Read Hrangkhol EZEKIELA 40 Bible Online

EZEKIELA 40 - Hrangkhol bible

EZEKIELA 40

¹Kin sal intângna kum sômhni ringana, tha bul sûn sôm nî chu khopui insiata a om zoi kum sôm hleiminli zoia khan, kha nî sûn ngêta khan RENGPA kut chu roiinpui takin ki chunga zuang chumin, chung tiang a ni hruai pata.

²Pathian thil lei hmûna sikin Israel rama a ni hruaia, tâng irsângtak sim tianga khopui hoitak ki hmua, kha khan a nin sum tâka.

³Khan, a ni hruai innaitir uala, khan mihriam inkhat sumsen irtêk anga irtêk hi ki hmua; a kuta irkhîna pat zâiirhmi hrui le irkhîna khianghrol hi chôiin ama chu mikota ngîrin.

⁴Kha mi khan keima kuang, “En ro, mihriam nâipa thil tinrêng nang ki irhmu murdi hi savingin irngaiin lân, milung pe takin ngaitua ro; khasikin hitaka hin nang ki hong ihruai a ni, ni thil hmu dôr chu Israel mihai inhrilhai ving ro,” a ni tia.

⁵Khan, ki thil hmu chu biakbuk a nia, a’rhîlin banghai a oma, khan mihriam khan irkhîna khianghrol a lâka, a sei lam chu mûk ruk a nia, bang kha a’rkhi tâka; a’rsâng lam chu irkhîna khianghrol tuankhat a nia, a’rsa lam khom khianghrol inkhat ang dôr a ni.

⁶Khanchu nisua tianga ngha dâi mikot tiang khan a fea, leidâka khan a kâia, khanchu a chunga khan a lûtna kha a’rkhia; kha kha mûk ruka inthûk a ni.

⁷Khakhêla khan lam a om nôka, a sîr inhnia khan irhrungna tentan inthum hi a oma. Tentan tin kha irki minli nei a ni chita, a’rki minli khan mûk ruka sei a ni vinga, a banglâi chu mûk minli vêla irsa a ni. Khan irhrungna tentan khêla khan lampui mûk ruka sei hi a oma, biakbuk tianga ngha tentan liantak dênin a oma.

⁸Khanchu kha tentan kha a’rkhia, mûk riat a nia,

⁹khan dâi mikot tual kha a’rkhia, mûk riat a ni. Khanchu a mikot chu mûk hni a ni, khan a dâi mikot chu insûng tiang khan a oma.

¹⁰(Lampui sîr hnia tentanhai kha a lian dân chu a ir-ang vinga, a kâra banghai khom a’rsa lam chu a ir-ang chit a ni.)

¹¹Khanchu mihriam khan dâi mikot khang lian lam kha a’rkhia, an rêngin mûk sôm hleithum a ni, a dâi mikot khang lian lam chu mûk sôm a ni.

¹²Khanchu a hrungna tentan maton tiang khan bang irhnuai ual hi a oma, a’rsâng dân chu mûk khat a chimrip a nia, a’rsa dân khom mûk khat a chimrip dên a ni. (A tentan chu irki minli neiin mûk ruka lian an ni.)

¹³Khanchu hrungna tentan hnung tianga bang inkhat kha lampui khêla a hrungna tentan bang kha ar khi nôka, kha kha mûk sôm inhnia sei a ni.

¹⁴Khanchu tentan pên taka om kha tual a va dên raka, kha tentan kha a’rkhia mûk sôma sei a nia.

¹⁵Dâi mikot bang pên tiang ata tentan a hlataka bang kâr lampui kha mûk sômringaa sei a ni.

¹⁶Khan tentan pên tianga banghai khan tukver a oma, khanchu tentan le tentan kâra bang khom kha a om saa, khanchu lampui dep tianga banga khan tûm thingkung illim a kera kerin an sina.

