei tiang dela ni zâl sûng, sûn irzathum le sûn sômkuak sûng chu, kha kha ni ifâk hrang a ni.

¹⁰Ni bu nêk hrang chu ni irtê zit hrang a ni, a sûn tin sekel sômhni; a hunbi nei takin ni ifâk mai hrang a ni.

¹¹Khan tui khom irtê ngêtin in ni ta, sûn khat sûngin khilât hni hunbi nei takin in ni ti.

¹²Khan, ni mithmu ngeia mihriam êk leh meia em ni ta, changpêr angin fa ni ti,” a tia.

¹³Khan, RENGPA’N, “Hianga bu porinche hi Israel nâihai khan nam dang ki inhnotsuak hrang namhai laia khan fâk an ti,” a tia.

¹⁴Khan, Keima’n, “O! RENGPA PATHIAN, irngai ta, ki hringnun hi porinche’n la om ngai maka, ki thoibop ata atûn ten hin sa a binga thi mani, ram sahai isê mani la fa viat ngai ma ung,” ki tia.

¹⁵Khanchu ki kuang, “En ro, mihriam êk nêka sehrât êk nang pe ki ta, ni fâk hrang chu hiang hin ni isiam hrang a ni,” a tia.

¹⁶Ki kuang a hril zêla, “Mihriam nâipa, irngai ta, Jerusalema bu, hringna bul chu insiat ki ta, an bu chu irtê kher kherin chardong takin fâk an ta, tui khom insit takin in an ti.

¹⁷Bu le tui chu an irsama, anni le anni chu intak an irti senga, an sualna chu lâkirhmang a ni theina hrangin,” a tia.