¹⁷Khanchu mihriam khan dâi mikota a ni lûtpuia, khanchu pên tianga banga khan tentan sômthum a oma, kholaidung chu lungphêka dâp ving a nia, a tualzôl dên raka dâp a ni.

¹⁸Khan hi pên tianga tualzôl hi sûng tianga nêkin chu a’rhnuai uala.

¹⁹Khanchu dâi mikot chu hmun irsâng uala khan a oma, khataka ta kho sûng tianga tualzôl khan fe theina a oma, kha mihriam khan a kâr kha a’rkhia, a kâr chu mûk sômringa a ni.

²⁰Khanchu mihriam khan hmâr tianga dâi mikot pên tianga tualzôl lûtna kha a’rkhia.

²¹A hrungna tentan inthumhai lampui sîr hnia omhai le, a kâra a banghai le tentan lianhai kha, nisua tianga dâi mikot nei le lian ang dôr hi a nia, dâi mikot sei lam kha mûk sômringa a nia, a khang chu mûk sôminhni mûk ringa a ni.

²²Tentan lian le, tukverhai le a kera an iker tûm thingkung nisua tianga omhai le hmunkhat a ni. Khanchu leidâk sirbi sari dênin a om saa, khanchu tentan lian chu a mong taka khan a oma, a tualzôl tianga hmâi nghain a oma.

²³Khanchu a tualzôl khêla khan hi hmâr tianga dâi mikot ata hi mikot dang a om nôka, kha kha tualzôl sûnginta ual fena chu a ni, nisua tianga ang khan a oma. Khan mihriam khan kha dâikot inhnihai kha a’rkhia, a sei lam le a lian lam chu mûk irzakhat a ni.

²⁴Khanchu mihriam khan sim tiang a ni hruaia, khataka khan dâi mikot dang chu kin hmua; khanchu a’rkhia, dâikot danghai ang dên kha a ni.

²⁵Khanchu dâi mikot danghai ang khan tentanhai khan tukver a oma, dâi mikot sei lam chu mûk sômringa a ni, a khang chu mûk sômhni ringa a ni.

²⁶Khan kalbi sari ata kha a tung tiang a kâia, a tentan liantak kha a mong taka a oma, a tualzôl tiang hmâi nghain a oma. Khanchu lampui tianga bang sûng tiang khan tûm thingkung illim an iker hi a oma.

²⁷Hitaka khom hin tualzôl sûnginta ual lûtna lampui a oma, khan mihriam khan hi dâi mikot inhni hi a’rkhia mûk sômringa a ni.

²⁸Khanchu mihriam khan sim tianga dâi mikot ata kha tualzôl sûnginta uala khan a ni hruaia. Khanchu dâi mikot kha a’rkhia, dâikot pên tianga banghai kha an rêngin ar ang zita.

²⁹A hrungna tentanhai, a bang danghai, sum hrênahai kha irkhîna leh khan a’rkhia, kha khan tukverhai a oma. A sei lam mûk sômringa a nia, a lian lam chu mûk sômhni a ni.

³⁰Khan a kôla khan toina a oma, a sei lam mûk sômhni ringa, a khang mûk ringa a ni.

³¹A tentan lian uala khan tualzôl dang tiang a nghaa, khanchu lampui tuana banghai khan tûm thingkung an iker hi a oma. Hi dâi mikot hi kalbi kiriata irsâng a iom a ni.

³²Khanchu mihriam khan nisua tianga dâi mikot ata kha tualzôl sûnginta uala khan a ni hruaia, kha dâi mikot kha a’rkhia, a danghai ang dêna sei le lian a ni.

³³Khanchu a hrungna tentan hai, a tentan lianhai le a sûng tianga banghai kha dâikot danghai anga lian le sei hi a nia. Khanchu a’rhîlin tukverhai a oma, tentan lian kôla khom khan a om sa. A dung tiang chu mûk sômringa a nia, a khang tiang chu mûk sôminhni mûk ringa a ni.

³⁴Tentan lian kha tualzôl pên tiang khan a nghaa, a banghai khan lampui tuanin, tûm thingkung illim a kera an iker hi a oma. Hi dâi mikot hi kalbi kiriatnaa om a ni.

³⁵Khanchu mihriam khan hmâr tianga dâi mikot khan a ni hruaia, khanchu a’rkhia, a sei le a lian lamhai chu a danghai ang dên kha a ni.

³⁶Khahai ang dên khan a hrungna tentanhai a neia, a insûng tiang a bang irvôna a neia, tentan lian khom a neia, tukver khom a’rhîlin a oma, a sei lam chu mûk sômringa a nia.

³⁷Khan tentan lian kha tualzôl pêninta tiang a ena, tûm thingkung a kera an iker banghai khan a oma. Hi dâikot hi kalbi kiriata irsânga om a ni.

³⁸Khanchu tualzôl pêninta rengata kha hmâr tianga dâikot sûnginta le irzomin tentan le lampuihai hi a oma. Khanchu tualzôl tianga ngha tentan lianna tiang a suaka, khataka khan pum hâlirvôm thilinhlanhai an sôpinfâi ngai.

³⁹Hi tentan liana hin dokâng minli hi a oma, a sîr tianghai khan inhni hniin an siaa, hitaka dokânghai hin pum hâlirvôm thilinhlana hmang hranghai, sâhai, sual irbôlna thilinhlana hmang hrang, sahai, ngaidam irzongna thilinhlana hmang hrang sahai, an thatna ngaia.

⁴⁰Khanchu tentan pên tiang khan dokâng ir-angsar minli a oma, hmâr tianga dâikot lûtna khan sîrkhat tiang inhni, a dang tiang inhni siain a oma.

⁴¹An rêngin dokâng kiriat a nia, khahai chunga khan sa inhlana om hranghai chu thatin an om ngaia; tentan sûnga khan minli, pên tiang tualzôla khan minli.

⁴²Khanchu pum hâlirvôm thilinhlana hrangin lung isuka suk, mûk khat le a chimripa sei, mûk khat le a chimripa lian, mûk khata irsâng dokâng minli a oma; khahai chunga khan irbôlna le pum hâlirvôm thilinhlan hranghai thatna hrang hriamhreihai an siaa.

⁴³Khanchu dokâng chunghaia khan kutzapha dôra lian a kôla an siaa, khanchu irbôlna hme murdihai chu kha dokâng chunga khan an sia ngai.

⁴⁴Khanchu kha mi khan tualzôl sûnginta uala khan a ni hruaia, a sûnginta uala khan tentan inhni hi a oma, inkhat chu hmâr tiang dâi mikot kôl ata kha sim tiang nghain a oma, inkhat dang chu sim tiang dâikot kôl ata kha hmâr tianga nghain a oma.

⁴⁵Khanchu mihriam khan ki kuang hiang hin a hrila, tentan sim tianga ngha kha biakbuka sinthotu ochaihai ta hranga a nia,

⁴⁶Khanchu tentan hmâr tianga ngha kha maichâma sinthotu ochaihai ta hranga chu a ni. Khahai vai kha Levi irchi ata RENGPA makunga sintho hranga lût phala omhai chu an ni.

⁴⁷Khanchu mihriam khan tualzôl sûnginta kha a’rkhia, mûk irzakhata sei le mûk irzakhata irza a ni. Khan biakbuk chu nisua tiang a oma, a mân tiang khan maichâm chu a oma.

⁴⁸Khanchu biakbuk lûtna tentan khan a ni hruai inlûta, kha kha mûk ringa inthûk a nia, mûk sôm hleiminlia irzat le a banghai chu mûk thuma irsa, a sîr inhnia khan a oma.

⁴⁹Khan kalbi a lûtna tentan tena hong sun kha, a khang mûk sôminhni a nia, mûk sôm hleihnia inthûk a ni. Khanchu chopui inhni, a lûtna mikot kiangkhat tiang khan inkhat a ngîra, a dang tiang khan inkhat a ngîr saa.